¹ Yesus ki zep zere hon de ang ta gwen wenyaka gubiridaka, “Okamanak awe de lowe henkam, banakare jal-jal hen hole-hle enlalana sa hata gwera. Hwena zi de Asa de taibliblan walassa karek san dep zertoranna, zen dikim Asa hli tan hap, kire zini zen ngalap gwe-gwen. Sap Alap sa desa serkam karek tala.
² Zen maka sam gwesiki– wal bose zemka de zertoran sremnak de tinni, karekkam de tinsi de goltowen maekam. Kaso dohon-honsa de holenak hule soneblan naban de hi tateknak hiri tan maekam, ki molya wal bose zemka zertonnanam, hen Alap molya kire hap karek taꞌanam. Eiwa, bap zen Asa de taibliblan walassa karek san dep zertoran– sap walas betek!
³ Zen in zep, bahem kirekam egwe gwen.” “Zi bose uk de ep kareksa golblanna, emki jalse gweblan. Zen de halenkam, zeno karekna insa emki eititi gwibir-blin.
⁴ Zen de emsa aha-ere yaklanak beyana tuju enkam karek ta gwenna, hwena zen de etan emsa tuju enkam gu gwebla zanna, ‘Bahem enlala gwibin. Angkam mese halenan,’ em hen dekam em hendep eititi gwibir-blin. Bahem etan enlalanak lam gun.”
⁵ Ki zep zere hon de ang ta gwen wenya abe dak, “Asa Em mas gwibiridan– ee akakim serkam Alapsa laibliblak.”
⁶ Ki zep ding gulzimki, “Eno mae mo Biansa de taibliblan de betek mae nik lwaꞌanam, sap rica dan betek makare nik, dekam eme tenya jowenna ansa gubiꞌinam, ‘Hinak em zaunun,’ dekam hendep maka ze zauꞌunnal.”
⁷ An ahana Yesus mo tawa tabin: “Ebon de babu gwen zi gweꞌanam, zen ebe hap maka ngasa deng tya gweblaꞌara, hen domba zahosa maka kara ta gwibir-bliꞌara. Zen de syala kon lwahal zankam, em molye gubluꞌanam, ‘Haen, em nongka tembane gwe.’
⁸ Zen emaka gubluꞌara, ‘Abe hap tembanesa nongka hamal gulblu, ki pakean dawemna ala so– dekam de tembanesa ap dere ta gubluzan hapye. Ena lun kon neik tembane gwe.’
⁹ Sap esa gublu srem gwera, ‘Em asa sam tanda,’ sap zen ere hon de babu gwe-gwen zi.
¹⁰ Em hen kirekam. Em de Alap mo ere hap de syalsa sul sonenkam, dekam emki enaka enlala betekkam gublun, ‘Ba hap de ano syala kon abe hap dawemsa golblan hap? Sap ee an Zebon de babu gwen zi sike.’”
¹¹ Yesus kim Yerusalem san dep golesek gweꞌanka, kim langna Galilea hen Samaria mo lang hlik sonnak yaing gwek,
¹² ki zep e beteknak goleyaing gweꞌanka. Zao zep zini dare taha-tap enkam goletoweꞌanka– sop sang-sang karek de hlauludan naka. Zen langa nakon etaken gweꞌak,
¹³ “Bian Yesus, asa kwasang gwibirida.”
¹⁴ Kim hlauludaka, ki zep gubiridaka, “Em Alap mo golak de syal ta gwen zi sin dep sek gwen– zebe mae hap de enaka goletreizimdin hip.” Kim kire hap sek gweꞌak, dekam zep kitak edawem gwek.
¹⁵ Aha-enna kim zenaka tame taka, “O hare ee mes-am dawem gwenan,” zen dekam zep etan Yesus osan dep lwahal zaka. Ol mamkam zep Alap hap dawemna golbla song gweꞌan zaka.
¹⁶ Yesus onak kim hata zaka, zeno nwenak zep ik gwehe zaka, dekon zep dawemna golblaka. Zini in sap Yahudi walsya hom. Zen Samaria wal.
¹⁷ Yesus dekam zep guku, “San ha dare taha-tapkam home dawem tabir? An hwena aha-ere tolik lwa halan zala.
¹⁸ Aha lang nakore zi en lwahal zala– Alap hap de dawemsa golblan hapye.”
¹⁹ Yesus ki zep zini insa gubluka, “Em luwen. Sap esa song gwera. Em ema Asa taibliblala, zebe dawem gwenda.”
²⁰ Aha yaklakam, ki zep Farisikam de gubirida gwen zini Yesussu dakensiblik, “Alap bawalkam sa Israel nesa irik ginkim kon gwesibir hanala?” Ki zep ding gulzimki, “Zeno emsa de irik ginni, em molye nwekam hla kuk.
²¹ Em molye anakan esane gwe-gwek, ‘Zen zewe irik giꞌira,’ ahaksa, ‘Zen awe irik giꞌira.’ Sap zeno irik ginni, zen angkam ki eno mae mo ngirinnik lwaꞌan.”
²² Ki zep hwena zere hon de ang ta gwen wenyaka gubiridaka, “Em esa ngein sin anakan dwam ei gwibir, ‘Diki namen de ngatan zi mo lang nakore Zi Tangan lwa haꞌan zanam bap.’ Hwena em molye na-en Asa hla lak.
²³ Zini sa emsa boton da gwibir, ‘Zen hale san gweꞌara,’ ahaksa, ‘Zen ana san gweꞌara.’ Hwena bahem zebon mae osan ang ta gwen– Asa de waba hap hakalblan hapye.
²⁴ Sap ngatan zi mo lang nakore Zi Tanganna Ëe kime hataꞌak, dekam ano tim nikon sa ngatanna wet so gwer– men kiye, ngli de mamkam ang tasik kini gwenna. Desa kitak man hla nulse gwenan. Zen kirekam sa hen lwal– Ëe de hatankamye. Molye Asa hla la srem gwek.
²⁵ Hwena nongka angkam de zini sa Asa baes neblal, hendep ki asa serkam de karek yawala goltower.
²⁶ “Yaklana men dekam ngatan zi mo lang nakore Zi Tanganna Ëe hataꞌak, zen orep men kirekam lwak, Nuh Bak kim golelowehe gwekake, zen kirekam sa etan lwal.
²⁷ Sap zen dekam tembanekam man emen-man gwenda gwek, hen we-zi daresa zenaka oto da gwibik. Zen kire enkam ki totoresa mumukkum lowe henda gwek, hendep ki zep yaklana in dekam Nuh Bak bul yawala iwe we wal walas zeban golesesek gwe seka. Zen ki zep hwena ho namwa yala insa auna nohlo gubik. Zen zep kitak timbwas tabik.
²⁸ “Lot kim gweka hen kirekam egwe gwek: Zen dekam tembanekam hen emen-man gwe-gwek, banakare maesa lirak da gwibik, ngasa deng dya gwek, hen golsa daublunda gwek.
²⁹ Hwena ki zep yaklanak hatak, Lot dekam Sodom kon heya gweka, dekam zep auna ehlok– Alap kim serkam de syauk sal-sala insa hiri gulzim ineka. Hendep tingan tangan zep etimbwas gwek.
³⁰ Zen kirekam sa hen auna ehlol– yaklana men dekame Ënaka zertreꞌakye.
³¹ “Dekam zini men zen de gol homan nakon lowe heꞌak, zen bap zen etan gol mwa san ba maesa de gon hap biti gwehan. Hen nganak de syal tandan wenya, zen bap zen etan gol san dep lwan dahan.
³² Emki enlala gwibin: Lot mo wenya zen banakan gwek?!
³³ “Sap zini men zen zere mo auhu-kamanak de gwensa anakan golairiꞌanka, ‘Ëe babe Yesussu de ang gwe-gweblannak karekna goltowe gwen,’ ki zeno gwenna in sa jek-jak gweblal. Diki men zen Asa de ang gwe-gweblan hap zere mo gwenna sosok guꞌunka, hendep zao mae de tin hip, zen zen sa hendep denaban ngaya gwera.
³⁴ Emki eenlala gwen: Ano hata zannak, dekam a kirekam sa lwal: Zi de dan-dan aha-ere tumnak laꞌanka, aha-en naka sa ere mo dam taha nakore zini neir inehal. Hwena aha tola sa hli dal.
³⁵ Hen we dare de lensa aleꞌak, desa hen aha-en naka sa nul inehal. Aha tola sa hli nul.”
³⁶ (17:35)
³⁷ Ki zep hwena zere hon de ang ta gwen wenya in dakensiblik, “Bian, kirekam de zisi de klis gun hup dena in, endawe sa ki lwal?” Ki zep ding gulzimki, “Men kirekam zini nen gwibirin, ‘Men zao tweran tokna lwanna, mawana hi agohena zao sa ewale gwe-gwezal.’ Zep hen kirekam, em de owas-owasna insa hlaunnu, dekam esa dam ulsuk gwer, ‘Aumwa hap de yaklanak angkam man tangan golek de gweꞌan.’”