Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Indak lamo sasudah tu, Isa Almasih payi ka kota-kota sarato jo ka kampuang-kampuang, untuak mambaritokan Injil Karajaan Allah. Duwo baleh urang pangikuik-Nyo payi samo-samo jo Baliau.

² Baitu pulo babarapo urang padusi nan lah dicegakkan dari kamasuak-an roh jahek, sarato dicegakkan dari panyakik. Nan padusi-padusi tu iyolah Maryam nan biaso pulo di imbau si Magdalena (tujuah roh jahek nan lah dikaluwakan dari dirinyo);

³ payi pulo si Yohana, urang rumah si Khuza, pagawai istana Rajo Herodes; Susana, sarato sambuah lai padusi-padusi nan lain. Jo pitihnyo surang-surang, inyo bi mambantu Isa Almasih sarato jo pangikuik-Nyo.

⁴ Urang taruih juwo bi tibo kabake Isa Almasih, dari babagai-bagai kota. Kutiko lah banyak urang bakumpua, mako Baliau mancuritokan kabake urang-urang tu parumpamoan nan bakcando iko:

⁵ "Ado surang urang paladang, payi manyerakkan baniah. Kutiko inyo sadang manyerakkan baniah, ado baniah tu nan jatuah di jalan. Sabagian dilanyau dek urang lalu, sabagian lai dimakan dek buruang.

⁶ Ado pulo nan jatuah di tanah nan babatu-batu. Kutiko bijo tu lah tumbuah, muloi batuneh, tunehnyo tu lansuang layua, dek karano tanah tampaik tumbuahnyo kariang.

⁷ Ado pulo baniah nan jatuah di tangah samak baduri. Samak baduri tu tumbuah samo-samo jo baniah, samak tu malacik baniah tu sampai mati.

⁸ Tapi ado pulo baniah nan jatuah di tanah nan rancak, baniah tu tumbuah sarato ma asiekan buwah saratuih kali lipek." Sasudah mancuritokan parumpamoan tu, Isa Almasih mangatokan, "Kok layi batalingo, dangakanlah kecek Ambo!"

⁹ Pangikuik-pangikuik Isa Almasih mananyokan kabake Baliau, apo aratinyo parumpamoan tu.

¹⁰ Baliau manjawab, "Angku-angku lah dibari karunia untuak mangatawui tantang rasiyo Karajaan Allah. Tapi urang-urang nan lain di aja jo parumpamoan, supayo inyo mamparatikan, tapi indak tawu apo nan tajadi; inyo mandanga, tapi indak mangarati."

¹¹ "Ikolah aratinyo parumpamoan cako: Baniah tu iyolah firman Allah.

¹² Baniah nan jatuah di jalan, aratinyo adolah, sarupo jo urang nan inyo layi mandangakan firman Allah. Tapi tibolah ubilih untuak marabuik firman Allah tu dari dalam atinyo, supayo inyo jan manjadi urang nan ba iman, nan disalamaikkan.

¹³ Baniah nan jatuah di tanah nan babatu-batu, aratinyo adolah saroman jo urang, nan dikutiko mandangakan firman Allah tu, inyo manarimo jo sanang ati. Tapi firman Allah tu indak ba urek di dalam atinyo. Inyo ba iman hanyo sabanta sajo, dikutiko tibo cobaan inyolah marotaik pulo.

¹⁴ Baniah nan jatuah di tangah samak baduri, ibaraiknyo sarupo jo urang, nan dikutiko mandanga firman Allah tu inyo layi manarimo, tapi inyo cameh tantang iduiknyo, inyo niyo nak iduik bamewah-mewah, sarato jo basanang-sanang di dunia ko. Kasadonyo tu lah nan ma ambek inyo, sainggo iduiknyo indak ma asiekan buwah nan masak.

¹⁵ Baniah nan jatuah di tanah nan rancak, ibaraiknyo sarupo jo urang, nan dikutiko mandangakan firman Allah tu, inyo tarimo, inyo inok manuangkan dalam atinyo nan elok, sainggo inyo ka batahan sampai ma asiekan buwah."

¹⁶ "Indak ado doh urang nan sudah ma iduikkan lampu, kudian inyo sawok-i jo embe, kok indak inyo latakkan di bawah tampaik tidua. Lah musti inyo malatakkan lampu tu di ateh rengkaknyo, supayo urang nan ka masuak rumah dapek maliyek cahayonyo.

¹⁷ Dek karano, indak ado doh nan ta andok, nan indak ka kanampak-an; indak ado doh nan dirasiyokan, nan indak ka tabukak, lah musti urang ka tawu juwo.

¹⁸ Dek karano itu, paratikanlah elok-elok apo nan angku-angku dangakan ko. Satiyok urang nan lah mampunyoi, kabake inyo di agiahkan nan labiah banyak lai; tapi bagi urang nan indak punyo, malah nan saketek nan ado di inyo tu pun, ka di ambiak pulo."

¹⁹ Mandeh sarato jo dunsanak-dunsanak Isa Almasih, bi tibo kabake Baliau, tapi urang-urang tu indak dapek doh mandakek kabake Baliau, dek karano urang sangaik rami.

²⁰ Mako ado surang urang nan mangecekkan kabake Baliau, "Ngku, rang gaek sarato jo dunsanak-dunsanak Angku ado diluwa. Inyo nak ka bi basuwo jo Angku."

²¹ Tapi Baliau bakato kabake urang-urang tu, "Satiyok urang nan layi ma iyokan sarato nan layi mangarajokan firman Allah, mako inyo tu lah mandeh Ambo, inyolah sudaro-sudaro Ambo."

²² Pado suatu ari Isa Almasih sarato jo pangikuik-Nyo nayiak ka ateh parawu. "Molah kito payi ka subarang danau," kecek Baliau ka pangikuik-Nyo. Mako barangkeklah parawu tu.

²³ Dikutiko parawu tu sadang balayie, Isa Almasih talalok. Indak disangko-sangko tibolah angin limbubu malando danau tu. Ayie lah muloi masuak ka parawu, mungkin sajo dapek mancilakokan urang tu kasadonyo.

²⁴ Pangikuik Baliau payi manjagokan Baliau. Inyo bi bakato, "Ngku Guru, Ngku Guru, jagolah, lah cilako kito!" Mako Baliau pun jago, Baliau ariak angin jo ombak nan sadang manggilo tu. Angin jo ombak tu pun baranti, danau tu manjadi tanang, satanang-tanangnyo.

²⁵ Sudah tu Baliau bakato kabake pangikuik-Nyo, "Baa mangko angku-angku indak bi picayo kabake Ambo?" Pangikuik Baliau bi tacangang sarato jo takuik. Bi mangeceklah inyo sasamo inyo, "Siya nan sabananyo Baliau ko, kok sampai angin jo ombak patuah ka parentah-Nyo!"

²⁶ Isa Almasih sarato jo pangikuik-Nyo taruih juwo balayie sampai ka daerah Gerasa di subarang danau Galilea.

²⁷ Dikutiko Isa Almasih turun ka darek, Baliau didatangi dek surang laki-laki nan kamasuak-an roh jahek. Lah acok kali urang tu dikuwasoi dek roh jahek tu, sainggo, biyapun tangan sarato jo kakinyo lah dikabek jo rantai, inyo dijago arek, tapi inyo dapek juwo mamutuihi rantai tu. Inyo tu urang dari kota. Lah lamo inyo indak bakain, sarato indak namuah diam di rumah. Inyo hanyo suko tingga di guwo-guwo tampaik kubuaran di padang pasie, dek karano dibawok dek roh jahek tu. Kutiko Isa Almasih manampak urang tu, Baliau mamarentahkan roh jahek tu kaluwa dari urang tu. Sudah tu urang tu ma ariak sambia sujuik di adok-an Baliau, urang tu bakato jo suwaro nan kuwaik, "Isa Almasih, Anak Allah Nan Maha Tinggi! Ka Angkau pangakan ambo ko? Ambo sabana mambana, jan di ajab ambo!"

²⁸ (8:27)

²⁹ (8:27)

³⁰ Isa Almasih batanyo kabake urang tu, "Siya namo angkau?" "Namo ambo 'Legiun'," kecek urang tu -- dek karano lah sambuah roh jahek nan lah masuak ka dalam dirinyo.

³¹ Roh-roh jahek tu iyo bana mambana, supayo Isa Almasih jan sampai ma usie inyo masuak Lubang Mauik.

³² Indak jauah dari tampaik tu, ado babi nan sangaik banyak, nan sadang mancari makan di lereng bukik. Roh-roh jahek tu, sabana mamintak kabake Isa Almasih, supayo inyo dibuliahkan masuak ka dalam babi nan banyak tu. Baliau layi mambuliahkannyo.

³³ Mako kaluwalah roh-roh jahek tu dari urang tu, sudah tu inyo masuak ka babi tu. Kasadonyo babi tu bi lari, taruih tajun dari tapi tabiang masuak danau, abih bi karam kasadonyo.

³⁴ Kutiko tukang gubalo babi tu maliyek apo nan lah tajadi. Mako inyo bi lari payi ma imbaukan kajadian tu ka kota, sarato jo ka kampuang-kampuang nan di sakuliliang tu.

³⁵ Sudah tu urang bi ondoh-poroh kaluwa untuak maliyek apo nan lah tajadi. Inyo bi datang kabake Isa Almasih, tibo disinan inyo liyek urang nan lah lapeh dari roh jahek tu, sadang duduak dakek kaki Baliau. Inyo lah bakain baliak, nan pikierannyo lah elok. Urang-urang tu bi tabik takuik.

³⁶ Urang-urang nan maliyek kajadian tu, bi mancuritokan kabake urang nan lain, baa caronyo urang tu dicegakkan.

³⁷ Sudah tu kasadonyo panduduak daerah Gerasa tu sabana mamintak, supayo Baliau barangkek dari tampaik tu, dek karano kasadonyo urang lah mati katakuik-an. Mako nayiaklah Baliau ka parawu, untuak barangkek pulang.

³⁸ Urang nan lah lapeh dari roh jahek tu, mamintak kabake Isa Almasih kok dapek inyo buliah payi jo Baliau. Tapi Baliau managah urang tu,

³⁹ "Jan payi lai, pulanglah, payilah curitokan, apo nan lah dipabuwek dek Allah kabake angkau." Mako payilah urang tu kian kumari dalam kota tu, untuak mancuritokan sagalo apo nan lah dipabuwek dek Isa Almasih, kabake inyo.

⁴⁰ Kutiko Isa Almasih babaliak ka subarang danau, Baliau disambuik jo gadang ati dek urang nan disinan, dek karano urang-urang tu sadang mananti-nanti Baliau bana.

⁴¹ Sudah tu, tibolah surang kapalo rumah ibadaik di tampaik tu. Namonyo Yairus. Inyo sujuik di adok-an Isa Almasih, sarato mambana kabake Baliau, kok dapek Baliau datang ka rumahnyo,

⁴² dek karano, surang anaknyo nan padusi, nan ba umua duwo baleh tawun, lah bantuak ka mati nampaknyo. Samantaro Baliau dalam pajalanan ka rumah Yairus, sambuah urang nan basasak-sasak disakuliliang Baliau.

⁴³ Di antaro urang nan sabanyak tu, ado surang padusi nan lah duwo baleh tawun sakik pandarahan, nan ba ubuangan jo haidnyo. Lah abih sagalo aratonyo untuak ba ubek ka dotor, tapi nan panyakiknyo indak juwo cegak.

⁴⁴ Padusi tu mandakek-i Isa Almasih dari balakang, sudah tu inyo awai ujuang jubah Baliau. Sakutiko tu juwo pandarahan urang padusi tu lansuang baranti.

⁴⁵ Baliau batanyo, "Siya tu urang nan ma awai Ambo?" Kasadonyo urang indak ado nan mangaku. Sudah tu si Petrus bakato, "Ngku, sambuah urang nan bajalan ma iriangkan Angku; kasadonyo bi manyasak-nyasakkan Angku!"

⁴⁶ Baliau bakato, "Mangkonyo Ambo tawu ado urang nan ma awai Ambo, dek karano Ambo ado marasokan kuwaso nan kaluwa dari diri Ambo."

⁴⁷ Urang padusi tu lah manyadari, baraso karajonyo lah katawuan. Dek karano itu inyo datang jo badan nan manggigia, sudah tu inyo sujuik di adok-an Isa Almasih. Mako inyo curitokanlah di adok-an kasadonyo urang, apo sababnyo mangko inyo ma awai Baliau, inyo curitokan pulo baraso panyakiknyo lansuang cegak, dikutiko inyo ma awai jubah Isa Almasih.

⁴⁸ Isa Almasih bakato kabake urang padusi tu, "Oih anak-Den, dek karano angkau picayo kabake Ambo, angkau cegak. Payilah jo sanang salamaik."

⁴⁹ Samantaro Baliau sadang mangecek, tibolah surang pisuruah dari rumah Yairus. Inyo bakato kabake Yairus, "Ngku, anak angku lah maningga. Indak usah lai angku manyusah-nyusahkan Angku Guru, untuak datang ka rumah."

⁵⁰ Kutiko Baliau mandangakan kecek pisuruah tu, Baliau bakato kabake Yairus, "Jan cameh ngku. Picayo sajolah ka Ambo, anak angku tu layi ka cegak."

⁵¹ Barulah tibo dirumah Yairus, Isa Almasih indak mambuliahkan surang juwo doh urang nan masuak samo jo Baliau, salain daripado si Petrus, si Yahya, si Yakobus, sarato jo bapak mandeh paja tu sajo.

⁵² Kasadonyo urang sadang manangih jo maratok, dek karano kamatian paja tu. Tapi Isa Almasih bakato kabake urang tu, "Jan manangih. Paja ko indak mati bagai doh ko, inyo hanyo lalok!"

⁵³ Urang-urang tu bi mampagalakkan Baliau, dek karano inyo lah bi tawu, baraso paja tu iyo lah mati.

⁵⁴ Kudian Isa Almasih mamacikkan tangan paja tu, sambia bakato, "Oih nak, jagolah baliak!"

⁵⁵ Mako babaliaklah angok paja tu ka badannyo, sakutiko tu juwo inyo jago. Sudah tu Isa Almasih manyuruah urang-urang tu, untuak ma agiah makan paja tu.

⁵⁶ Sangaik tacangangnyo urang gaek paja tu, maliyek kajadian tu. Tapi Isa Almasih managah urang-urang tu, supayo inyo jan mancuritokan kajadian tu ka siya-siyanyo.

Lukas

Video Lukas 08

Ikuti Kami:

KONTAK | PARTISIPASI | DONASI