Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma moi ge'ena Pomaoma-omasa ma Wangeka, 'o Yesus de 'awi do-domoteke 'o gandum ma bairino yaboa, de 'awi do-domoteke ya'utuku ma gandum. Ma gandum ge'ena kayapikiroka de ya'odomokau.

² 'O Farisioka yamuruo naga kayongosekau, "'Ido'oa so ngini niaparene nanga 'agama ma besesongo? Ngini koidadiwa niodiai koge'ena Pomaoma-omasa ma Wangeka!"

³ 'O Yesus wongose, "Ma raiokau niabacakau 'okia 'o Dautu wodiai gee ma 'orasi wimote-moteke yakisawini?

⁴ 'Una wowosama ma Jou wi Woaka de wa'ese 'o roti gee 'isisubakau ma Jo'oungu ma Dutuka de wa'odomo. Ge'enaka de ma roti ge'ena wakikula mita gee wimote-moteika. 'Ena momongo moteke to ngone nanga 'agama ma besesongoka, ka 'o 'imam duga 'idadi ya'odomo."

⁵ Ge'enaka de 'o Yesus kawongosekau, "Ngoi 'o Nyawa ma Ngowaka tokuasa tositatapu 'okia yadaene padiai Pomaoma-omasa ma Wangeka!"

⁶ Ma moi ge'ena Pomaoma-omasa ma Wangeka, 'o Yesus wodotoko 'o lo-lomu ma woaka. Ge'enaka dau wimoi wi giama ma songona 'isonge-songene.

⁷ 'O 'agamaka yodoto-dotoko de 'o Farisioka yamuruo naga yosinonu-nonu 'o Yesus wi sala la 'idadi wikalaki. So kawisilega dua Pomaoma-omasa ma Wangeka 'o nyawa wakisi'aiki bolo kokia.

⁸ Ma 'o Yesus wanako to 'ona manga singinaka, so kawongosekau wi giama 'isonge-songenika, "Nou, noma'okode nongoka ma bionoka!" De 'o nyawa gu'una woma'oko so ge'enakau waika.

⁹ Ge'enaka de 'o Yesus wosano 'o nyawa-nyawaka ge'enaka gee, "Moteke nanga 'agama, ka'ena 'idadi padiai Pomaoma-omasa ma Wangeka? Podiai ma owa bolo ma dorou? 'O nyawa pakisilaha bolo pakisitorou?"

¹⁰ 'O Yesus wakilega-lega 'ona yoodumika de kawongosekau wi giama 'isonge-songenika, "'Ani giama naboootika." So waboooto de 'ikuatokau.

¹¹ Ma 'o 'agamaka yodoto-dotoko de 'o Farisioka yakito'otasa ma sala, so yomaka'aturu 'okia salingou yodiai 'o Yesusika.

¹² Ma 'orasi ge'ena 'o Yesus wosau 'o gigiede ma ngale wolahidoa. Ge'enaka 'una 'o obiri moi wolahidoa ma Jo'oungu ma Dutude.

¹³ Gedagee 'ikinitaroka de wakikoki'asoko 'awi do-domoteke, de ge'ena 'onaka dau wakiiriki yamogiooko de modidi. Yamogiooko de modidi go'ona wakisironga 'o su-suloko. 'Ona ge'ena la:

¹⁴ 'O Simon (gee wisironga 'o Petrus) de ma dodoto 'o Andreas, 'o Yakobus de 'o Yohanes, 'o Filipus de 'o Bartolomeus,

¹⁵ 'o Matius de 'o Tomas, 'o Yakobus 'o Alfeus wi ngowaka, de 'o Simon 'o Zelot ma nyawa,

¹⁶ 'o Yudas 'o Yakobus wi ngowaka, de 'o Yudas Iskariot gee ma du'uruku woba-badingaka.

¹⁷ Ge'enaka de 'o Yesus de 'awi su-suloko go'ona yo'uti ge'ena ma gigieku daku. Gee yototaruku ma diaioka 'ena 'awi do-domoteke yoku-kudai yomalomuno wida-damaa, de mita 'o nyawa 'iregu-regu manga gudai yoboano 'iso de 'o Yudeakau ma daeraano, 'o Yerusalemuno, de 'o Tirus de 'o Sidon ma soa-soanino.

¹⁸ 'Ona yaino ma ngale yosigisene 'o Yesus wodotoko, de mita manga panyake 'i'ini-'inioka wosi'aiki. Godagee 'o tokata yakido-dongosamuku mita yaino de wakisilaha.

¹⁹ 'O nyawa 'iodumu yomau 'o Yesusika wi'ao sababu de ma 'ena 'o kuasa 'isupu 'awi roesino gee yakisi'aiki 'ona yoodumu.

²⁰ 'O Yesus wakidi-diriidi de wongose, "Ngaro ngini niosusa ma niosanangioka, sababu ngini ge'ena ma Jo'oungu ma Dutu 'awi kawasa!

²¹ Ngaro ma 'orasi ne'ena naga ngini nisawini, ma niosanangioka sababu ma Jo'oungu ma Dutu 'asa winikula 'okia naga niapa-paraluu 'iodumu. Ngaro ma 'orasi ne'ena ngini nio'ari, ma niosanangioka sababu ngini 'asa niomore-morene!

²² Niosanangioka ngini gee 'o nyawa nidu'uduku, konisidabinowa, nisiti-tingoono de nisigurubungu sababu ngini niomoteke de de ngoi 'o Nyawa ma Ngowaka!

²³ Niosi-singina! Ma sirasi to 'ona manga edete de manga dotumu yodiaiokau 'o nabii-nabiika koge'ena. Nako koge'ena 'idadi, ge'ena niomorene kaniosoda-soda sababu nia parasengi ma amoko 'idua-duangou 'o sorogaaka.

²⁴ Ma niotorouoka ngini gee niokaya-kaya; sababu ngini niamakekau 'o sanangi duga kane'ena ma 'orasi!

²⁵ Niotorouoka ngini gee ma 'orasi ne'ena naga nipunu-punusu; sababu ngini 'asa nisawini! Niotorouoka ngini gee ma 'orasi ne'ena naga nio'ie-'iete; sababu ngini 'asa niobalisa de nio'ari.

²⁶ Niotorouoka ngini, nako 'o nyawa 'iodumu nisiie-ie; sababu koge'enali to 'ona manga edete de manga dotumu ma sira 'o nabii yoelu-eluku yakisiie-ie."

²⁷ "Ma ngini gee ma 'orasi ne'ena nisigise-gisene ngoino, tinisibesesongo: Niakidora gee nisa-saturuu, de niakisimara'ai 'o nyawa nidu-du'uduku.

²⁸ Nioga'asoko ma Jo'oungu ma Dutu wakisibarakati 'o nyawa gee nidu-du'uduku nginika, de niakisilahidoa 'o nyawa gee manga singina 'itorou nginika.

²⁹ Nako 'o nyawa nisiti-tingoono nia gotoaka ma songonano yapoka, ge'ena niosimadaka yapoka ma songonanoli. Nako nia baju ya'ora, nia juba mita niokulaka.

³⁰ Nako 'o nyawa nia kianikia yoga'asoko, niokulaka. De nako nia kia sonaa ya'ora, 'uwa nioga'asoko niosigilioli.

³¹ Niodiai 'o nyawa 'ireguka, 'isoka gee ngini nioduaka 'o nyawa 'iregu yodiai nginika.

³² Nako ngini niakidora duga ka godagee nidora-dora nginika, 'ania parasengi 'okia? 'O nyawa yosowo-sowono mita yakidora 'o nyawa yakidora-dora 'onaka!

³³ De nako nia go-gasa yaowa duga ka gee 'o nyawa manga go-gasa yaowa-owa nginika, 'ania parasengi 'okia? 'O nyawa yosowo-sowono mita koge'ena!

³⁴ De nako ngini niakisibau 'o pipi duga ka gee ya'akunu yosoiki, 'ania parasengi 'okia? 'O nyawa yosowo-sowono mita 'o pipi yakisibau 'o nyawa yosowo-sowonika, deika yoga'asokoli kaimatero ma amoko!

³⁵ Salingou 'uwa koge'ena! Ma 'ena niakidora 'o nyawa gee nisa-saturuu de nia go-gasa yaowa 'onaka. Ngini salingou niakisibau 'ania kianikia de 'uwa niongano-nganono yosigilioli. Nako koge'ena ge'ena dua nia parasengi ma amoko de ngini 'asa niodadi ma Jo'oungu ma Dutu wokuru-kurutie wi ngowa-ngowaka. Sababu ma Jo'oungu ma Dutu 'awi singina yaowa 'o nyawaka gee koyanako-nakowa yo'amalaha de mita gee 'o dorou yodi-diaika.

³⁶ 'Ania Dea ma Jo'oungu ma Dutu 'una ge'ena wadora 'o nyawa, so ngini mita salingou niakidora 'o nyawa!"

³⁷ "'Uwa niakisisala 'o nyawa, la ngini mita ma Jo'oungu ma Dutu 'uwa winisisala. 'Uwa niakihukumu 'o nyawa, la ma Jo'oungu ma Dutu 'uwa winihukumu. 'Uwa niosi-singina 'o nyawa manga sala nginika, la ma Jo'oungu ma Dutu mita 'uwa wosi-singina to ngini nia sala.

³⁸ Ngini salingou nimadu-dukula 'o nyawaka la ngini mita 'asa ma Jo'oungu ma Dutu winikula. Ngini 'asa nimadamake 'o barakati posironga ma amoko gee nidutugakou 'idi-dibitunuku de 'idi-digiwiku sigado 'ipoa-poa. Sababu 'o du-duga gee kiaka ngini niapake niosituga 'o nyawaka, ma Jo'oungu ma Dutu mita 'asa wapake winisituga nginika."

³⁹ Ge'enaka de 'o Yesus wakidajarita 'o 'ade-'ade konee, "Nako 'o nyawa yopilo-piloko de yakituda kayopilo-pilokoli, ma raiokau yamididi go'ona dua yomasidootaka 'o sukonuku.

⁴⁰ Koi'iwa 'o do-domoteke 'ifoloi yobarija de manga guru. Ma 'o muri gee yosiduangokau yomadotoko, dua kayomatero de manga guru.

⁴¹ 'Ido'oa so niosidawanono nia 'esa moi manga ako ma geneo, 'ena momongo to ngini nia akoka 'iso 'o basagioni koniakalesanguwa!

⁴² Kokia 'idadi niongose nia 'esa moika, ''Esa moi, ino ta'aikia 'ani ako ma geneo gee,' 'ena momongo to nginioka 'iso 'o basagioni koniamakewa? Ee tei tabangeluku! 'Isira to nginiosi ma sirete nia akoka niosisupu 'o basagi ge'ena. La nimasimake 'itiaiokasi 'asa de 'idadi niosisupu nia 'esa moi manga ako ma geneo."

⁴³ "'O gota 'iga-garaibongo koi'iwa 'isowokino ma sowoko 'itorou. Koge'enali mita 'o gota koiga-garaibonguwa, koi'iwa 'isowokino ma sowoko 'isure-sure.

⁴⁴ 'O gota 'o utu 'isinoimi posikanako ka ma sowokoka. 'O 'ubutu 'ido-dodowoko koma'iwa 'isowokino 'o 'ara ma sowoko. De 'o sisika koma'iwa 'isowokino 'o 'anggur ma sowoko.

⁴⁵ Koge'enali mita 'o nyawa ma owa, yosisupu 'okia sonaa yaowa-owa sababu manga singina ma dodaka doka yaowa-owa. De 'o nyawa ma dorou yosisupu 'okia sonaa 'ito-torou sababu manga singina ma dodaka doka ka 'o dorou. Sababu 'okia naga 'isupu 'o 'urude ge'ena 'ibaoro 'o singinano."

⁴⁶ "Ma faedaa koi'iwa ngini niongose 'ato ngoi ne'ena to ngini nia Jou, nako ngini koniosingounuwa 'okia naga gee tosidemokau.

⁴⁷ 'O nyawa gee yoboa ngoino de yosigisene 'ai demo ma de yodomoteke, 'ona ge'ena takisitero 'isoka nago'ona?

⁴⁸ 'Ona 'isoka 'o nyawa wimoi gee wi woa wosigoko. 'Isira 'o tonaka wapaiti wakuru-kurutuku, 'asa de ma fandasi wodiai dau 'o teto ma dekude. Gee yodungu'uisi ma kaigiwi ma ko'uwa sababu 'o fandasi 'ikua-kuata ma dekude.

⁴⁹ Ma 'o nyawa gee yo'isenoka 'ai demo ma koyodomotekuwa, ge'ena 'isoka wimoi wi woa wosigoko koi'iwaka ma fandasi. Gee yodungu'uisi de ma woa ge'ena yarubaka de posironga 'ipiakoroka!"

Lukas

Video Lukas 6

Ikuti Kami:

KONTAK | PARTISIPASI | DONASI