Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Deside Isa tekuasein siq Roh Suci lẽq waktu Ie bilin Kokoq Yordan terus Ie tepimpin siq Roh Suci nike ojok padang gurun.

² Lẽq derike Deside Isa tecobe siq Belis petang dase jelo ngonẽqne. Sengonẽq nike, Ie nẽnten daharang napi-napi. Beterus Ie jari seduk.

³ Belis matur lẽq Deside Isa, "Lamun Pelungguh Bije saq asalne lẽman Allah, manikang batu niki jari ruti."

⁴ Jawab Deside Isa, "Araq tetulis lẽq dalem Kitab Suci bahwe: 'Manusie ndẽqne cume idup lẽman ruti doang.'"

⁵ Terus Belis jauq Deside Isa ojok taoq saq atas, dait araq sepengkejep doang Belis petitoqang Deside Isa selapuq kerajaan lẽq dunie.

⁶ Beterus Belis matur tipaq Deside Isa, "Selapuq kekuasean dait kesugihan niki gen tiang aturin tipaq Pelungguh, sẽngaq selapuqne sampun teserahang ojok tiang dait tiang bau ngebẽng lẽq sai juaq saq tiang mẽlẽ bẽng.

⁷ Selapuqne nike gen jari dowẽn Pelungguh, lamun Pelungguh sujut nyembah tiang."

⁸ Jawab Deside Isa, "Lẽq dalem Kitab Suci araq tetulis, 'Pade sembah Allah, Tuhan side dait tipaq Ie doang side beribadah.'"

⁹ Beterus Belis jauq Deside Isa ojok Yerusalem dait toloq-Ne lẽq atas buwung Gedẽng Allah. Belis matur lẽq Deside Isa, "Lamun Pelungguh Bije saq asalne lẽman Allah, cobaq Pelungguh nimproh lẽman deriki.

¹⁰ Sẽngaq araq tetulis lẽq dalem Kitab Suci, 'Allah gen mrẽntahang malaẽkat-malaẽkat-Ne jari jagaq Pelungguh.'

¹¹ Dait ẽndah, 'Malaẽkat-malaẽkat gen sangklap Pelungguh kadu ime ie pade, adẽq cokor Pelungguh nẽnten kedantuk lẽq batu.'"

¹² Jawab Deside Isa, "Lẽq dalem Kitab Suci tetulis, 'Ndaq Side cobe Allah, Tuhan side!'"

¹³ Sesampun Belis engkah cobe Deside Isa kadu segale macem care, ie bilin Deside Isa dait ngantih waktu saq tepat.

¹⁴ Siq kuase Roh Allah Deside Isa tulak ojok Galilea. Berite mengenai Deside Isa nyebar ojok selapuq daẽrah nike.

¹⁵ Deside Isa ngajahang lẽq balẽ-balẽ ibadah, dait selapuq dengan muji Ie.

¹⁶ Deside Isa lumbar ẽndah ojok Nazaret, taoq Ie tebelẽqang. Lẽq jelo Sabat maraq biasene Ie lumbar ojok balẽ ibadah. Deside Isa nganjeng jari bace Kitab Suci,

¹⁷ terus Ie teaturin kitab Nabi Yesaya. Deside Isa bukaq gulungan kitab nike, terus dait-Ne ayat niki,

¹⁸ "Roh Tuhan araq lẽq Tiang, sẽngaq Allah sampun nyuciang dait ngesahang Tiang jari beriteang Kabar Solah tipaq dengan miskin. Allah ngutus Tiang jari ngumumang tipaq dengan tawanan bahwe ie pade gen tebẽbasang dait tipaq dengan bute bahwe ie pade gen tao nyerioq malik; jari bẽbasang dengan saq tejajah,

¹⁹ jari beriteang taun rahmat Tuhan sampun rauh."

²⁰ Deside Isa gulung malik kitab nike, dait tulakang-Ne ojok petugas, beterus melinggih. Selapuq dengan lẽq dalem balẽ ibadah nike perhatiang Ie.

²¹ Terus Deside Isa mulai bebaos lẽq ie pade maraq niki, "Lẽq jelo niki, ayat-ayat Kitab Suci niki sampun telaksane sewaktu side pade dengahang ayat-ayat nike."

²² Selapuq saq Ie ucapang bagus gati, sehingge ie pade takjub dait muji Ie. Ie pade bebase, "Tekan Ie bije Yusup?"

²³ Make Deside Isa bemanik lẽq ie pade, "Pasti side pade gen kadu sesenggak niki lẽq Tiang, 'Tabib, selahang diriq-De mẽsaq. Dait silaq piaq lẽq kampung asal Pelungguh mẽsaq keajaipan saq tiang pade dengah Pelungguh piaq lẽq Kapernaum!'"

²⁴ Deside Isa bemanik malik, "Tiang badaq side, setetune ndẽq araq nabi saq tehormatin lẽq kampung asalne mẽsaq.

²⁵ Laguq dengahang: lẽq jaman Nabi Elia, sewaktu ndẽq turun ujan telu taun enem bulan ngonẽqne, araq musibah kelapahan lẽq selapuq negeri. Lẽq waktu nike luwẽq bebalu lẽq Israel.

²⁶ Timaq maraq nike Allah nẽnten ngutus Nabi Elia lumbar ojok salaq sopoq bebalu-bebalu nike laguq cume tipaq sopoq bebalu lẽq Sarpat lẽq daẽrah Sidon.

²⁷ Maraq nike ẽndah lẽq jaman Nabi Elisa, araq luwẽq dengan saq sakit kusta lẽq Israel, laguq dengan-dengan nike ndẽq araq saq teselahang, kecuali Naaman dengan Siria nike."

²⁸ Selapuq dengan lẽq balẽ ibadah nike sili gati sewaktu dengah hal nike.

²⁹ Ie pade nganjeng beterus tundungne Deside Isa ojok luah kote dait jauqne Deside Isa ojok tembẽrẽng gunung, saq araq lẽq luah kote nike. Ie pade beniat jelek Deside Isa ojok dalem jurang.

³⁰ Laguq Deside Isa nerobos dengan luwẽq nike, terus lumbar.

³¹ Beterus Deside Isa lumbar ojok kote Kapernaum lẽq Galilea. Lẽq derike Deside Isa ngajahang dengan-dengan lẽq jelo Sabat.

³² Ie pade takjub dengahang pengajahan Deside Isa, sẽngaq ucapan-ucapan-Ne penoq kuase.

³³ Lẽq dalem balẽ ibadah nike, araq sopoq dengan saq tekuasein siq roh jahat. Dengan nike bekuih-kuih siq suare saq keras,

³⁴ "Deside Isa, dengan Nazaret, napi saq gen Pelungguh piaq lẽq tiang pade? Napi Pelungguh rauh jari binaseang tiang pade? Tiang nenaoq sai setetune Pelungguh: Pelungguh Saq Suci lẽman Allah!"

³⁵ Laguq Deside Isa semprak roh jahat nike, "Tedoq sugul lẽman dengan niki!" Beterus roh jahat nike timpak dengan nike lẽq julu ie pade selapuq, terus sugul lẽman dengan nike dait ndẽq nyakitin ie.

³⁶ Selapuq dengan bengaq, dait bebase sopoq kance saq lain, "Luar biase manik-Ne. Siq wibawe dait kuase, Ie mrẽntahang roh-roh jahat sugul, dait ie pade ẽndah sugul!"

³⁷ Make kabar mengenai Deside Isa nyebar lẽq selapuq wilayah nike.

³⁸ Deside Isa bilin balẽ ibadah nike, beterus lumbar ojok gedẽng Simon. Mentoaq nine Simon kenyeke sakit telih panas, dait dengan-dengan tunas lẽq Deside Isa adẽq nulung ie.

³⁹ Beterus Deside Isa nganjeng lẽq dẽkẽt mentoaq Simon nike, terus Ie bemanik siq suare saq belẽq jari nyelahang penyakit telih panas nike. Penyakit nike telang, dait mentoaq Simon langsung ures dait ngelayanin ie pade.

⁴⁰ Sewaktu serep jelo, selapuq dengan pade jauq tipaq Deside Isa semeton-semetonne saq ngidap macem-macem penyakit. Deside Isa noloq gading-Ne lẽq atas ie pade sopoq-sopoq dait selahang ie pade.

⁴¹ Roh-roh jahat ẽndah sugul lẽman luwẽq dengan, sambil bekuih-kuih, "Pelungguh Bije saq asalne lẽman Allah!" Laguq Deside Isa semprak ie pade dait nẽnten ngijinang ie pade ngeraos, sẽngaq ie pade nenaoq bahwe Deside Isa nike Almasih.

⁴² Sewaktu mulai tiwoq jelo, Deside Isa bilin kote nike beterus lumbar ojok sopoq taoq saq sepi. Dengan-dengan mulai boyaq Ie, terus waktu ie pade ndait Deside Isa, ie pade berusahe adẽq Deside Isa sampunang bilin ie pade.

⁴³ Laguq Deside Isa bemanik, "Kabar Solah mengenai Kerajaan Allah harus Tiang sampẽang ẽndah lẽq kote-kote lain, sẽngaq jari hal nike Allah ngutus Tiang ojok dunie."

⁴⁴ Keranaq nike Deside Isa nyampẽang Kabar Solah lẽman Allah lẽq selapuq balẽ-balẽ ibadah lẽq Yudea.

Lukas

Video Lukas 4

Ikuti Kami:

KONTAK | PARTISIPASI | DONASI