¹ Yesus kim asa Yerusalemk golegolek de gweꞌanka, dekam zebe ena Betfagek yaing gwek– zaitun tra nabare kwatap teknak. Dekon zep dua-blaskam de zini abon mae onakon dan-dan guzimki– zen de angir gun hup.
² Zao zep aisil soka, “Em ena wakin san song en. Ë topnak kime liꞌinka, zao esa keledai wenya da tabin nika tane zeban akera. Desa abe hap leisyabla halza.
³ Zi de emsa takensizimdinkim, ‘Em ba habe leisya haꞌara?’ – a kirekam ding ulzim, ‘Bian dwam gwizimꞌira. Zen sa etan nabakam teisya sone zala.’”
⁴ Zen mae hap ki kirekam lwak: Zakaria Bak mensa Alap mo ola orep ayang gulkuke– zewe dikim zaun hup. Zen man ale gulku,
⁵ “Ëna Yerusalemk de zini enbiridak, ‘Eno mae mo teipsinni man angkam ebon mae onak dep hataꞌara. Zen enlala sae-sae enna. Zen in zep keledai tane tahannak nikin anehaꞌan zala.’”
⁶ Zere hon de ang ta gwen zi darena in ki zep hendep song eka. Hendep Yesus men kirekam aisil soka, kirekam zep ki hendep syal eka.
⁷ Hendep keledaina insa tane zem in han zep isong gwe zaka. Kim abon mae ihata zaka, keledai tanena in mo tahan dannak ere mae mo tahan bajusa zebe kang lasek. Yesus zao zep hwena sewe seka.
⁸ Zi trana men zen nangirblin daꞌak, zere mae mo tahan bajusa zep ora san dere dahal gweꞌak– desan de keledaina in zersong gwen hap. Hen ahakon yera ala makare naka nublun gweꞌak, desa zep hen ora san dere dahal gweꞌak.
⁹ Zini beya tangan nik lure nakon ang neblan daꞌak, hen beya tangan nik nangirblin daꞌak. Zen zep etaken gweꞌak, “Heꞌho, heꞌho! Are Daud Bak mo Auyan-tane! An Bian mo bosekam nesa dikim oto gulsun hup hata seꞌara. Heꞌho! Diki Alap Zen zebe hap dawemsa golblan! Heꞌho! Nen kitak teipsin tangan Zini Alapsa boltere tan!”
¹⁰ Yerusalemk kim hendep Yesus hata haka, zi beyam-byana men zen ang neblazak mam enkam zep eisrip-sri gwek, hendep tingare e yala iwe de zini dekam zep esaladak. Ki zep etakensik gweꞌanzak, “Zen nara hataꞌara?”
¹¹ In zen ang neblan daꞌak zen zep ding nul gwizimꞌik, “An Alap mo ol ayang gul gwen zini Yesus suke– langna Galilea mo ena Nazaret wal.” Kirekam de eton gwen ol aukuna in zep mam gwek.
¹² Yesus kim Alap mo golak til zika, dekam zep kon golealsa soneka– men zen te-ala hap Alap hap de golblan kire-kirena lirak da gwibik. Meja-mejana men zao te-alana lirak da gwibik, hen komal-tum komal-tum maena men dekon mawa oholana lirak da gwibik, desa man yal tazimki.
¹³ Ki zep hwena gubiridaka, “Alap mo olak man lwak, ‘Ano gola sa nen gwibir, “An Biansa dekon gu sone gweblan hap de gol.”’ Em an hwena ‘sowe zi mo aning gol habe li kul sone gweꞌan.’”
¹⁴ Hwena ki zep ze hen zi nwe diminni hen lekna Alap mo gola iwe Yesus onak dep yaing gwezak. Zao zep dawem tabirki.
¹⁵ Hwena Alap mo golak de mam-mam wenya hen Musa mo olsa de tawa ta gwibin hip de wenya, zen dekam zep ejal tak– mae hap: Zen kim Yesus mo owas syal gwibinni insa hla nuk, hen walas tane-nena insa anakan Alap mo gola kon etaken gweꞌakke, “Heꞌho, heꞌho! Daud Bak mo Auyan-tane!”
¹⁶ Mam-mam wenya in dekam zep hwena Yesussu dakensiblik, “Em wehe walasna insa salbirida gweꞌara? Em balk tasin hip gubiridan.” Ki zep hwena ding gulzimki, “Ëe kie salbirida gweꞌan. Hwena em bawalkam esa Alap mo ola an mo eini dam ulsul? – Daud Bak kim anakan Alapsa gublukake: ‘Walas tane-ne hap hen wal baizil hip Em mese Enaka de boltere tan hap de terya zebe mae hap hamal tazimki.’”
¹⁷ Yesus ki zep ze hli yuludaka. Ë yala in kon ki zep hendep dua-blaskam de zini asa golesek gweka. Ëna Betaniak zep asa goletruweka.
¹⁸ Kaꞌan kim kak tangannak zere hon de ang tan wenya asa etan Yerusalem san dep golelwanda haꞌan zaka, oranak zep usak gweꞌanka.
¹⁹ Ki zep hwena tenya arana hlaulku. Ora alpnak zauꞌuk. Ki zep zeno ei nika de oran hap syal hebirki. Hwena eini aha-en mae hom hlaulku. Ala enna. Dekam zep arana insa gubirki, “Em molye eini angkam hendep teka.” Arana in dekam zep ki hendep boneng gwek.
²⁰ Ëe kime owasna insa hla kuk, ee ama tangan etenggwank, hendep ee ki zebe eguk, “Hare, tenya ara yala an mes-am kitak tangan boneng gwenan!”
²¹ Yesus ki zep asa ding gulzimki, “Ëe eiwa denakae emsa gubiridaꞌan: Eme Alap ensa tingare enho naban anakan laibli gweblaꞌak, ‘Zen sa kirekam abe hap syal gwibir-blira,’ ki em hen esa serkam de owasna syal ei gwibir– an kirekame tenya arana ansa gweibirinye. Kire enkam denaka molye syal ei gwibik, hwena em esa ano syala insa kwei kul gwer. Eme dekam Alapsa abe la gweꞌak, ‘Kwatap tekna an zen hinak zenaka ter sonen,’ zen hendep kirekam maka Alap ebe mae hap syal gwibir-bliꞌara– em de taibliblankamye. Dekam em de ba mae hap abe tankam, em esa ulin gwer.”
²² (21:21)
²³ Yesus kim etan Alap mo gol san dep lwahal zaka, kim ze tawa tabiꞌinka, Alap mo golak de syal ta gwen zi mo mam-mamna Yahudi mo nol-nola ban ki zep hen yaing gwezak. Zao zep dakensiblik, “Emsa an nara gubluka, hen nara emsa tri tase gweꞌara? – dekam de kirekam-kirekamna insa syal gwe-gwibin hipye.”
²⁴ Ki zep ding gulzimki, “Ki Ëe asa hen nonol emsa takensibiridal. Baptis ta gwibin zini Yohanis Swesa san ha Alap tri ta seka? San ha zen zere en mo sosonkam ki syal gwe-gweka? Eme nonol ap ding ulbliꞌak, ki Ëe asa hen emsa gubiridal, ‘Asa Zen tri ta seꞌara, zebe kirekam syal gwe-gweꞌan.’” Dekam zep ze-en anakan donbiꞌik, “Bejen nen anakan ding gulblun, ‘Alap tri ta seka,’ ki hwena zen sa nesa gubiridala, ‘Ki em ba habe desa laiblibla srem gwek?’
²⁵ (21:24)
²⁶ Hwena anakane ding ulbliꞌak, ‘Yohanis zen zere en mo sosonkam syal gweka,’ ki hwena zi trana an sa nesa karek dabir, sap zen Yohanissi mes-am anakan daibliblak, ‘Zen eiwa Alap mo olsa ayang gul gwizimki.’”
²⁷ Anakan zep hendep ding nulblik, “Ëe home dam ulsuꞌun, ‘Yohanissi zen tri tase gweka.’” Ki zep hwena ding gulzimki, “Ki Ëe hen molye emsa gubiridak, ‘Ëe an zeno syalsae gol gweꞌan, hen Zen Asa tri tase gweꞌara.’”
²⁸ Yesus ki zep etan Yahudi mo mam-mamna in hap ayang gulzimki, “Hwena ena banakan wehe ola ansa dam ulsuꞌuk? Zini ki, zeno zi walasna dan-dan. Bi zem in ki zep oso zemka gublu zaka, ‘Ano walas, em namen anggur nga syal gweblan hap em song gwen.’
²⁹ Hwena tane zem in man ding gulbluka, ‘Ëe ama baes gweꞌan.’ Hwena hyanak zep enlalana wet tyasiki, ki zep hendep anggur ngana iwe de syal gwen hap song gweka.
³⁰ Hwena bi zem in dekam zep hen aya zebon dep song gweka. Desa hen zewe de syal hap gubluka. Zen hwena man sap ding gulbluka, ‘Ëe asa.’ Hwena zen hom song gweka.
³¹ “Zep eno mae mo dam gulsunkum, walas dare zem in, nara bi zik mo ol san ang gweka?” Mam-mam wenya in ki zep ding nulblik, “oso zik.” Yesus ki zep hwena gubiridaka, “Zep eiwa denakae emsa gubiridaꞌan: Anakare karek gol gwen wenya– sap pajak te-ala alal tanda gwen wenya, hen swi golak de lowehe gwen we walya, zen en hwena man Alap mo irik ginnik angkam biti gwe-gweꞌan. Em hwena home. Lilikin en nakone aha ensa biti gwennak kara la sone gwibiꞌin.
³² Sap baptis ta gwibin zini Yohanis in zen nonol hata zaka, zen sap Bian mo dwam gwibin sin de lowehen hap denaka ebe mae hap goltrei gwizimki. Hwena em home zeno ol san ang tak. Hwena karek gol gwen wenya in, zen en man owas hap Yohanis mo ol san ang tak, hendep ehalek. Hwena em kime kirekam hla kulidak, em dekam home mae enlalana wet yasik– dekam mae de hen Yohanis osan ang tan hapye.”
³³ “Gulk sun de ol blaoranna ansa emki ahana etan esane gwen: Zini kama bina, zen anggur ngasa eiyas tablaka. Alp san kolkam wale tablaka. Zao zep hen kasona hul gulku– anggur danna insa de ze tanakam it ta sone gwen hap. Hen gut de gola zao zep hen tauku– dekon de ngana insa kara ta ine gwen hap. Ki zep hwena ngana insa te-alakam nga syal gwe-gweblan zi hip bohe ta guzim halka. Zena dekam zep aha lang san holokam de ze gwen hap song gweka.
³⁴ Anggur dan bil gwen tamlenak kim zauk, dekam zep nga bina in zere hon de babu gwen zini dan-ahan lup gul soneka– in zen nga zem insa te-alakam bohe dak, zebon mae osan dep, ngana in kore te-ala hliksa de zere hap zer soneblan hap.
³⁵ Hwena zini in zen ngana insa bohe dak, zen hwena man nga bi nik mo zi lup gul sonenna insa dahyok. Ahana man dangolek, ahana man tol dak, hen ahana kasokam tok hap niriblak.
³⁶ Nga bina in ki zep ahakore babu gwen zini beyakam etan kap gul soneka. Nonol lup gul sonen nakon man taman kinik. Hwena desa kirekam tol hen neibiridak.
³⁷ Nga bina in dekam zep enlala gweka, ‘Ëre mo walas tangansa anik ki zer sonek. Desa sa blikip neisiblil.’
³⁸ Hwena nga bohe tan zini in kim hla da guk, dekam zep anakan eguk, ‘Wakin angkam zere mo walas tangan hataꞌara. Bi zik de tinkim, an zen sa hwena ngana ansa bi gweblala. Nen tan, ekakim nen bi eblak!’
³⁹ Dekam zep hen tane zem insa balk dak. Ngana in kon e san zep hiri dak, zao zep tol hendep dak.”
⁴⁰ Yesus ki zep takensibiridaka, “Zep anggur nga bina in de lwahal zankam, zen banakan sa gweibirida zala– nga bohe tan zini in saye?”
⁴¹ Zi trana in ki zep Yahudi mo mam-mamna in han ding nulblik, “Zen sa zi jal-jala insa timbwas tabir zira. Ki sa hwena zere mo taiblibiridan wenya kip anggur ngana insa bohe tazimdi– zen de bil gwen tamlenak ngana in kore te-ala hliksa zere hap zer gweblan hap.”
⁴² Yesus ki zep hwena ding gulzimki, “In sap eiwa. Zen in zebe hwena emsa gubiridaꞌan: Heꞌho gwibin langna men zewe dep sap Alap nonol emsa kalang gwibiridaka, hwena zere mo taiblibiridan zi hip sa li yul sonezimdi– men zen diki zere mo syal eini nol gweblananke. Hwena em bawalkam esa Alap mo ola an mo eini dam ulsul? – ‘Gol tauk gweblan wenya mensa gol tenya baes neibik, hwena Bian Alap zep desa bolak ik gilki. Zen diki Bian zere mo syal, hen neno mae mo nwenak zen owas tangan. [
⁴³ (21:42)
⁴⁴ Zep zini men zen de gol tenya iwe etisik gweꞌanzak, zao sa hendep etimbwas gwe-gwer. Hen gol tenya in men zebon mae de zan ineꞌak, zen sa hendep eils gwer.]’”
⁴⁵ Alap mo golak de syal ta gwen zi mo mam-mamna hen Farisikam de wenya in kim kirekam Yesus mo gulk sun de ol blaoranna insa esane gweꞌak, dekam zep anakan dam nulsuk, “O zeno ola an nebon mae am tiꞌin.”
⁴⁶ Dekam zep sap balk tan hap dwam neblaꞌak, hwena zi beyam-byana insa nairibiridak. Sap zi beyam-byana in Yesussu man enlala ne gweblaꞌak, “An Alap mo ol ayang gul gwen zi sike.”