Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mak mesaka jak seno, Isa mik kota-kota rik pekon-pekon, untuk nyampaiko Kabar Betik bahwa Allah mulai memerintah sebagai Raja. Rua belas jelma-jelma sai nutuk Ia jejama Ia.

² Reno muneh pira-pira bebai sai radu bebas jak pengaruh ruh jahat rik penyakik. Bebai-bebai udi iado Maria sai disebut Magdalena (pitu ruh jahat sai radu luah jak badanni);

³ juga Yohana, inggomni Khuza, pegawai istana Herodes, Susana rik lamon lagi bebai-bebai lain. Jama duit tian tenggalan, tian ngebantu Isa rik jelma-jelma sai nutuk Ia.

⁴ Jelma-jelma terus ria ratong jama Isa jak pelosok kota. Waktu radu lamon jelma sai bekumpul, Isa nyeritako jama tian perumpamaan injuk reji:

⁵ "Jelma petani naborko bibit. Waktu ia lagi nabor, wat bibit sai gugor di renglaya. Sebagian diilikko jelma rik sebarehni dikanik burung.

⁶ Wat juga sai gugor di batu-batu. Waktu tunas-tunasni tuoh, tanoman udi layu mani tanohni menyangu.

⁷ Wat muneh bibit sai gugor di delom semak keruwi. Semak keruwi ano tuoh jejama bibit ano, dihimpitni bibit seno hingga mati.

⁸ Kidang wat muneh bibit sai gugor di tanoh sai subor, tuohni helau ngehasilko uah seratus kali lipat." Seraduni Ia nyeritako perumpamaan seno, Ia cawa, "Kik sai wat cuping, dengiko!"

⁹ Jelma-jelma sai nutuk Isa nanyako jama Ia reti jak perumpamaan seno.

¹⁰ Isa ngejawab, "Keti radu dikeni kepintaran in pandai rahasia injuk repa Allah memerintah sebagai Raja. Kidang ulun-ulun sai diajar jama perumpamaan, in tian wat perhatian, kidangni mak pandai api sai tejadi; tian ngedengi, kidang mak ngerti."

¹¹ "Injuk rejido retini perumpamaan ano: Bibit ano iado cawani Allah.

¹² Bibit sai gugor di renglaya injuk jelma-jelma sai ngedengi cawa seno. Kidang iblis ratong rik ngerampas kabar seno jak hatini tian, in tian dang percaya rik diselamatko.

¹³ Bibit sai gugor di rang sai bebatu injuk jelma sai waktu ngedengi kabar seno, nerima jama senang hati. Kidang kabar seno mak ngedok bakak delom hati tian. Tian percaya serebok gaoh, kik wat pencubaan hurik, tian murtad.

¹⁴ Bibit sai gugor di tengah semak-semak injuk jelma ngedengi kabar, kidang khuater jama hurikni rik mirak mebatin rik senang delom dunia ajo. Sunyinni seno ngehimpit hurikni, sehingga mak ngehasilko uah sai mesak.

¹⁵ Bibit sai gugor di tanoh sai subor, injuk jelma sai ngedengi kabar ano, raduni nyegokko di delom hati sai betik rik jujor. Tian betahan sampai ngehasilko uah."

¹⁶ "Mak ngedok jelma sai masang lampu kak raduni nyalokni jama runcung, atau ngepikko lampu seno di debah rang pedom. Ia haga ngepikko lampu ano di rang sai langgar, in ulun sai kuruk dapok ngeliak sinarni.

¹⁷ Mak ngedok sai tesegokko sai mak keliakan; rik mak ngedok sai dirahasiako sai mak dapok tebungkar rik kepandaian.

¹⁸ Makani perhatiko betik-betik api sai keti dengi. Mani jelma sai radu wat, haga dikeni lebih lamon lagi; kidangni jelma sai mak ngedok api-api jama ia masih haga diakuk juga."

¹⁹ Emak rik puari-puarini Isa ratong jama Ia, kidang mak sampai betungga jama Ia mani jelma lamon nihan.

²⁰ Wat jelma sai cawa jama Isa, "Bapak, emak rik puari-puari-Mu wat di luah. Tian haga betungga jama Bapak."

²¹ Isa cawa jama tian, "Jelma-jelma sai ngedengi cawani Allah rik ngelakukoni, tiando sai emak-Ku rik puari-puari-Ku."

²² Suatu rani Isa rik jelma-jelma sai nutuk Ia cakak jukung. "Ija ram mik nyeberang danau," ani Isa jama tian. Raduni tian berangkat.

²³ Waktu tian lagi belayar, Isa pedom. Tiba-tiba angin badai ratong di danau ano. Way kuruk delom jukung, hingga ngebahayako tian sunyinni.

²⁴ Jelma-jelma sai nutuk Isa ratong jama Ia, nginjakko Ia. Tian cawa, "Pak Guru, Pak Guru, neram celaka!" Isa minjak langsung ngebentak angin rik umbak sai lagi ganas-ganasni. Angin jama umbak pun reda danau pun jadi tenang.

²⁵ Kak raduni Isa cawa jama jelma-jelma sai nutuk Ia, "Mengapi keti masih mak percaya jama Nyak-Ku?" Tian jadi hiran rik merabai. Tian cawa jejama tian, "Sapa sebenorni jelma sinji sampai ngeni perintah jama angin rik umbak, rik Ia pun dipatuhi!"

²⁶ Isa rik jelma-jelma sai nutuk Ia terus belayar sampai mik daerah Gerasa seberang Danau Galilea.

²⁷ Waktu Isa regah mik darak, ratong jelma bakas sai kekurukan ruh jahat. Ulun seno jak kota. Radu saka ia riluk rik mak pernah tinggal di lamban. Ia angkah haga tinggal delom guha rang nguborko jelma.

²⁸ Waktu ia ngeliak Isa, ia mekik raduni sujud di hadap Isa rik beseru, "Isa, Anak Allah Sai Mahatinggi! Haga diapiko nyak inji? Kuharap dang nyak disiksa!"

²⁹ Jelma seno cawa injuk reno mani Isa memerintahko ruh jahat udi luah jak badanni. Radu risok ia kekurukan sitan walaupun culuk rik cukutni dirantai rik dijaga, ia masih dapok mutusko rantai ano terus diusung sitan mik padang heni.

³⁰ Isa betanya jama jelma inji, "Sapa gelarmu?" "Gelarku 'Legiun'," jawabni -- mani radu lamon ruh jahat sai radu kuruk delom badanni.

³¹ Ruh jahat udi ngilu tulung in Isa dang nguser tian lumpat delom Rulah Maut.

³² Redik rang seno lamon babui lagi nyepok kanikan di lireng bukit. Ruh-ruh jahat udi ngilu tulung jama Isa in diizinko kuruk badan babui-babui udi, Isa setuju.

³³ Maka ruh-ruh jahat udi luah jak badanni jelma seno, kuruk delom babui-babui ano, terus babui-babui ano tegar lumpat jak pinggerni rulah mik delom danau, terus tebenam.

³⁴ Tukang jaga babui ano ngeliak api sai radu tejadi. Tian lijung sambil nyiarko cerita seno di kota rik pekon sekitarni.

³⁵ Jelma-jelma bareh luah untuk ngeliak api sai tejadi. Tian ratong jama Isa, di disan tian betungga jama jelma sai radu bebas jak sitan-sitan lagi mejong redik cukutni Isa. Ia radu makai kawai rik pikeranni radu waras. Jelma-jelma seno merabai.

³⁶ Tian sai ngeliak kejadian seno nyeritako jama ulun-ulun bareh repa cara jelma seno munyai.

³⁷ Kak raduni sunyinni penduduk Gerasa ngilu nihan in Isa ninggalko rang seno, mani tian sunyinni merabai nihan. Kak raduni Isa cakak jukung haga mulang.

³⁸ Jelma sai radu bebas jak pengaruh sitan-sitan udi, ngilu jama Isa in ia dapok nutuk. Kidang Isa ngayun ia lijung, cawa-Ni,

³⁹ "Mulangdo rik ceritako api sai radu disani Allah jama niku." Kak raduni jelma udi mik ngeni pandai sampai pelosok kota, api sai radu disani Isa jama ia.

⁴⁰ Waktu Isa muloh mik seberang danau, Ia disambut riang ulihni jelma-jelma mani tian lagi nunggu Isa.

⁴¹ Mak mesaka jak seno ratong kepala lamban ibadah. Gelarni Yairus. Ia sujud di hadap Isa rik ngilu in Isa ratong mik lambanni,

⁴² mani hehanani anak bebaini umor rua belas tahun hamper mati. Waktu Isa lapah mik lambanni Yairus, jelma-jelma lamon ngedesak-desak Ia jak sunyin jurusan.

⁴³ Di hantarani wat sai bebai sai radu rua belas tahun meruyuh ngeluahko rah sai wat hubunganni jama mekamakni. Ia radu ngebelakko unyinni hartani untuk berubat jama dokter, kidang makkung juga munyai.

⁴⁴ Bebai udi ngerediki Isa jak kudan, nilut uncukni jubah-Ni Isa. Waktu senodo mekamakni bebai seno taru.

⁴⁵ Isa betanya, "Sapa sai nilut Nyakku?" Sunyinni jelma mak ngaku. Kak raduni Petrus cawa, "Pak, wat lamon nihan jelma di sekeliling Bapak; tian ngedesak-desak Bapak!"

⁴⁶ Isa cawa, "Kidangni wat sai jelma sai nilut Nyak. Nyak pandai seno, mani wat kekuatan luah jak badan-Ku."

⁴⁷ Bebai udi sadar bahwa guaini radu kepandaian. Ia ratong gegoran, terus sujud di hadapni Isa. Ia nyeritako di hadap ulun-ulun, mengapi ia nilut Isa, rik repa carani penyakikni munyai waktu senodo.

⁴⁸ Isa cawa jama ia, "Anak-Ku, mani niku percaya jama Nyak, munyaido niku. Rik mikdo jama selamat."

⁴⁹ Sewaktu Isa masih cawa, pelayanni Yairus ratong. Ia cawa jama Yairus, "Anak bebai Bapak radu mati. Dang Bapak nyusahko Bapak Guru lagi."

⁵⁰ Waktu Isa ngedengi seno, Ia cawa jama Yairus, "Dang rabai. Percaya gaoh jama Nyak anakmu pasti munyai."

⁵¹ Waktu sampai di lambanni Yairus, Isa mak ngeni izin sai jelma pun kuruk kecuali Petrus, Yohanes, Yakobus rik ulun tuha jak sanak seno.

⁵² Sunyinni jelma miwang bebatui mani sanak seno mati. Kidang Isa cawa, "Dang miwang. Sanak seno mak mati, ia angkah pedom!"

⁵³ Tian ngelalangko Isa, mani tian pandai sanak bebai ano radu mati.

⁵⁴ Kak raduni Isa nyating culukni sanak seno rik cawa, "Minjakdo, Nak!"

⁵⁵ Nyawani sanak seno ratong luot, waktu senodo ia minjak. Radu jak seno Isa ngayun tian ngeni mengan sanak seno.

⁵⁶ Ulun tuhani sanak seno hiran nihan. Kidang Isa ngelarang tian ngeni pandai kejadian seno jama sapa pun.

Lukas

Video Lukas 08

Ikuti Kami:

KONTAK | PARTISIPASI | DONASI