Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Iaminne pasanNa Batara mae ri Maleakhi, untu’ napabattu mae ri umma’ Israel.

² Nakana Batara mae ri umma’Na, "MangngamaseangA’ mae ri kau ngaseng." Mingka appiali ke’nanga angkana, "Antekamma bateTa angkamaseangi ikambe Batara?" Appiali Batara angkana, "Sai anjo Esau daenna Yakub? Mingka Yakub Kukamaseang,

³ naKukabirisi Esau. Daera bulu’na Esau le’ba’mi Kuancuru’, siagang buttana Kupassareang mae ri olo’-olo’ sekkeka ri parang lompoa."

⁴ Ebara’ angkana anjo jari-jarina Esau, iamintu tu Edom angkanai, "Le’ba’mi niancuru’ kota-kotana ikambe, mingka lanabangungi ikambe ammotere’," lappialimi Batara angkana, "Akkullei nabangung ke’nanga ammotere’, mingka laKurumbangi. Laniarengi ke’nanga ‘Pa’rasangang Bassung’ siagang ‘Bansa natabaia pangngalarroinNa Batara sa’genna satunggu-tungguna.’"

⁵ Bansa Israel kalenna lanciniki, na nakana, "Tamaka malompona Batara; ta’rapiki kakoasanNa mange ri pantaranganna butta Israel!"

⁶ Nakana Batara Kaminang Koasaya mae ri sikamma imanga, "Se’rea ana’ napakalompoi manggena, siagang se’rea palayang napakalompoi karaenna. INakke anne Manggenu ngaseng; mingka apa saba’na natena nupakalompoA’? INakke anne pinggawanu; mingka angngapa natena numalla’ mae ri Nakke. Nuhina-hinaiA’, mingka akkuta’nangko angkana, ‘Antekamma batena ikambe anghinaKi?’

⁷ Lanri assarenu koro’bang kanre-kanreang tenaya nasiratang nikoro’bangkang irate ri tampa’ pakkoro’bangngangKu. Nampa akkuta’nang ngasengko angkana, ‘Antekamma batena ikambe ancapakKi’?’ Iamintu lanri nura’massinna tampa’ pakkoro’bangngangKu.

⁸ Punna assareko ri Nakke olo’-olo’ buta, garringa yareka pesoka, maka teai panggaukang sala anjo kammaya? Coba sai bedeng passareang anjo olo’-olo’ kammaya mae ri guburnurka! Maka lasannangi nyawana siagang lanagaukangi kabajikanga mae ri kau?"

⁹ Kamma-kamma anne, he sikamma imanga, coba sai pala’ mae ri Allata’ala sollanna Nakamaseangki’. Tena Nalanapiali pappala’ doannu, siagang anjo battu ri kasalannu tonji.

¹⁰ Nakana Batara Kaminang Koasaya, "Bajikangngangi nitongko’ pakke’bu’ BallakKu, nasaba’ tena matu-matunnu apparinra pepe’ irate ri tampa’ pakkoro’bangngangKu. Tena nakungaiKo, siagang tena nalaKutarima passarenu.

¹¹ NipakalompoA’ ri sikamma bansa-bansaya ri sikontu linoa. Kere-keremae nitunui dupaya untu’ ampakalompoi arengKu siagang nipassareangi sikamma koro’bang siratanga, ba’lalo sikontu bansaya napakalompoA’.

¹² Mingka ikau ngaseng nuhina-hinA’ lanri nubilang tenana anggaranna tampa’ pakkoro’bangngangKu, siagang nupassareangi anjoreng kanre nusorong bokoa.

¹³ Nukana ngaseng, ‘Lanremaki’ mae ri sikammaya ngaseng anjo’, nampa nubawang-bawangngangA’. Angngerangko olo’-olo’ nilukka’, olo’-olo’ pesoka yareka garringa untu’ nupassareang mae ri Nakke. Nupikkiriki angkana erokKa’ antarimai anjo passare kammaya?

¹⁴ Nitunraimi patipu assarea ri Nakke olo’-olo’ tenaya anggaranna, punna nia’ja olo’-olo’ maraengannaya bajika le’baka napa’janjiang ri Nakke! Nasaba’ iNakke Karaeng Malompo, siagang nipakalompoa ri sikontu bansaya."

Maleakhi

Video Maleakhi 1

Ikuti Kami:

KONTAK | PARTISIPASI | DONASI