Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Di sada hatiha dompak jongjong Jesus di topi ni Dano Genesaret marsosak do bahat halak laho manangihon jamita na sian Debata.

² Diida Jesus ma dua parau di topi ni dano i. Madung mandarat nampuna parau i paiaskon jala ni halahi. (Sada jala dohot parau panangkup ihan)

³ Masuk ma Jesus tu sada parau, i ma parau ni si Simon, laing disuru Ia ma si Simon mangonjar parau i dumao saotik sian topi ni dano i. Juguk ma Jesus di bagasan parau i, gabe sian i ma diajari Ia halak na bahat i.

⁴ Dung sidung Ia mandok hata didok Ia ma tu si Simon, "Oban ma paraumon tu inganan na umbagas jana sampakkon ma jalami manangkup ihan."

⁵ "Saborngin maningting ma hami marloja-loja, umpe bagi aha dapot hami, tapi hara ni hataMi na marsuru, denggan ma, husampakkon pe mangulahi jala i," ning si Simon.

⁶ Dung disampakkon ia jala i dapot halahi ma na lobi bahat ihan, jabat masibak jala ni halahi i.

⁷ Gabe mangido tolong noma halahi hara ni i tu angka dongan ni halahi na di parau na asing i. Ro ma dongan ni halahi i, dipamasuk halahi ma tu parau na dua i lopus bubung jabat giot bonom parau i dua-dua.

⁸ Dung diida si Simon songon i, marsomba ma ia di jolo ni Jesus mandok hata, "Ulang donok Ho tu au, Tuhan! Pardosa do au!" ning ia.

⁹ Homang ma si Simon dohot halak na rap dohot Ia marnida ihan songon i bahatna dapot halahi.

¹⁰ Laing songon i muse ma angka dongan ni si Simon, i ma si Jakobus dohot si Johannes dakdanak ni si Zebedeus. Didok Jesus ma tu si Simon, "Ulang ho mabiar! Mamungka saonnari gabe sijala jolma noma ho."

¹¹ Ditarik halahi ma parau i tu topi, ditinggalkon halahi ma i sude laho mangihutkon Jesus.

¹² Di sada hatiha, dompak di kota Jesus, adong ma disi sada bayo, sap sude pamatangna i hona huliton. Di na niidania Jesus, ro ma ia manungkap tu joloNia marsomba-somba mangido. Didok ia, "Sugari ra Tuan i tarpamalum Tuan i do au!"

¹³ "Ra do Au: Antong malum ma ho!" ning Jesus manyurduhon tanganNia manjama bayo i. Laing di na santongkin i mago ma manigor panyakit huliton i sian bayo i.

¹⁴ Dung i dilarang Jesus ma bayo i anso ulang dicaritohon ia taringot tusi sanga na tu ise pe. Torus tu malim do disuru Jesus bayo i. "Pangido ma anso dipareso malim ho, dung i kehe ma ho pasahatkon haul hombar tu na nitontuhon ni si Musa laho patandahon tu halak na bahat, bahaso na dung malum ho."

¹⁵ Tapi mur tarbarita ma taringot tu Jesus, bahat muse ma halak marroan manangihon Ia, songon i muse na mangido hamalumon sian nyae ni halahi be.

¹⁶ Dung i kehe ma Jesus tu inganan na buni giot martangiang.

¹⁷ Di sada hatiha, dompak mangajari Jesus, ro ma halak Parise dohot angka Siboto Surat juguk disi. Sian angka kota na di Galilea, Judea dohot Jerusalem do halahi ro. Adong do kuaso ni Tuhan Jesus laho pamalumkon angka na marnyae.

¹⁸ Jadi ro ma hatiha i halak maroban sada bayo na pangpangon payak di ginjang ni podomanna. Diusahahon halahi ma maroban na pangpangon i tu bagasan bagas i anso tarpayakkon nian di jolo ni Jesus.

¹⁹ Tapi hara ni bahat ni halak disi, gabe nada taroban halahi bayo i tu bagasan. Jadi dioban halahi ma ia tu tarup ni bagas i. Diluak halahi ma tarup i, sian i ma ditantan halahi ia rap dohot podomanna i tu jolo ni Jesus di tonga-tonga ni halak na bahat i.

²⁰ Marnida godang ni haporsayaan ni halahi, didok Jesus ma tu bayo i, "Madung disesa dosami, dongan!"

²¹ Mamungka ma mangkatai na sada tu na asing angka Siboto Surat dohot angka Parise i, ninna ma, "Ise dehe na mangincahi Debata on? Ise ma he lakna na tarbaen manyesa dosa ia so hum Debata?"

²² Diboto Jesus do na di bagasan roha ni halahi. Gabe ning Ia ma, "Aha dehe dipikiri hamu di bagasan rohamunu?

²³ Dia do ummomo dohonon, 'Madung nisesa dosami', sanga, 'Jongjong ma ho jana mardalan!'?

²⁴ Tapi anso diboto hamu, na markuaso do Anak Ni Jolma i di tano on manyesa angka dosa." Dung i didok ma tu na pangpang i, "Au mandok tu ho, jongjong ma ho, oban ma podomanmi, mulak ma ho tu bagasmu!"

²⁵ Manigor jongjong ma bayo i di jolo ni halahi sude, diangkat ia podomannia i, mulak ma ia lalu mamuji-muji Debata.

²⁶ Homang sajo ma halahi sude hara ni mogana. Mardongan biar ni roha didok halahi ma, "Hahomangan na tutu situtu ma na taida sadari on!"

²⁷ Dung i kehe ma Jesus, diida Ia ma sada halak sitagi pajak na margoar si Levi na juguk di parbeoan. Didok Jesus ma tusia, "Ihutkon ma Au."

²⁸ Jongjong ma si Levi manadingkon sudena i, torus diihutkon ia ma Jesus.

²⁹ Dung i dipatupa si Levi ma pesta di bagasnia hara ni Jesus. Bahat do sitagi pajak songon i dohot halak na asing mangan rap dohot halahi.

³⁰ Jadi mungut-ungut ma angka halak Parise dohot angka Siboto Surat, gabe didok halahi ma tu angka anak sisean ni Jesus, "Biasi rap mangan minum hamu sudena dohot sitagi-pajak dohot angka na nietong ni halak jolma na so ture?"

³¹ Dialusi Jesus ma, "Nada diporluhon halak na torkis pangubati; hum halak na marnyae do.

³² Nada giot mamiohon halak na tigor umaben na ro Au, tapi mamiohon si pardosa do anso di pauba rohana."

³³ Didok halahi ma tu Jesus, "Anggo anak sisean si Johannes jotjot do puaso dohot martangiang, songon i muse angka sisean ni Parise. Hape angka anak siseanMu mangan minum do halahi."

³⁴ Dialusi Jesus ma, "Tarbaen ma he puaso angka tamu di horja ni na marbagas salolot rap dohot halahi bayo pangoli i?

³⁵ Tapi dapot do hatiha ni i, dibuat bayo pangoli i sian tonga-tonga ni halahi. Anggo disi baru ma puaso halahi."

³⁶ Dung i dipaboa Jesus ma umpama on tu halahi, "Nada adong sada halak pe na ra mangaribahi abit na imbaru giot mandungkapkonsa tu abit na dung buruk, muda binaen songon i sego ma abit na imbaru i, angke nada mardomu pandungkap na imbaru dohot abit na buruk i.

³⁷ Songon i muse do, nada adong halak na mangusehon anggur na imbaru tu bobak na buruk, angke muda songon i sabur ma anggur i boti sego ingananna i.

³⁸ Anggo anggur na baru angkon di inganan na imbaru do nisimpan!

³⁹ Nada adong muse halak na manigor manginum anggur na baru dung jolo diinum ia anggur na honok. Harana dokkononnia ma, 'Tumabo do na honok i.'"

Lukas

Video Lukas 5

Ikuti Kami:

KONTAK | PARTISIPASI | DONASI