Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Areya’ atoran-atoranna kurban tebbusanna kasala’an. Kurban jareya talebat soccena.
2 Keban se ekagabay kurban kodu esambelli e kennengnganna panyambelliyanna keban se ekagabaya kurban obbaran, dharana pas serammagi ka sakalenglengnga peggirra mezba.
3 Gajina kodu ekala’ kabbi, sarta eatorragi e mezba, iya areya bunto’na se badha gajina, gaji se notobi essena tabu’na,
4 bingselanna ban gajina, ban bagiyanna atena se paleng bagus.
5 Imam kodu ngobbar gaji jareya kabbi e mezba menangka kurban kakanan ka PANGERAN. Kurban jareya kaangguy tebbusanna kasala’an.
6 Saneyap lalake’ balana mam-imam jareya olle ngakan daging kurban jareya, mon ngakan kodu e kennengngan se la etantowagi kaangguy kaparlowan jareya, sabab kurban jareya ce’ soccena.
7 Atoranna kurban pangamponanna dusa ban kurban tebbusanna kasala’an padha bai, iya areya: Dagingnga keban se ekurbannagi daddi bagiyanna imam se ngatorragi kurban jareya.
8 Bariya keya kole’na kurban obbaran.
9 Saneyap kurban sasajin se eeppan e pappanan otaba eola e paguringan otaba se epanggang, daddi bagiyanna imam se ngatorragi kurban jareya.
10 Tape kurban sasajin se ta’ eola, se ecampor ban mennya’ otabana se kerreng, kabbi bagiyanna mam-imam toronanna Harun, ban kodu ebagi rata e antarana reng-oreng jareya.
11 Areya’ atoran-atoranna kurban salameddan se eatorragi ka PANGERAN.
12 Mon kurban jareya eatorragi kaangguy asokkor, kodu elambane roti se ta’ eragi’i. Roti jareya olle roti se kandel dhari adun teppong ban mennya’ jaitun, olle keya roti kerreng se tepes se ebulidi mennya’, otabana jajan dhari teppong se ecampore mennya’ jaitun.
13 Laen dhari jareya gi’ kodu etambai roti se eragi’i.
14 Dhari saneyap roti jareya sabagiyan kodu eatorragi ka PANGERAN menangka tor-ator kusus, ban jareya daddi bagiyanna imam se ngala’ dharana keban kurban gella’ ban se nyerammagi dhara jareya ka mezba menangka kurban salameddan.
15 Dagingnga kodu ekakan e are e bakto keban jareya ekurbannagi, ta’ olle badha karena sampe’ kalagguwanna maske sakone’a.
16 Mon kurban sambelliyan jareya eatorragi kalaban maksod ngessa’agiya neyat, otabana kaangguy kurban sokalella, ta’ parlo ekakan epatadha’ kabbi e are jareya keya. Lebbina olle ekakan kalagguwanna.
17 Mon sampe’ tello are gi’ badha karena, daging jareya kodu eobbar pasampe’ tadha’.
18 Mon saellana tello are gi’ badha karena dagingnga se ekakan, kurban jareya ta’ etarema bi’ PANGERAN, ban ta’ madhateng berkat ka orengnga se ngurbannagi, la’-mala’ haram. Oreng se ngakan eanggep sala ban kodu nanggung okomanna.
19 Daging se tasedding ka apa’a bai se najjis kodu eobbar epasampe’ tadha’, ta’ olle ekakan. Dagingnga kurban salameddan pera’ olle ekakan bi’ oreng se ta’ najjis.
20 Mon oreng se ngakan daging kurban salameddan jareya teppa’na najjis aba’na, ta’ eanggep anggotana ommadda Allah pole.
21 Bariya keya mon oreng ngakan daging kurban saellana nyedding ka barang se najjis, se asalla dhari manossa otaba keban, oreng jareya ta’ eanggep anggotana ommadda Allah pole.
22 PANGERAN apareng atoran-atoran reya ka Mosa
23 kaangguy bangsa Isra’il: Gajina sape, dumba otabana embi’ ta’ olle ekakan.
24 Gajina keban se mate dibi’ otabana se mate polana eceppa’ burun alas, ta’ olle ekakan, tape olle egabay kaparlowan laen.
25 Oreng se ngakan gajina keban se ekagabay kurban kakanan ka PANGERAN, ta’ eanggep anggotana ommadda Allah pole.
26 Oreng Isra’il, e dhimma’a bai kennengnganna, ta’ olle ngakan dharana mano’ otabana dharana keban laenna.
27 Sapa se ngalakone larangan reya ta’ eanggep anggotana ommadda Allah pole.
28 PANGERAN apareng atoran-atoran reya ka Mosa
29 kaangguy bangsa Isra’il. Pa’-sapa’a ngeba kurban salameddan, kodu malaen sabagiyan dhari kurban jareya se kodu egabay tor-ator se kusus ka PANGERAN,
30 se kodu egiba ban tanangnga dibi’ menangka kurban kakanan. Gaji ban dhadhana keban jareya kodu eatorragi menangka tor-ator kusus ka PANGERAN.
31 Imam kodu ngobbar gajina keban jareya e attassa mezba, tape dhadhana daddi bagiyanna para imam.
32 Pokang kanganna kodu ekagabay sombangan kusus
33 ka imam se ngatorragi dhara ban gajina kurban salameddan jareya.
34 Dhadhana keban jareya ban pokang kanganna daddi tor-ator kusus se epondhut PANGERAN dhari bangsa Isra’il se pas eparengngagi ka para imam. Jareya se kodu eatorragi bangsa Isra’il ka para imam kaangguy salanjangnga.
35 Dhari kakanan se eatorragi ka PANGERAN, bagiyan jareya se eparengngagi ka Harun ban tra-pottrana e bakto etahbissagi epadaddi imam.
36 E are jareya PANGERAN makon ka bangsa Isra’il sopaja dhari kurban tor-atorra, bagiyan dhadha ban pokang kanganna kodu eatorragi ka para imam. Atoran jareya kodu etoro’ salanjangnga bi’ bangsa Isra’il.
37 Kantha jareya atoranna kurban obbaran, kurban sasajin, kurban pangamponanna dusa, kurban tebbusanna kasala’an, kurban pantahbisan ban kurban salameddan.
38 PANGERAN marengngagi papakon jareya ka Mosa e Gunong Sinay e bakto Salerana makon bangsa Isra’il ngatorragi kurban e ra-ara Sinay.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA