¹ Yesus kim nama Yerusalem san dep golesek gweꞌanka, ki zep Yerikosa goletaman gweꞌanka.
² Hwena Roma mo irik ginnik dep te-ala alal tanda gwen nik mo nola zewe gwe gweka, bosena Zakeus. Zeno kire-kirena beya tanganna.
³ Zen man tangan Yesussu de hla tan hap dwam gweꞌanka, hwena zini beya tanganna. Zep zen ba kon dep? – hla tan naye. Sap zini in tihis tanganna.
⁴ Ngein sin zep tenya aranak de sewen hap hles tyaka– dekon de tamarannak hla ta sonen hap.
⁵ Yesus kim te ausuna iwe hata zaka, ki zep gulk sun kara gwe seka, zao zep gu seblaka, “Zakeus Bak, em nabakam ati gwezan, sap Alap mo abe hap de dwam gwibir-blinna, Ëe namen aha golak molya tak. Ëe eno golak asa tal.”
⁶ Zakeus ki zep nabal-bakam ati gwe zaka, ki zep hendep Yesussu zere mo gol san dep isrip-sri naban ngeirbline halka.
⁷ Tingare zini kim kirekam Yesussu hla dak, dekam zep jakal neblaꞌak. Man eguk, “Weo, zen ba hap zi karek mo golak de tan hap gunda?!”
⁸ Golak kim lowe heꞌak, Zakeus ki zep luweka, ki zep Yesussu gubluka, “Bian, ee ama angkam haleꞌan. Ano kire-kirena 50 persenkam ee asa tahalha zi hip kae gwebla-zim. Hen men zeno mae mo pajaksae aen dikim aha hlik naka twenblan hap mamkam de ing gun hup gubirida gwek, ee asa hwena angkam etan mamkam kap tazim: 100 ribukam de ahap tan zi hip, ee asa hwena 400 ribukam golblal. 10 ribukam de ahap tan zi hip, 40 ribukam asa golblal.”
⁹ Ki zep hwena zeno ola insa ding gulku, “Namen de yaklana awe, zini an hendep we wal walas zeban, Alap mes ngaya tabin hip denaka golhatazimnira, sap zen hen Abraham Bak mo auyan-tane wal.
¹⁰ Sap ngatan zi mo lang nakore Zi Tanganna Ëe kire zisi de hakalbiridan habe hatazak– men zen ora dawem nakon esyal hekke, desa dikim ngaya tabin hip.”
¹¹ Yesus kim nama kirekam tonbiridaꞌanka, Zen gulk sun de ol blaonzimdinkim ayang gulzimꞌinka. Sap dekam Zen mes Yerusalemk golegolek de gweꞌanka, hen dekam zini man kil di gweꞌak, “Yerusalemk kim goleyaing gweꞌanka, Zen dekam sa nesa Alap mo bosekam irik gili, hen nen dekam esa Roma mo irik gin nikon wet so gwer.”
¹² Ki zep gubiridaka, “Orep zini ki, bose teipsiblinna. Ki zep hwena teipsin tangan zi nik aha lang nakon gu soneblaka– zao de bose naka etan esek gul seblan hap, lwahal zankam de zen langna iwe irik gilzin hap.
¹³ Hwena kim teipsin tol zini in song gwe srem gweꞌanka, zen zere hon de babu gwen zisi dare taha-tapkam kwang guludaka. Zao zep te-alana kae gwebla-zimki– seratus-juta seratus-jutakam. Zao zep gubiridaka, ‘Te-alana an ano tim bwanak em dekam kire-kirena lirak la gwibik.’
¹⁴ “Hwena zao de zini ahakon man tangan husus neblak– zen de teipsin hipye. Zep zena kim song gweka, dekam zep zisi kap nul sonek– zen de teipsin tangan zini insa anakan gublun hap, ‘Zini in ee home ki dwam eblaꞌan– zen de asa teipsibiridan hapye.’
¹⁵ “Hwena zen hom zeno mae mo ol san ang gweka. Zen hwena desa teipsin taka. Ki zep hendep zere mo lang san dep lwahal zaka. Hendep dekam zep zere hon de ebabu gwe-gwen zini insa tagal gulsuku– dekam de ze anakan tawa gwibiridan hap, ‘Zeno mae mo te-alakam de eini angkam banakaꞌen?’
¹⁶ “Nonol zen hata zaka, ki zep gubluka, ‘Bian, seratus jutakam mensa ap zerblaka, angkam mes satu meliarak hataka. An zen– te-alana inye.’
¹⁷ “Ki zep gubluka, ‘Airis! Em abon de babu gwen zini dawem tanganna! Em mese betekkam de zerblan naka dawemkam irik taka, zebe angkam mam naka ep we yul soneblaꞌan. Zep angkam em sepulukam de esa esa irik gili.’
¹⁸ “Zao zen hata zaka ki zep gubluka, ‘Bian, seratus jutakam mensa ap zerblaka, angkam mes lima-ratus jutanak zaulu.’
¹⁹ “Desa hen ki zep gubluka, ‘Em ena lima enkam esa irik gili.’
²⁰ “Ahana zen hata zaka, zen hen ki zep gublu zaka, ‘Bian, eno te-alana men, a. Ëe ama kaen haknak de tahalen naka ep aning tablak.
²¹ Ëe ama emsa airi gweblak, sap em in jal-jal enkame irik gil gwenda. Sap em ere en mo eiyas gin nikore ei nika home tan gwenda, hwena hen ebon de syal ta gwen wenyik mo irse gwen nakore nakae mamkam ere hap gulin gwenda.’
²² “Ki zep ding gulbluka, ‘Em abon de babu gwen zini karek tanganna! Em eiwakam asa anakan tame taka: Ëe jal-jalkame irik gil gwenan, hen ere en mo eiyas gin nikore ei nika home tan gwenan, hwena aha mo irse gwen nakore ei nikae gulin gwenan. In zep ere mo ol toranna in kon asa emsa karek tal.
²³ Zep em ba habe ano te-alana insa te-ala lam ta gwen golak drene srem gweka? Ki zao maka etan lwahal zannak betek maekam ap mas nulblik.’
²⁴ “Zini men zen ze lowe heꞌak desa zep gubiridaka, ‘Te-alana insa em al tablan. Satu meliarkam men zen ap zertreblala, zebe hap hwena mas lablak.’
²⁵ “Hwena zini man ze denggwanblaꞌak, ki zep nenblak, ‘Asya, Bian, zeno mes-am satu meliar gweka!’
²⁶ “Ki zep ding gulzimki, ‘Zini men zen ano kap tablanna kim syal-syal gwenna, zebe hap etan asa kap ta gweblal. Hwena men zen ano kap tablan naka asang gweblanna, men zen betek en maekam nama lwablaꞌanka, desa asa etan al tablal.
²⁷ Hwena men zen ee de teipsin hip baes tak, desa lahyo halzak– ere mo nwenak de tameran hap.’”
²⁸ In kim kirekam tonsuku, dekon kim Yerusalemk goleyaing gwe seꞌanka, Yesus Zena ngeinnik gweka.
²⁹ Zaitun tra nabare kwatap teknak de e darena Betania hen Betfagek kim goleyaing gweꞌanka, dekon zep zere hon de ang ta gwen wenyaka dan-dan guzimki,
³⁰ “Em ena wakin san song en. Kime aptaꞌan haka, zao esa hendep keledai tanena da tablan naka hla lala– zi mo zersong gwen srem naka. Desa hil li-in halza.
³¹ Zi de emsa takensizimdinkim, ‘Em ba habe hil liꞌara?’ – a kirekam ding ulzim, ‘Bian dwam gweblaꞌara.’”
³² Zi darena in ki zep song eka. Men kire enkam tan-tan soka, kire enkam zep ki hendep lwak.
³³ Kim hil li inꞌinka, keledai bina ki zep dakensizimk, “Em ba habe hil liꞌara?”
³⁴ Ki zep ding ulzimki, “Bian dwam gweblaꞌara.”
³⁵ Hendep ki zep erlwa halka. Kim erhataka, ki zep keledai tahan dannak zere mae mo tahan bajuna kang dasek, zao zep hwena Yesussu zewe de sewesen hap mas neblak.
³⁶ Kim zersong gweꞌanka, zi trana in dekam zep ngein sin zere mae mo tahan bajuna ora san dere dahak– desan de keledaina in zersong gwen hap.
³⁷ Yerusalemk kim egolek de gweꞌak– orana men dekon zaitun tra nabare kwatap tek nakon hut gwehe zaka, zi trana men zen ang neblan daꞌak dekon zep ol mamkam Alapsa isrip-sri nebla song gweꞌak– mae hap, mensa owas-owasna zere mae mo nwekam hla nul gwekke.
³⁸ Man etaken song gweꞌak, “Heꞌho! An Bian mo bosekam nesa dikim tatetekam irik gin hip hata seꞌara. Diki Alap Zen zebe hap dawemsa golblan. An Zebon onakon esa Alap han erumlae gwer! Heꞌho! Nen kitak teipsin tangan Zini Alapsa boltere tan!”
³⁹ Hwena Farisikam de zini zi trana iwe man ze hen edurum gwehek. Zen ki zep Yesussu nenblak, “Bian, emki sap ere hon de ang ta gwen wenya insa gubiridan– dekakim balk tasik!”
⁴⁰ Ki zep ding gulzimki, “Ëe ama emsa gubiridaꞌan: Zen de ebalk tasiꞌik, dekam hwena kaso beyam-byana an zen sa hwena kirekam etaken gwer.”
⁴¹ Yesus kim Yerusalemsa golek kon hla takin zika, dekam zep anakare ola ban nwe go-ho gweblaꞌanka,
⁴² “Kwasang tol, Yerusalem. Namen bae ki anakan tame uꞌin, ‘Alap han de zersesek gwen hap de orana an desan.’ Hwena Alap mes ebe mae hap orana insa aning tazimki.
⁴³ Zen in zep, sap em Yerusalemk de zini home Asa dam lasiꞌin, yaklanak sa hatal– men dekam de ebe mae hap de jal zini emsa dot nulsuꞌukye. Em dekam toton ba san molye heya-hya gwek. Zen sa kamasa bwang nul– eno enak de kol sonna ansa dikim tatak gwesik kinin hapye. Desan sa emsa biti neibiridazal.
⁴⁴ Zen sa hendep emsa kitak damerasil, hen eno mae mo gola sa lu da gwer. We wal walasna zen sa kei-king nul, hendep gol te ik gin maena molya elwak. Sap em home tame uk– Alap in kim sap emsa de ngaya tabin hip hata zakaye.”
⁴⁵ Yesus ki zep Alap mo golak til zika. Dekon zep, men zen ze Alap hap de golblan kire-kirena lirak da gwibik, desa golealsa soneka.
⁴⁶ Zao zep gubiridaka, “Alap mo olak man lwak, ‘Ano gola zen Ënaka dekon gu sone gweblan hap dena.’ Em an hwena ‘sowe zi mo aning gol habe li kul sone gweꞌan.’”
⁴⁷ Hwena Zen zep ze yakla jamkam tawa ta gwibiꞌinka. Hwena Alap mo golak de syal tan wenyik mo mam-mamna, Musa mo olsa de tawa ta gwibin wenya, hen Yahudi mo nol-nola, zen dekam man Yesussu dikim tan hap orasa deblaꞌak.
⁴⁸ Hwena hom dam dasiꞌik, sap tingare ahakore zini man Yesus mo tawa tabinni serkam dwam neibiꞌik.