¹ Yesus ki zep dua-blas enkam in zen zere hon ang ta gwek tagal gulsuku, ki zep ze gubiridaka, “Ëe asa ere mo sosonsa ebe mae hap golzim– em ekakim kitak de dowal-dowalsa olealsa sone gwibik, hen zi sang-sangsa ekakim dawem labir song gwek.”
² Ki zep ze etan gubiridaka, “Dekam sek gwek. Zi sang-sangsa dawem labir song gwek, hen deban anakare ola ol haladak, ‘Alap Zen de nesa irik gin hip denak angkam man golek de gweꞌan.’
³ Bahem ba maena ora san dep lop tan– sap dutena hen hon maena bahem. Tembanena bahem hen lop tan, hen te-ala maena. Timnik de baju ala son enkam emki sek gwen.
⁴ Gol karek mae nakon de emsa zer irinni, zen zewe en emki gwen. Bahem dekon gol dawem san dep al gwehan.
⁵ Hwena men dekore e nakon emsa zer irin sremna, ki zao em tana sonna taik-tik so gukhan– zen dekakim anakan tame nuk, ‘Zen sap Alap onakore ol dawem naban nebe mae hap golhatazim zira, hwena nen insa er-in srem gwenan nere mae hap de kareksae kim mam ulin.’”
⁶ Dua-blaskam de zini in ki zep e-e san ze-en ze-enkam sek gwendak. Zen Alap onakore ol dawemsa nolhaladak, hen zi sang-sangsa dawem dabir song gwek.
⁷ Dekam teipsin zini Herodes Galilea mo langnak irik giꞌinka. Zen kim tingare owas-owasna in hap dena salka, dekam zep tangan enlalana topse gweblaꞌanka. Sap ahakon anakan egu gweꞌak, “Baptis ta gwibin zini Yohanis Swe mes etan ngaya gweka. In zen hwena bosena Yesuskum li yul soneka.”
⁸ Hen ahakon man egu gweꞌak, “Elia Bak Swe mes yap etan ngatan zi mo lang nakon jowe zaka.” Hen ahakon egu gweꞌak, “In orep men zen Alap mo ola ayang nul gwekke, zen mes yap ahanik etan tin nikon de ngaya gwenkam bosena Yesuskum li yul sone zaka.”
⁹ Herodes dekam zep hwena guku, “Ëe mes-am gubiridak– Yohanis mo nolsa de blaonsublun hapye. Zep an hwena nara zi ze etan joweꞌan zala? Ëe mese zini in hap de ola beyakam sane gwe-gwek.” Zen dekam zep sap dwam gwe-gweꞌanka– Yesussu de hen hla tan hapye.
¹⁰ Dua-blaskam de zini in kim etan lwanda halzak, ki zep Yesussu donblazak– tingan mensa ki zena syal tan dakke. Dekam zep kon hwena Zen etan golesek gweka– ena Betsaida mo lang san dep, zao de ze-en golegwe inendan hap.
¹¹ Hwena zini kim esak, “Yesus desan song gwenda,” lun kon zep nertrok. Yesus kim hlauludaka, ki zep haen gwibiridaka. Zao zep Alap Zen de irik gin hip denaka tawa tabirki, hen zi sang-sangsa ze dawem ta gwibiꞌinka.
¹² Zao zep hendep dapse gwesiꞌik. Dua-blaskam de zere hon ang ta gwen wenya in ki zep nenblazak, “Bian, langna an dwan tahalha tangan nakake. Dawemna zi beyam-byana ansa Em gubiridan– dekakim tembane hap hen ni tan gol-gol hap ehakalsindak.”
¹³ Yesus hwena man ding gulzimki, “Amki em tembanena zebe mae hap hen olzimk.” Ki zep ding nulblik, “Neno mae mo rotina aha-ere taha-tap enkamke, hen hogwena dan-dan en. Kina ki neno mae mo te-alana man– dekam de tokonak tembanesa zi trana an hap lop tazimdin hipye!”
¹⁴ Sap dekam in zen ze lowe heꞌak, zi enna san ha lima ribu enkam mes yap– we wal walassa de aitbin sremkamye. Yesus ki zep gubiridaka, “Em gubiridan– hlik-hlikkam de teinikirin hip. Aha-ere hlikna 50-50kam de teinikink.”
¹⁵ Kirekam de teinikirin hip zep nenbiridak.
¹⁶ Ki zep roti aha-ere taha-tapna insa hogwe darena in han teisyaka, dekam zep ngli san de kara gwesen naban Alap hap dawemna golblaka. Ki zep hwena rotina insa ahap tabirki, hen hogwe darena insa kwa-kwak soka. Dekam zep dua-blaskam de zini in hap etan-etankam kap ta gwizimꞌinka– zen dikim hwena zi beyam-byana in hap kae gwebla-zimdin hip.
¹⁷ Kim dwenblandak, hendep kitak man eitri gwek. Dua-blaskam de zini in dekam zep etan tembane mosrona insa tagam dasik. Yuna dua-blas enkam zep esuwek.
¹⁸ Aha yaklanak, Yesus ze-en de gwen nakon Biansa abe taꞌanka, hen zere hon de ang ta gwen wenya zewe lowe heꞌak. Zao zep takensibiridaka, “Zi mo Asa de dam tasinkim, Ëe an nara mo weinak debe hatazak?”
¹⁹ Ki zep ding nulblik, “Ahakon man emsa nen gweblanan, ‘In baptis ta gwibin zini Yohanis Swe etan tin nikon ngaya gweka. In zen hwena Yesuskum bosena li yul soneka.’ Hen ahakon man emsa nen gweblanan, ‘In Elia Bak mo weinak Alap mo olsa ayang gul gwizimꞌira.’ Hen ahakon man emsa enlala ne gweblanan, ‘Zen diki ahakon men zen orep Alap mo ola ayang nul gwek, zen mes yap ahanik etan ngaya gweka. Zen hwena bosena Yesuskum li yul soneka.’”
²⁰ Ki zep etan takensibiridaka, “Hwena ere mae mo Asa de dam tasinkim, Ëe an diki nara mo weinak dep dena?” Petrus zep ding gulbluka, “Bian, Em an Zen– Israelsa de ngaya tabin hip de Zi niye, Alap men Desa dam tasikiye.”
²¹ Ki zep hwena gubiridaka, “Insa kirekam Asa dam lasinin, aha maesa hwena bahem gubiridan.”
²² Etan ki zep gubiridaka, “Alap mo dwam gwibinni abe hap dena a kirekam sa lwal: Ngatan zi mo lang nakore Zi Tanganna Ëe karekna mam tangan naka asa goltowe gwer. Hen Yahudi mo nol-nola, Alap mo golak de mam-mam wenya, hen Musa mo olsa de tawa ta gwibin wenya sa Asa baes neblal, hendep sa Asa dal. Hwena yaklana dan-ahan, ki sa Bian tin nikon etan Asa ngaya tala.”
²³ Yesus hen man zi beyasa gubirida gweka, “Men nara Abon de ang gwe-gwen hap dwam gwenna, zen diki zere mo gwenna zen eititi gwibin– dekam de zere hap de te-lidak son we son naban Asa zertronda gwen hapye, anakare enlala naban, ‘Ëe sap asa Yesus hun apdenak lil.’
²⁴ Sap men zen de zere mae mo auhu-kamanak de gwenna anakan nolairi gweꞌak, ‘Ëe babe Yesussu de ang gwe-gweblannak karekna goltowe gwen,’ ki zeno mae gwenna in sa jek-jak gwer. Diki men zen Asa de ang gwe-gweblan hap zere mae mo gwenna sosok nul gweꞌak, hendep zao mae de tin hip, zen zen sa hendep denaban engaya gwer.
²⁵ San ha dawemna? – em de serkam te-ala beya gwenkam hendep kitak de okamana ansa bi gwibinkim, hwena dekam de ere mo gwensa tihis ginkim. Kirekam dawem naka hom!
²⁶ Zi de anakan de gunsu saher gwenna, ‘Ëe Yesussu de ang gwe-gweblan zi,’ ki ngatan zi mo lang nakore Zi Tanganna Ëe kime Bian mo ngatan naban hen soson naban zeno dam taha nakore zi niban goleyaing gweꞌanzak, Ëe molye hen desa anakan kira tak, ‘Zini an eiwa Asa de ang gwe-gweblanna.’
²⁷ Eiwa denakae emsa gubiridaꞌan: Em an zene awe lowe heꞌan, em molye ahakon na-en juwek– Alap mo yakla yalak de zaun sremnakye. Em esa Asa hla lal– Ëe kime zere mo bose hap de irik gin hip hataꞌan zakye.”
²⁸ Zenaka de karek tan hap dena in kim tawa tabirki, zao san ha mingguna aha-en tamank, ki zep kwatap san dep golesek gweka– Petrus, Yohanis, hen Yakobus mae en han, Alapsa de dekon gu soneblan hap.
²⁹ Kim kon ola gu soneꞌanka, nwe-masena dekam zep hwena liwe heblaka, hen pakean zem man tangan serkam ngap-ngap neblak hen ngli ang makan nalilingtilbliꞌak.
³⁰ Mumuk ennak zep Musa ne Elia ne ngatan zi mo lang nakore ngatan naban oljowe zaka. Ki zep ze Yesus hun ertonꞌanka– Zen de Yerusalemk tin hip denaka, men kirekam Alap gu-gublukake.
³¹ (9:30)
³² Petrus dekam wal bose wal zeban totokkam nisi goletruweꞌanka. Mumuk ennak zep luk taꞌanzak, dekam zep Yesussu hla dak– ngatan zi mo lang nakore ngatannak kim zi darena in erzauꞌunka.
³³ Zi darena in kim Yesussu hli laꞌanka, Petrus ki zep totoresa gubluka, “Bian, dawem tanganna– nen de awe lowehe gwen naye. Zep ee asa gol kluksa dan-ahan syal eblandal– ahana Bian ere hap, ahana Musa Bak hap, hen ahana Elia Bak hap.” Hwena Petrus insa kirekam gubluka, hyanak zena man saher gwibiꞌinka, “O ee an ba habe kirekam gublul!”
³⁴ Petrus kim nama kirekam ola tonblaꞌanka, butna ki zep ati gwezak, hendep man ze wale tabirzik. Dekam zep eairiꞌak.
³⁵ Ki zep hwena butna iwe ola esak, “An ano Tane, ere mo Dam Tasinni. Desa em sal gweblan.”
³⁶ Ola in kim zausuk, dekam hwena Yesus ensa ze hla dak. Owasna insa ki ze hla nuk, zen hom mae aha maesa donbiridak– Yesus kim nama golelowe heꞌankaye.
³⁷ Kaknak zep Yesus zere hon de ang ta gwen zi dan-aharena in han kwatapna in kon goletine gweka. Hwena ki zep ze zi beyam-byana hla nulidaꞌanonk. Man kon nesblaꞌak.
³⁸ Ki zep kon ahanik ol mamkam gu hanaka, “Bian, ee ama emsa abe taꞌan: Ano walassa emki mas gweblan, sap ano walasna ahana hom.
³⁹ Dowala kim til gweblanda, hendep dekam zep herhen naban zenaka zerheirisen gwenda– ek tutum nuban. Kire enkam ki karek tanda gwenda. Hom holokam hli ta sehal gwenda.
⁴⁰ Mese sap ere hon de ang ta gwen wenyaka zen de dowala insa zeralsa sonen hap gubiridal. Hwena man sap nakablal.”
⁴¹ Yesus ki zep gubiridaka, “Eiwa, angkam de zini em ei nibarena hom tangan! Em in nol drak-drak enna. Ëe san ese nakae sap emsa golelowehe gwek! Ëe ama bae– eban mae de holokam golelowehe gwen naye. An san emki walasna insa zer halzan.”
⁴² Walas tola in kim song gweꞌan zaka, zao zep dowala in karekkam zerheirki, dekon zep yal-yal gwe seꞌanka. Yesus ki zep jala ban zebon onakon de wet son hap gubluka, dekam zep hendep dawem gweka. Ki zep hwena bi zem insa gubluka, “An de– eno walas naye. Mes dawem gwenda.”
⁴³ Zi trana in man tangan etenggwank, hen man eguk, “Eiwa, Alap mo sosonna mam tanganna!” In kim zini nama Yesus mo owas syal gwe-gwibin hip etenggwan tineꞌak, ki zep hwena dua-blaskam de zini insa gubiridaka,
⁴⁴ “Ola an ing uk. Bahem awe hli yun: Ngatan zi mo lang nakore Zi Tanganna Asa sa jal zi mo tahanak dep tapbla dazim.”
⁴⁵ Hwena zere hon de ang ta gwen wenya in hom tame nuk. Banakan mes yap ze gweibiridaka, zep tame nul srem gwek. Man sap tame gun hup dei gwibik, hwena takensiblin hap man nairiblak.
⁴⁶ Dua-blaskam de wenya ki zep zen mae hap eol tetek gweꞌak, “Diki ee amaka nere mae onakon mam gweꞌan.”
⁴⁷ Hwena Yesus mes zeno mae mo eol gwenna insa tame gulku, zep walas tola zerhal zaka. Ki zep zere mo alp nakon zaun hup gubluka.
⁴⁸ Ki zep hwena gubiridaka, “Zini men zen de ano bose hap aha zisi mas gweblaꞌanka– sap anakare walas tol maesa, Ëe asa desa enlala gweblal, ‘Zen Asa mas gweblaꞌara.’ Hen zi de Asa mas gweblanna, Alap men Zen Asa zer soneka, Zen sa zini insa enlala gweblala, ‘Zen hen Asa mas gweblaꞌara.’ Zep zini men zen ebon mae onakon babu gwen zi mo kim lowehe gwenan, ki zen zen Alap mo nwenak emam gweꞌan.”
⁴⁹ Ki zep hwena Yohanis gubluka, “Bian, ee ama zisi hla lak– eno bosekam de dowalsa golealsa sone gwennak. Ëe zebe jalse eblak, sap zen nebon mae de ang gwe-gwen naka hom.”
⁵⁰ Yesus ki zep ding gulbluka, “Em bap jalse eblak, sap zini men zen emsa baes gwibiridan sremna, zen zen– ebon mae onak dep denaye.”
⁵¹ Mes golek de gweꞌak– Yesus dikim okamana ansa hli yun hup, dekam zep Yerusalem san dep golesek gweꞌanka. Zini sap ze tru-tru nul gweblaꞌak, “Yerusalem san bahem song gwen.” Hwena hom salbiridaka.
⁵² Dekam zep zini lup gul soneka– Zenaka de langna Samaria mo e san dep ngeirblin hap, zao de zisi de takensibiridan hap, “Nara wehe gola kon Yesussu zer inꞌinka?”
⁵³ Hwena ena iwe de zini Yesussu de zer irin hip man baes tak, sap zen mes anakan tawa neblak, “An Yerusalem san dep song gweꞌara.”
⁵⁴ Kirekam kim esak, Yakobus ne Yohanis ne ki zep enblaka, “Bian, em wehe dwam gweꞌara? – nen syauksu ngli nakon de ati gwezan hap abe gwibin– zao deka zini in ehwasdek.”
⁵⁵ Hwena Yesus dekam zep lero gwizimki, ki zep jal gwizimki.
⁵⁶ Dekam zep kon aha e san dep sek gwek.
⁵⁷ In kim nama goleten daꞌanka, zini ki zep Yesussu gublu zaka, “Bian, men desane ki te gweꞌanka, ee asa Emsa ang gweblanda gwer.”
⁵⁸ Ki zep ding gulbluka, “Gwenya witir zem ki. Hen mawana zol zem ki. Hwena ngatan zi mo lang nakore Zi Tanganna ano ni ta gwen gola hom.”
⁵⁹ Hwena ahanaka zep sap gubluka, “Em Asa ang gwebla.” Hwena zini in man ding gulbluka, “Bian, ee asa hendep. Ki ano bian de tinkim, nara molya dre nwanuka.”
⁶⁰ Yesus ki zep ding gulbluka, “Zen zi tokna dikire zi tok bose zik kang nulne gwek. Em hwena dekam ola ansa anakan gol halada, ‘Angkam Alap man nesa de irik ginkim kon gwisibir hanaꞌara.’”
⁶¹ Ahana hen zini ki zep Yesussu gublu zaka, “Bian, ee ama Emsa de ang gwe-gweblan hap dwam gweꞌan. Hwena nonol ere mo iye osan dep anik song gwek– aumwa olsa de hli yulzimdin hip.”
⁶² Ki zep ding gulbluka, “Zi de Alap mo nganak syalsa kon gwesibir hananna, hwena zen de lure san denaka lero gwesibir kini gwenna, zen hom dakastiꞌira– Alap mo irik ginnik de syalak de mas gwen hapye.”