Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Reya’ pessen se edhabuwagi PANGERAN ka Maleakhi kaangguy ommat Isra’il.

² Pangeran adhabu ka ommadda, "Sengko’ neser ka ba’na." Tape ommadda jareya nyaot, "Kadi ponapa caraepon Junandalem nganeserre abdidalem?" Dhabuna PANGERAN, "Esau reya gu ta’ kaka’na Yakub, ta’ iya? Tape Yakub bi’ Sengko’ ekaneserre,

³ dineng Esau ekabaji’i. Dhaera se amo’-gumo’ andhi’na Esau bi’ Sengko’ la epaancor, ban tanana bi’ Sengko’ epassra’agi ka run-burun alas e ra-ara."

⁴ Ja’ sakenga toronanna Esau, iya reya reng-oreng Edom rowa ngoca’, "Tha-kotthana tang bangsa la epaancor, tape bi’ tang bangsa epaddegga pole," PANGERAN tanto adhabu, "Reng-oreng jareya olle maddek pole kotthana se la ancor, tape bi’ Sengko’ epagujura. Reng-oreng jareya bakal esebbuda ‘Nagara se daraka’ ban ‘Bangsa se ekenneng babendunna PANGERAN salanjangnga.’"

⁵ Bangsa Isra’il bakal nangaleyana dibi’, sarta ngoca’, "Agung onggu PANGERAN reya; kakobasa’anna sampe’ ka lowarra tana Isra’il!"

⁶ PANGERAN Se Mahakobasa adhabu ka para imam, "Ana’ hormat ka oreng towana, ban kabula hormat ka lorana. Sengko’ reya Ramana ba’na; arapa ba’na me’ ta’ hormat ka Sengko’? Sengko’ reya lorana ba’na; arapa ba’na me’ ta’ tako’ ka Sengko’? Ba’na ya-nyeya Sengko’, tape ba’na atanya, ‘Kalaban cara se kadi ponapa abdidalem ya-nyeya Junandalem?’

⁷ Kalaban ngeba kurban kakanan se ta’ pantes egabay kurban e attassa Tang mezba. Ba’na pas atanya, ‘Kalaban cara se kadi ponapa abdidalem ta’ ngejabi Junandalem?’ Kalaban macemmer Tang mezba.

⁸ Mon ba’na ngatorragi ka Sengko’ keban se buta, se sake’ otaba se empon, jareya gu ta’ lalakon se sala? Kodda’ ba’na ngatorragi keban se kantha jareya ka gubennor! Ba’ sennengnga kerana atena ban apa kerana gubennor jareya becce’a ka ba’na?"

⁹ Sateya, he, mam-imam, kodda’ nyo’on ka Allah sopaja bellasa ka sengko’ ban ba’na. Parnyo’onanna ba’na ta’ kera ekabbuli, ban jareya salana ba’na dibi’.

¹⁰ PANGERAN Se Mahakobasa adhabu, "Lebbi bagus labangnga Tang Padalemman reya totop bai, sabab tadha’ gunana ba’na ngodhi’i apoy e attassa Tang mezba. Sengko’ ta’ lebur ka ba’na, ban ta’ endha’ narema tor-atorra ba’na.

¹¹ Sengko’ ehormadi bi’ sa-bangsa sadunnya. Neng e man-dhimman oreng ngobbar dupa amolja’agi Tang nyama ban ngatorragi ban-kurban se pantes, sabab sakabbinna bangsa ngormat ka Sengko’!

¹² Tape ba’na ya-nyeya Sengko’ polana nganggep Tang mezba tadha’ ajina, sarta neng e jadhiya ngatorragi kakanan se la ta’ ekendha’i bi’ ba’na.

¹³ Ca’na ba’na, ‘Sengko’ la busen ngakan jareya kabbi,’ ban ba’na ta’ ngejabi Sengko’. Se egabay tor-ator ka Sengko’ bi’ ba’na keban keco’an, keban se empon otaba se sake’. Pangrasana ba’na Sengko’ endha’ narema tor-atorra ba’na jareya?

¹⁴ Ta’ salamet tokang tepo se ngatorragi ka Sengko’ keban se tadha’ ajina, mangkana e antarana ebinna dibi’ badha keban se bagus se la ejanjiyagi ka Sengko’! Sabab Sengko’ Rato Agung, se ehormadi bi’ sakabbinna bangsa."

Maleakhi

Video Maleakhi 1

Ikuti Kami:

KONTAK | PARTISIPASI | DONASI