¹ Dekam yakla yala Paskanak dep man golek de gweꞌak– Alap men dekam Mesir kon Israelsa gwis gwe sonekake. Paska yaklanak kim zauk, zen dekam zep hen ekon gwesik hanak– aha-ere minggukam de ragi sremkam rotisa tru ta gwen naye.
² Dekam Alap mo golak de syal tan zi mo mam-mamna Musa mo ol tawa ta gwibin zi niban, zen hwena aningkim Yesussu dikim tan hap orasa deblaꞌak. Hwena zi beyasa nairibiridak, zep dekam balk da srem gwek.
³ Dekam zep ena Kariot walya Yudas Baksa dowal mo kigina ing gwe heblaka. Zen sap zere hon de dua-blaskam ang ta gwen wenyik mo ahana.
⁴ Zen ki zep song gweka– Alap mo golak de syal tan wenyik mo nol-nola ban, hen zewe de jana nabare zi mo mam-mam naban de olsa anakare hap ziaha-en gun hup, “Ëe banakan asa ebe mae hap zao de balk tan hap zertreizim?”
⁵ Zen man tangan sam neisiblik, dekam zep nenblak, “Te-alasa asa ep erblal.”
⁶ Dekam zep ding gulzimki, “Ëe asa orana teblal– dekam de sowekam ebe mae hap zertreizimdin hip.”
⁷ Rotisa de ragi mas gun sremkam tru tan hap de mingguna iwe kim lwa seꞌak– yaklana men dekam Paskanak dep de tembane yawalak dep domba zahona Alap hap blom da gwibir-blikke,
⁸ Yesus dekam zep hen Petrus ne Yohanis neka guzimki, “Em song e– Paskanak dep de tembane yawalsa eka hen nep hamal ul.”
⁹ Ki zep lakensiblika, “Endawe asa hamal ul?”
¹⁰ Ki zep ding gulzimki, “Em kime ena iwe liꞌinka, dekam esa zini hla la sonera– kama ngatdarakkam de weya blome gwirenhan naban. Zen desa em ertro kinin– hendep gola men zao de tik, em hen zao lil.
¹¹ Zao gol bi naka enbla, ‘Bian Yesus man emsa takensiblila, “Ëe teksonna enda zao asa ere hon de ang ta gwen wenya ban Paskanak de tembanena zitwenblal?”’
¹² Zen sa ebe nikip gulk de tekson yawalsa zertreizimdi. Komal tum maena sowe henna. Zen zao hamal ul guk.”
¹³ Ki zep hendep song eka, zao zep hendep oltoweka– men kirekam Yesus guzimkiye. Zewe zep hendep tembanena hamal ul guku.
¹⁴ Kim kam-en gwek, Yesus dekam zep dua-blaskam de wenya ban Paskanak dep de tembanena insa zitwenblaꞌanka.
¹⁵ Ki zep ze gubiridaka, “Ëe ama tangan dwam gwe-gwek– Paska tembanena ansa de eban mae zitwenblan hapye, Ëe de nama karek yawala insa goltowen sremnak.
¹⁶ Sap Ëe ama emsa gubiridaꞌan: Ëe na-en molye etan auhu-kamanak Paska tembanena twinbik. Hwena Alap kim de irik ginkim kon gwesibir hanaꞌanka, zen diki dekam asa eiwa tangankam de Paska tembanena twinbir.”
¹⁷ Yesus ki zep anggur ho nabare mokna zerka, deban Alap hap dawemsa golblaka. Zao zep gubiridaka, “An desa apdekam otdebik.
¹⁸ Ëe ama emsa gubiridaꞌan: Ëe angkam na-en molye anakare anggur hona etan otdek. Hwena Alap mo irik ginnik kim de hataꞌak, zen diki dekam asa etan ziotdebir.”
¹⁹ Rotina ki zep hen gul ineka. Ki zep hen rotina in hap Alap hap dawemna golblaka, ki zep ahap gul guku. Desa zep anakare ola ban kap tazimki, “An ano timni– mensae ebe mae hap sosok gulzimꞌinke. An kirekam em ano timbwanak syal gwe-gwibin– Asa dikim enlala gwe-gweblan hapye.”
²⁰ Kim tembane tasik, ki zep anggur ho mokna etan anakare ola ban zerzimki, “An ano kala zen. Zen sa ano tim nikon wet sol– Alap mo zi niban de ol ziaha-en gun esesa dikim sul sonen hapye.
²¹ Hwena Ëe ama emsa gubiridaꞌan: Zini men zen Asa dikim ze balk tan hap zertreizimꞌira, zen hen awe nikinꞌira.
²² Ngatan zi mo lang nakore Zi Tanganna Ëe asa til– men kirekam ki Alap Asa gublukake. Hwena kwasang tol, zini men zen Asa dikim ze balk tan hap zertreizimꞌira, zen karekna mam tangan wenyaka sa goltowera!”
²³ Ki zep ze zenaka anakan dakensibirida nasenꞌak, “Nebon mae onakon in nara sa ki kirekam gweblala?”
²⁴ Hwena dekam zep dua-blaskam de wenya in eol gweꞌak– mae hap, “Yesus de irik giꞌinka, diki ee amaka nebon mae onakon teipsiꞌin.”
²⁵ Ki zep ze gubiridaka, “Alapsa de tame tan srem lang-langnak men zen teipsin-teipsinkim teinikin gwenan, zen man zere kore naka jap nul sonenda gwenan. Hen zen man anakan de blikip gwesibirida gwen hap edwam gwe-gwenan, ‘Bian, em in asa de sam gulsun hup de zi.’
²⁶ Hwena em zeno mae mo kim bahem. Ebon mae onakon men zen teipsin hip dwam gweꞌara, zen diki walas betek mo kim zen gwen. Hen men zen mam gwen hap dwam gweꞌara, zen diki tingare zi mo babu gwen zi makan zen gwen.
²⁷ Ema tim ul gwenan, ‘Mejanak de tembane gwen zini, zen mamna. Hwena men zen zebe hap tembanena hamal nul gweblanan, zen betekna.’ Auhu-kamanak, eiwa, mejanak de nikirin zini zen mamna. Hwena Ëe kirekam de mam gwen hap home hatazak. Ëe hwena babu gwen zi mo kim de mas gwibiridan habe hatazak. Zep em hen ano kim em lowehe gwen.
²⁸ “Em mese Asa ergwenda gwek hen kara landa gwek– banakare karek maesa de goltowe gwennak.
²⁹ Zep men kirekam Bian abe hap golblaka, zeno alp nakon de irik gin hip, Ëe hen kirekam asa ebe mae hap golzim– em de hen ano alp nakon irik gin hip denaye.
³⁰ Em dekam ano alp nakon esa teinikin– ano irik gin kon gwisibir hanan tembane yawalakye. Hen em dekam esa ere mae hap de dua-blaskam de komal tumnak teinikin– dekon de dua-blaskam de Israel Bak onakore zi aususa irik gin hipye.”
³¹ Yesus ki zep Simonsa gubluka, “Simon, Simon, dawem! Emki Asa sane tan. Dowal mo kigina mes emsa de serkam akasibiridan hap Alapsa abe taka.
³² Hwena Simon, Ëe mese ebe en hap Alapsa abe tal– eno Asa de taibliblan dikim topse gwe srem gwen hapye. Em kime Abon osan dep etan lwa haꞌan zaka, ere mo wal bose walya dekam tatete tabir.”
³³ Petrus ki zep ding gulbluka, “Bian, ee mese tangan hohle gwenan– Eban de bwi san song en hap, hendep Emsa de zerzaunnuk de hwena tin hipye.”
³⁴ Ki zep ding gulbluka, “Petrus, Ëe ama emsa gubluꞌan: Namen ayang de gun sremnak, em esa anakan de Asa zabeblanna dan-ahan soblala, ‘Zini in ee home tame taꞌan.’”
³⁵ Ki zep takensibiridaka, “Ëe kime orep emsa lup gul sonek, hon hen te-ala sremkam de sek gwen hap, timnik de alala tan en naban, dekam san ha ema etahalha gwek?” Ki zep ding nulblik, “Ëe home etahalha gwek.”
³⁶ Dekam zep etan gubiridaka, “Hwena angkam, eno mae mo hon hen te-ala de lwanna, emki kap tan. Eno nebok de lwan sremna, emki tahan bajusa te-ala hap lirak tabin– te-alana dekam de neboksa lop tan hap. Sap em Abone ang ta gwek, emsa hen zep sa jal neibiridal.
³⁷ Sap Ëe ama emsa gubiridaꞌan: Men zen Alap mo olak abe hap dena lwak, ‘Zi jal-jal makan sa neblal’– zen kitak nabakam sa ki jower.”
³⁸ Ki zep ding nulblik, “Bian, emki aken. Awe nebokna dan.” Ki zep ding gulzimki, “Sya. Otan bahem egun.”
³⁹ Yesus ki zep Yerusalem kon zaitun tra nabare kwatap tek san dep golesek gweka– men kirekam Zena golegwe gwekake.
⁴⁰ Kim goleyaing gwe seka, zao zep gubiridaka, “Alapsa e-en e-enkam abe la tinek. Kareknak ema altilink.”
⁴¹ Zena kim engka en zebon mae onakon langa gwe halka, zao zep boklena kom soka, dekon zep Alapsa gu sone gweblaꞌanka,
⁴² “Bian, Em de dwam gwenkam, Abon onakon langa gulsuk– karek yala in zen Abon onak dep golek de gweꞌan zalye. Hwena ano dwam gwibin sin bap zen lwan. Diki ere mo dwam gwibin sin zen lwan.” [
⁴³ Alap mo dam taha nakore zini ki zep ze hata zaka, zao zep sosonna golblaka.
⁴⁴ Hwena enlalana man serkam tangan dowebla hanaka, dekam zep etan enlala zon tasiblin naban ola gu soneblaꞌanka, hendep irse gwenna kal makare nik wet soblak.]
⁴⁵ Alapsa de abe ta gwenna kim hya gwesiki, ki zep dan-ahare zini in osan dep lwahal zaka. Hwena ni truwennak zep hlauludaꞌan zaka. Embwan ze mamkam hlauludak, zep truweꞌak.
⁴⁶ Zao zep gubirida zaka, “Em bap nini truwer. Em luk tan. Kareknak dikim altirin srem hap em Alapsa abe tan.”
⁴⁷ Yesus kim nama ola tonꞌanka, dua-blaskam de zini in mo ahana, Yudas, ki zep zi beyam-bya naban goleyaing gweꞌan zaka. 52bAhakon Alap mo golak de syal tan zi mo mam-mamna, hen zao de jana nabare zini, hen Yahudi mo nol-nola ban. 47bYudas ki zep ze Yesussu babang taꞌan zaka.
⁴⁸ Yesus ki zep hwena gubluka, “Yudas, em san babang tankame ngatan zi mo lang nakore Zi Tanganna Asa zerguꞌura?”
⁴⁹ Hwena seblaskam de zere hon ang ta gwen wenya in, kim ze kirekam hla nuꞌik, dekam zep dakensiblik, “Bian, san angkam nebokkam nen tobe gwen?”
⁵⁰ Hwena ahana dekam zep nebokna mol ineka, dekam zep Alap mo golak de teipsin tangan zi nik de babu gwe-gwen zini sap zip soka. Hwena dam san de ing ala en naka zep blansibli kinika.
⁵¹ Hwena Yesus ki zep jalse gweblaka, “Bahem! In sya!” Zena ki zep ing alana insa dawem soblan hap towanzim-blika, dekam zep hendep dawem neblak.
⁵² Ki zep hwena in zen Zenaka de balk tan hap yaing gwezak gubiridaka, “Em san Asa jal zisie hla lal, zebe nebok te tek teiredan naban yaing gwenan zalye?
⁵³ Ëe men yakla jamkam Alap mo golak emsa tawa ta gwibik! Dekam ba habe ze Asa balk la srem gwek? Hwena angkam lang kawesinnik awe ebe mae hap man dakastilzimꞌin, sap dowal mo kigi mo enlala kawesin emsa tri tasibiꞌira.”
⁵⁴ Ki zep hendep balk dahak– Alap mo golak de syal tan zi mo teipsin zi mo gol san dep. Petrus lun sap-sap gwen daꞌanka.
⁵⁵ Dekam zewe de syal ta gwen wenya gol temnak syauknu bla dasiꞌik– desa de tuwirin hip. Petrus zao zep hen nikinꞌin zaka.
⁵⁶ Hwena zewe de babu gwe-gwen we zep syauk ngatannak de nikirinnik tame tazak. Zao zep lalak tasin hip karatda taꞌak, ki zep ze hendep gubluk, “Zini an deban apdenak e gweka!”
⁵⁷ Hwena Petrus ki zep kon ding gulbirki, “Zini in ee home mae tame taꞌan.”
⁵⁸ Hom holo gweꞌak, ki zep etan ahanik tame ta zaka, zao zep gublu zaka, “Em an zen ahana! – desa de ang gwe-gweblan zi niye.” Petrus ki zep ding gulbluka, “Ëe an zen hom.”
⁵⁹ Yakla nwena san ha aha-en tamanka, dekam zep ahanik ol drakkam gu ane gweꞌanka, “Eiwa, zini an desa de ang gwe-gweblanna, sap zen an hen Galilea wal!”
⁶⁰ Petrus ki zep ding gulbluka, “Ëe home tame guꞌun– in zebe ki gu gweꞌaraye!” Hendep in kim nama tonꞌanka, ayangna ki zep gu aneka.
⁶¹ Yesus ki zep Petrussu de hla tan hap lero gweblaka. Petrus dekam zep hwena etan enlala gweka– mensa anakan gu-gublukaye, “Namen ayang de gun sremnak, em dan-ahan sonkam esa Asa zabeblala.”
⁶² Dekam zep hendep wet soka. Gosa zep kon yusyustin niban gwe song gweka.
⁶³ Zini in zen Yesussu kara daꞌak, man swre da gweꞌak hen dangole gweꞌak.
⁶⁴ Nwe hereblan naka zep dakensik gweblaꞌak, “Eme eiwa Alap mo zer sonen zi gweꞌanam, emaka anakan asa gubirida gweꞌara, ‘Zi bosena zen asa lek tyanda.’”
⁶⁵ Etan kirekam-kirekam ol lamang naban swre da gweꞌak.
⁶⁶ Kim litiꞌik, Yahudi mo nol-nola, Alap mo golak de syal tan zi mo mam-mamna, hen Musa mo ol tawa ta gwibin zini dekam zep tagal gwesik, ki zep hwena Yesussu zebon mae onak dep ner halzak.
⁶⁷ Ki zep ze nenblak, “Dekam asa gubirida: Em an san ha eiwa Alap mo Dam Tasinni? – Israelsa de ngaya tabin hip Dena.” Ki zep ding gulzimki, “Ëe emsa gubiridaꞌak, em molye etaiblik.
⁶⁸ Hen Ëe emsa takensibiridaꞌak, em molye ap ding ulblik.
⁶⁹ Hwena molya holo gwek, ngatan zi mo lang nakore Zi Tanganna Ëe dekam asa Soson Zini Alap mo dam taha nakon nikin.”
⁷⁰ Ki zep dakensiblik, “Ki, em san Alap mo Tane?” Ki zep ding gulzimki, “In eiwa denakae egunun.”
⁷¹ Dekam zep eguk, “Nen ba hap de ahasa takensibiridan hap? Nen mes em-am kitak Alapsa de lamang tannak asalblanan!”