Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 “Anjaha on do titah pasal galangan parsalahan, pansing sahalian do ai.
2 Maningon bani ianan panayatan ni galangan situtungon ai do sayaton ni sidea galangan parsalahan ai, anjaha daroh ni ai pispiskononkon bani anjapanjap ai inggot.
3 Anjaha ganup taboh-tabohni maningon galangkonon do, taboh-taboh ni ihurni pakon taboh-taboh na manrongkob bituhani,
4 piah-piah na dua ai ampa taboh-taboh na longkot hujai na bani binongei ai, sonai homa bongbong daroh na dalngop bani atei-atei maningon rap pakon piah-piah buatonni ai.
5 Maningon tutungon ni malim ma ai i atas ni anjapanjap bahen galangan apuy bani Jahowa, ai ma galangan parsalahan.
6 Sagala dalahi i tongah-tongah ni malim bulih do mangan hunjai, bani ianan na pansing do panganon ai, pansing sahalian do ai.
7 Songon galangan pardousaon ai do galangan parsalahan ai, sisada titah do na dua ai; malim na mambahen pardearan marhitei ai, ia do simada ai.
8 Anjaha malim na manggalangkon galangan situtungon ni atap ise pe, ia do simada bobak ni galangan situtungon na ginalangkonni ai.
9 Anjaha ganup galangan sipanganon na pinamasak i atas ni tataring, anjaha sagala na ipaturei ibagas balanga atap bani panggangan, malim na manggalangkon ai do simada ai.
10 Sonai homa ganup galangan sipanganon, na maragu minak atap horah, anak si Aron do ganup simada ai, ganup sidea dos bei.”
11 “Anjaha on do titah ni galangan pardameian na ginalangkon ni halak bani Jahowa.
12 Anggo igalangkon ai bahen galangan puji-pujian, maningon galangkononni do hasoman ni galangan puji-pujian ai kuei na lang niigaran maragu minak, ruti na lang niigaran na nilapuan bani minak, pakon buei humbani itak na lumat na maragu botul pakon minak.
13 Rap pakon kuei humbani itak na niigaran maningon galangkononni galanganni, tambah ni galangan pardameian ai bahen galangan puji-pujian.
14 Anjaha sabagian humbani ganup galangan ai maningon galangkononni do bahen galangan sitatangon bani Jahowa, malim na mamispiskon daroh ni galangan pardameian ai do simada ai.
15 Anjaha juhut ni galangan pardameianni, na bahen galangan puji-pujianni, maningon bois do panganon bani ari panggalangkononni ai, seng bulih tading hunjai das bani patarni.
16 Anggo galangan bagah-bagah atap galangan rosuh ni uhur do galangan na ginalangkonni ai, bani ari panggalangkononni ai ma ipangan ai, anjaha na teba hunjai patarni ma ipangan;
17 tapi na tading humbani juhut ni galangan ai bani ari patoluhon maningon tutungon do hubagas apuy.
18 Anggo dong na mangankon humbani juhut ni galangan pardameianni bani ari patoluhon, seng tarharosuhkon na manggalangkon ai, seng dapotan ulih ia hunjai; na gabe hagigian do ai, anjaha barang ise na mangankon hunjai, maningon hona papa do.
19 Anjaha gulei na dob dais bani atap aha na butak, seng bulih panganon, maningon tutungon do ai hubagas apuy, tapi anggo pasal gulei ai, boi do panganon ni sagala na dob manguras.
20 Tapi barang ise na mangankon juhut ni galangan pardameian na bani Jahowa, hape butak ope ia, maningon rotaponkon do hosahni humbani bangsani.
21 Anggo adong atap ise na manjamah barang na butak atap jolma na butak, atap pinahan na butak atap aha pe na legan na butak, sihagigihononkon, anjaha ipangan humbani juhut ni galangan pardameian na bani Jahowa, maningon rotaponkon do jolma ai humbani bangsani.”
22 Nini Jahowa ma hubani si Musa,
23 “Hatahon ma hubani halak Israel, seng bulih panganonnima taboh-taboh ni lombu, biribiri atap hambing pe.
24 Taboh-taboh ni bangkei ni pinahan atap taboh-taboh ni pinahan na pinarsilbak ni binatang boi do pargunahononkon ai, tapi sabonar seng boi anggo panganonnima ai.
25 Ai atap ise na mangankon taboh-taboh humbani pinahan na ginalangkon bahen galangan apuy bani Jahowa, maningon rotaponkon do hosahni hun tongah-tongah ni bangsani.
26 Sonai homa seng bulih panganonnima daroh ni atap aha pe bani ganup ianannima, age daroh ni manuk-manuk atap daroh ni pinahan pe.
27 Barang ise na mangankon daroh, maningon raseionkon ia hun tongah-tongah ni bangsani.”
28 Nini Jahowa ma hubani si Musa,
29 “Hatahon ma hubani halak Israel, barang ise na manggalangkon galangan pardameianni bani Jahowa, maningon ia sandiri do na mamboan galanganni ai bani Jahowa humbani galangan pardameianni.
30 Maningon tanganni sandiri do mamboan galangan apuy bani Jahowa; taboh-taboh rap pakon tontonni do siboanonni, ase tontonni ai gabe galangan sitatangon, sitatangon i lobei ni Jahowa.
31 Tutungon ni malim ai ma taboh-taboh ai bani anjapanjap ai, tapi tontonni ai rupei ni si Aron pakon anakni ma ai.
32 Age hae-hae siamun na parlobei maningon bereonnima do bani malim bahen galangan sitatangon humbani galangan pardameiannima.
33 Barang ise humbani anak ni si Aron na manggalangkon daroh ni galangan pardameian rap pakon taboh-tabohni, maningon hae-hae siamun parlobei rupeini.
34 Ai domma Hubuat tonton galangan sitatangon ai, pakon hae-hae parlobei sitatangon ai humbani halak Israel, humbani galangan pardameian ni sidea, anjaha domma hubere ai hubani malim Aron pakon hubani anakni ai, gabe aturan na totap sadokah ni dokahni bani halak Israel.
35 On do rupei na pansing bani si Aron pakon bani anakni ai humbani galangan apuy bani Jahowa, bani ari parbangkit ni sidea gabe malim bani Jahowa.
36 Jahowa do mangkatahon, bereonkon ni halak Israel ai bani sidea bani ari pamminakion ni sidea; gabe aturan na totap ma ai sadokah ni dokahni bani ginompar ni sidea.
37 Ai ma titah galangan situtungon, galangan sipanganon, galangan pardousaon, galangan parsalahan, galangan pangondosonkon ni tohonan pakon galangan pardameian,
38 na tinonahkon ni Jahowa hubani si Aron i Dolog Sinai, bani ari na hinatahonni ai halak Israel manggalangkon galangan ni sidea bani Jahowa i halimisan dohorhon Sinai.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA