¹ Aha yaklakam kim Yesus Alap mo golak tawa tabiꞌinka, dekam zep hen Alap mo golak de syal ta gwen zi mo mam-mamna, Musa mo olsa de tawa ta gwibin wenya, hen Yahudi mo nol-nola ban yaing gwezak.
² Zao zep dakensiblik, “Emsa an nara gubluka, hen nara emsa tri tase gweꞌara? – dekam de kirekam-kirekamna insa syal gwe-gwibin hipye.”
³ Ki zep ding gulzimki, “Ki Ëe asa hen nonol emsa takensibiridal: Baptis ta gwibin zini Yohanis Swesa san ha Alap tri ta seka? San ha zen zere en mo sosonkam ki syal gwe-gweka? Eme nonol ap ding ulbliꞌak, ki Ëe asa hen emsa gubiridal, ‘Asa Zen tri ta seꞌara, zebe kirekam syal gwe-gweꞌan.’”
⁴ (20:3)
⁵ Dekam zep ze-en anakan donbiꞌik, “Bejen nen anakan ding gulblun, ‘Alap tri ta seka,’ ki hwena zen sa nesa gubiridala, ‘Ki em ba habe desa laiblibla srem gwek?’
⁶ Hwena anakane ding ulbliꞌak, ‘Yohanis zen zere en mo sosonkam syal gweka,’ ki hwena zi trana an sa kasokam nesa niribiridal, sap zen Yohanissi mes-am anakan daibliblak, ‘Zen eiwa Alap mo olsa ayang gul gwizimki.’”
⁷ Anakan zep hendep ding nulblik, “Ëe home dam ulsuꞌun, ‘Yohanissi zen tri tase gweka.’”
⁸ Ki zep hwena ding gulzimki, “Zep Ëe hen molye emsa gubiridak, ‘Ëe an zeno syalsae gol gweꞌan, hen Zen Asa tri tase gweꞌara.’”
⁹ Yesus ki zep ola gulk sun blaonzimki, “Zini ki, zeno anggur ngana yawala. Zen hwena ngana insa te-alakam bohe ta guzim halka. Zena dekam zep aha lang san holokam de ze gwen hap song gweka.
¹⁰ Angguru in kim teka, dekam zep zere hon de babu gwen zisi zer soneka– zen de anggur dan te-ala hliksa zere hap zerbla halzan hap. Hwena zini in zen ngana insa bohe dak, zen hwena man karekkam dangolek, deban zep nenblak, ‘Wake, ki en lwahal!’
¹¹ Etan ki zep ahanaka zer soneka. Hwena desa man nonol lamang dak, zao zep dangolek, ki zep etan ba maesa de golblan sremkam ner sonek.
¹² Dekam etan ahanaka zep zer soneka. Desa hen man dangolek, hendep man desek, ki zep hendep ngana in kon hiri dak.
¹³ “Dekam zep nga bina in enlala gweka, ‘Ëe banakan asa etan syal gwibir? Anik ki ere mo dang tininak de walasna ansa zer sonek. Desa wehe yap blikip neisibliꞌak.’
¹⁴ “Hwena kim nga bohe tan zini in hla da guk, ki zep zenaka nenbiridak, ‘Wakin angkam zere mo walas tangan hataꞌara. Bi zik de tinkim, an zen sa hwena ngana ansa bi gweblala. Nen tan, ekakim nen bi eblak!’
¹⁵ Ki zep hendep ngana in kon hiri dak, zao zep tol hendep dak. “Zep nga bi nik mo zi lup gul sonenna insa kirekam neibirida gwek, zep zen banakan sa gweibirida zala?
¹⁶ Zen sa tamera zala. Ngana insa dekam sa hwena aha zi hip bohe tazimdi– dekam de zen anggur dan te-ala hliksa zere hap zer gweblan hap.” Ola insa kim esane gwek, dekam zep eguk, “Asya, kirekam bap zen lwan!”
¹⁷ Hwena Yesus man kara tabiꞌinka hen sane tabiꞌinka. Ki zep hwena gubiridaka, “Ki hwena em banakane Alap mo ola ansa enlala eibiꞌin? – men zen anakan lwak, ‘Gol tauk gweblan wenya mensa gol tenya baes neibik, hwena Bian Alap mes desa bolak ik gilki.’
¹⁸ Zep zini men zen de gol tenya iwe etisik gweꞌanzak, zao sa hendep etimbwas gwe-gwer. Hen gol tenya in men zebon mae de zan ineꞌak, zen sa hendep eils gwer.”
¹⁹ Yahudi mo mam-mamna in kim Yesus mo gulk sun de ol blaoranna insa sane daꞌak, dekam zep dam nulsuk, “O zeno ola an nebon mae am tiꞌin.” Ki zep sap dekam de ze hendep balk tan hap eakasik. Hwena zen zi beyam-byana insa hen nairibiridak, zep balk da srem gwek.
²⁰ Dekam zep hwena balk tan hap orana deblaꞌak. Zen in zep ahakorena lup nul sonek– zen de u siwen olkam takensik gweblan hap. Sap zen mes ola anakan niaha-en guk, “Roma mo irik gin nika de ol lamangkam gubiꞌinka, dekam asa enbiridazak. Zen dekam esa hwena gubernor hon klak lal.”
²¹ In zep Yesussu nenblazak, “Bian, ee mese emsa tame lak. Em Alap mo dwam gwibinni dam-dam enkame tawa ta gwibirida, sap eno tawa tabinni home wet gulsuk gwenda– dekam de zi emsa husus gweblan srem hapye, sap mamna, sap betekna.
²² Zen in zebe emsa lakensibliꞌan: Em banakane Musa mo titi tabin ola dam gulsuꞌura? San ha nen sap esa Roma mo irik ginnik dep pajak te-alana ol gwizim? San ha bap nen?”
²³ Hwena Yesus mes anakan tame tabirki, “An u siwen olkam ki Asa dakensibliꞌan.” Ki zep gubiridaka,
²⁴ “Abe hap emki pajak hap de te-ala kasona insa ahanaka goltreblan.” Kim nolblak, ki zep gubiridaka, “Te-ala kasonak awe, an nara mo nwe-masesa ze yang dasik? Hen nara mo bosesa ze ale nuk?” Ki zep ding nulblik, “Roma mo teipsin zi mo denakake.”
²⁵ Ki zep hwena ding gulzimki, “Ki Roma mo teipsin zini in mo bi gwibin kire-kirena amki zebe hap etan lop la gweblak. Hen kirekam, Alap mo bi gwibin kire-kirena, amki Alap hap lop la gweblak.”
²⁶ Zi beya mo inik hendep hom zeno karekkam de ol-gunnu nasalblak. Ki zep hendep balk tasik, sap zen man zeno ding gulzimdinni insa denggwanbik.
²⁷ Sadukikam de gubirida gwen zini, zeno mae mo tawa tabinkim, “Zini bejen tin nikon etan ngaya gwen.” Zen ki zep hen Yesus hon yaing gwezak.
²⁸ Dekam zep u siwen enlala naban anakan dakensibliꞌak, “Bian Guru, Musa Bak mo titi tabin olak a kirekam mo lwakye: ‘Zi de we zemka walas we lan sremnak tinkim hli yunnu, zen oso zik de etan gonkam– zen de ze walassa aya zik mo weinak dep we tan hap. Hen kirekam, oso zik de tinkim, aya zik de hwena we semna insa gonkam.’
²⁹ Orep awe zini ki, beyana tuju enkam, aha-ere ane-bianna. Zena zi nik zep nonol wenya golka, hwena walas we lan sremnak zep tilki.
³⁰ Zao de zi nik zep etan golka– sowe nal zem in saye. Zen hen walas en sremnak zep tilki.
³¹ Zao hen etan dan-ahan nik golka. Zen hen walas we lan sremnak tilki. Hendep tujukam de aya-wal oso-walya in kire enkam zep sap nol gwek, hwena walas en srem ennak zep juwe gwek.
³² Wenya in hwena aumwa hap zep tik.
³³ Zep zen de etan engaya gweꞌanam, men kirekam ahakon tawa da gwibirin, wenya insa nara mo wekam maka nenbiꞌin? Sap tujukam de zini in mes desa kitak nol gwek.”
³⁴ Yesus ki zep ding gulzimki, “Zini okamanak de lowehe gwenkam, zen man we-zi darena zenaka kap da gwenan.
³⁵ Hwena zini men zen etan de engaya gwen hap edakastiꞌik, zen molya etan zenaka kap da gwek.
³⁶ Zen dekam Alap mo dam taha nakore zi mo kim sa lowehe gwer, hen dekam molya etan juwe gwek. Zen Alap mo hanan tabin walaskam sa lowehe gwer, sap Zen mes desa tin nikon ngaya tabirki.
³⁷ Hwena Musa hen mes damnak anakan goltreizimki, ‘Zini tin nikon ngaya gwenkam.’ Sap zen kim syauk nubare te tyum-tyumnuk hata zaka, dekam Alap anakan am gubluka, ‘Ëe an eno auyan wal mo Alap– Abraham, Isak, hen Yakob Bak mo.’
³⁸ Zep Alap Zen tin zi mo Alapsa hom. Zen ngaya wenyik mo Alap. Sap tingan men zen juwek Zebon onakon nama ngayana.”
³⁹ Ki zep Musa mo ol tawa ta gwibin zini ahakore nik nenblak, “Bian, em dawemkame ding guluda.”
⁴⁰ Dekam zep Yesussu de takensik gweblanna baes tak, sap zen mes esaher gwek.
⁴¹ Yesus ki zep takensibiridaka, “Zen ba hap ki zini anakan tawa da gwibirin? – ‘Israelsa de ngaya tabin hip de Zini, Zen teipsin zini Daud mo auyan-tanekam sa hata zala.’
⁴² Hwena Daud zena man-am ‘Teipsin Zi’kim gubluka– in kim buku Mazmuruk anakarekam ale gulkuye: ‘Bian Alap man ano Teipsinni gubluka, “Ëre mo dam taha nakon emki nikirin– dekon de hen teipsinkim irik gin hip.
⁴³ Ki asa hwena ebe hap de jal zini ere mo tana iltikinnik sisik gulin.”’
⁴⁴ Zep Daud insa Israelsa de ngaya tabin hip de Zini insa ‘Teipsin Zi’kim gubluka, ki Zen banakan sa zeno auyan-tanekam hata zala?”
⁴⁵ Zi beyam-byana in kim nama sane daꞌak, ki zep dua-blaskam de wenya insa gubiridaka,
⁴⁶ “Bera, Musa mo ol tawa ta gwibin zini in enlala kwae naban! Zeno mae mo kwaena in mana ebon mae hliminnink. Zen baju dawem-dawem alala tan naban zi nwe san zenaka noletrenda gwenan– zi dikim blikip gwesibirida gwen hap. Zen hen man edwam gwe-gwenan– dekam de aha zi tagal gwen maenak anakan blikip gwesibirida gwen hap, ‘Dawem, bian guru.’ Zen hen but srem golak ngeinnik de komal tumnak de teinikirin hip edwam gwe-gwenan– hen tembane yawal maenakye.
⁴⁷ We wal sem-semna hen anakan ahap da gwibirin, ‘Ëe asa tol eno zi swe mo kire-kire hli tandanna ebe hap tagal tasibir.’ Hwena zen sowe enlala naban mas neibirida gwenan– dekam de zere hap mamkam hli ti irin hip. Hwena zere mae mo karekna insa dikim aha zi hlaulzimdin srem hap, zep but srem gola kon zi nwenak Alapsa mam blalkam nen sone gweblanan– dekam de zi kil tibin hip, ‘Zini an airis.’ Hwena zen zenaka de karek tabin hip denaka kim mam nulsuk gwenan.”