¹ Zep nen mese Kristus hun de zeraha-en gwenkam zeno timnik biti gwek. Zep man nwe-mase gweꞌan: Kristus kim tilki, Zen neban mae golejuweka. Hen Zen kim etan ngaya gweka, hen ngatan zi mo lang san dep kim sewe seka, nesa dekam zep hen golesesek gwe seka. Zen in zep, nen anakarekam eenlala gwe-gwen, “Ano angna, zen awe hom gweꞌara. Zen ngatan zi mo langnak gweꞌara– men zao Kristus Alap mo dam taha nakon teipsinkim nikinꞌirake.”
² Zep neno mae mo enlalana dikire gulk de lang ennak edohon gwek– men zewe hen neno mae mo angna egwe gweꞌanke. Okamanak awe bap zen.
³ Okamanak awe, nen tok-tok makare nike lowe heꞌan. Sap neno mae mo angna Kristus angkam Alap zere onak golelowehe gweꞌara– men zewe enho aha-erekam Alap zere han e gweꞌarake.
⁴ Neno mae mo eiwakam de angna, zen Kristus onak. Zep Alap kim de Kristussu tingare zi hip zertreizimꞌinka, nen hen dekam zewe! Hen nen dekam teipsin-teipsin zi mo kim esa Kristus mo alp nakon zere mo ngatannak hen lowehe gwer.
⁵ Zen in zep, ere mae mo auhu-kama tim nikore hole-hlena emki gwirsik irin– anakarena, kahalo gwen hap de hole-hle, wesya de lirak oson hap de hole-hle, swi enkam de gwe gwen hap de hole-hle, aha karek maesa de gon hap de hole-hle, hen te-ala beya gwen hap de hole-hle naye. Te-ala beya gwen hap de hole-hlena in, zeno nwe-masena apdenak– yang tasin dowalsa de boklesa kom so gweblan nabanye. Sap te-ala beya gwen hap de enlalakam de gwe gwenkam, dekam hwena Alapsa lip sane e gweblanan.
⁶ Zen kirekam zini karekna nulin halasen gwenan, hwena zen dekon zep Alap mo jala okamanak de hatan hap golek de gweꞌan. Zini men zen kirekam Alap mo dwam gwibin srem san lowehe gwenan, Zen dekam sa timbwas tabir zira.
⁷ Nen hen menkam kirekame lowehe gwek. Nesa hen dekam kirekam-kirekam hole-hlena in zen hule gwek.
⁸ Hwena angkam nen ki nere mae mo kirekam-kirekam hole-hlena insa hiri gun– wal bosyansa de u sal-sal gweblan, husus gweblan, lamang tan, wakwak tan, hen nop-nop gweblan mae naye.
⁹ Nere mae mo Kristen bose walya bap nen boton ta gwibin. Sap nen mese nere mae mo epba kirekam-kirekam naban hole-hle naban baju epbasa de hiri son makan hiri osok.
¹⁰ Dekam zebe hwena ngatan zi mo langnak dep de enlala esena baju ese mo kim alala lak. Nen angkam san de aha zi, esena. Alap men Zen nesa yang tabirki, Zen man etan nesa ese ta gwibirida– zere mo kim dikim eliwehen hap, hen zenaka dikim hli-hli tasin hip.
¹¹ Zep nen an angkam san de ese yang tabinni kiye. Zep kire zini zen bejen etan zenaka anakan klis gul gwen: “An Yahudi zi.” “An Yahudi srem zi” “An to mipsa de blaonsublunna.” “An kire sremna.” “An aha zi ausu nakore zi.” “An kareksa de gol gwen zi ausu nakore zi.” “An zi mo tana iltikinnik de babu gwen zi.” “An kire srem zi.” Sap nen an kitak Kristus hun de zeraha-en gwen zi, hen Zen angkam neno mae mo enhonak gwe gweꞌara.
¹² Zen in zep, nen Alap mo hlil irin zi mo kim nen lowehe gwen. Sap nesa mes zere han dikim zeraha-en gwen hap ngan tasibirki. Zep nen an zen– Zeno kwasang gwibiridan wenyaye. Zep nen ki nere mae mo lowehen esena insa pakean ese mo kim alala ta gwen– anakarekam de lowehe gwenkam, dawemsa hen kwasang-kwasangsa de tingare zi hip gol gwizimdinkim, enlala betekkam de lowehe gwenkam, tingare zisi de sae-sae enkam golelowehe gwenkam, hen tatem de ezauk gwenkam.
¹³ Jala bap nen lam gul gwen– dekam de hwe-hwekam nenaka kareksa gol gwizimdin hipye. Hwena nen ki hwe-hwekam kwasang tola ban karekna insa eititi gwe-gwibin. Sap Alap mes Kristus mo kwasang-kwasang nakon neno mae mo karek-karekna eititi gwibir-zimki, zep nen hen diki kirekam nen eititi gwe-gwibin.
¹⁴ Hwena bol-zaun tanganna, nenaka nen kwasang gwibirida gwen. Zen san de tak esesa de daunnu kiye– pakean esena insa dikim jak sosun hup. Zen dekam tangan esa aha-ere enlalakam lowehe gwer.
¹⁵ Sap Alap mes nesa kwang guludaka– Kristus mo timnik de biti gwenkam dikim eaha-en gwen hapye. Zen zep Kristus onakore aha-ere enlalakam de lowehe gwen hap dena in, dikire nesa enho nakon irik gik. Deban Alap hap nen dawemsa golbla tine gwen.
¹⁶ Kristus hup de ol dawemna dikire neno mae mo enhonak dawem enkam sa gwek. Hen tingare Kristus onakore enlala blalkam nen nenaka tawa ta gwibin, hen dawem san dep nen dekam nenaka titi ta gwibin. Hen Alapsa nen enho nakon terya ban isrip-sri gwe-gweblan– sap Alap mo ebpa ola kore terkam, Kristus hup de terkam, hen sap Alap mo Enho nakore terkam.
¹⁷ Neno mae mo lowe henna, sap syala hen ola, dikire Bian Yesus mo bose ensa dikim teip gulsuk gweblan en hap lwa gwek. Hen deban Bian Alap hap nen dawemsa golbla tine gwen– Kristus insa dawemna nebe mae hap gol gwizimnirake.
¹⁸ We walya, emki ere mae mo zi walya blikip gwesibirida gwen, sap Kristen we wal hap zen kirekam dakastilzimꞌin.
¹⁹ Zini, emki ere mae mo we walya kwasang gwibirida gwen. Jal-jalkam bahem golelowehe gwen.
²⁰ Walasna, ane-bia mo ol san em ang ta gwen. Bian Alap dekam sa hen emsa sam gwesibiridala.
²¹ Bi walkam dena, ere mae mo walasna bahem u sal-sal ta gwibin. Ki hwena enlala nik sa edowe hana gwer.
²² Zi mo tana iltikinnik de ebabu gwe-gwen wenya, ere mae mo okamanak de zi bina in mo ol san em ang ta gwen– sap zen de emsa kara ta gwennak, hen sap kara tan sremnak. Hen tingare enho naban em betek gwibirida gwen. Sap em dekam ere mo eiwakam de zi bina Bian Yesussue hen blikip eisik gweblanan.
²³ Zep banakare maesa de syal gwibinkim, tingare enho naban em anakare enlala naban syal ta gwen, “Ëe an zisi home babu gweblaꞌan. Hwena Bian Yesus mo abe hap de dwam gwibir-blinna, zen ere mo zi bina an, zeno ek nakon sa wet so gwer.”
²⁴ Zen kire enlala naban em syal-syalkam syal ta gwen, sap ena anakan tawana, “Zen diki Bian Yesus sa ere mo syal eini ap golblala– Zen kim zere mo hlil irin zi hip de hamal gulzimdinni insa golzimꞌinkaye.” Eiwa, Zen Zen en tangan emsa bi gweblaꞌara.
²⁵ Hwena emki eenlala gwen: Men zen karekna nol gwenan, Alap sa etan zere mae mo karek gon jam enkam karek tabiri– sap bose nabare wenya, hen sap bose srem wenya. Alap hom ahakore en naka auhu-kama zi mo kim goleake gwenda.