Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Imam agung betanya jama Stefanus, "Api sunyinni sai dicawako ulih jelma udi benor?"

² Stefanus ngejawab, "Puari-puari rik Bapak-bapak! Cuba dengiko nyak! Semakkung nenek muyang ram Abraham malih mik Haran, pada waktu ia masih tinggal di Mesopotamia, Allah sai mulia ratong jama ia

³ rik cawa, 'Tinggalko negerimu rik sanak puarimu. Mikdo mik negeri sai haga Kutunjukko jama niku.'

⁴ Maka Abraham ninggalko negeri Kasdim, raduni malih mik Haran. Radu jak bakni Abraham mati, Allah nyani Abraham malih mik negeri inji sai Puari-puari rik Bapak-bapak sunyinni tinggal tano inji.

⁵ Pada waktu seno mak ngedok sebagian pun jak negeri inji sai Allah keniko jama Abraham untuk jadi milik Abraham; setapak pun mak dikeni jama ia. Kidang Allah bejanji bahwa Ia haga ngeniko jama Abraham untuk jadi kedau Abraham rik keturunanni. Waktu seno Abraham mak ngedok anak.

⁶ Kidang injido sai dicawako Allah jama ia, 'Keturunanmu haga tinggal sebagai ulun asing di negeri ulun bareh. Ulun-ulun negeri udi haga ngejajah tian rik kejam memperlakuko tian selama epak ratus tahun.

⁷ Kidang Nyak haga ngehukum bangsa sai nindas tian, rik tian haga luah jak negeri ano rik haga nyumbah Nyak di rang inji.'

⁸ Radu jak cawa injuk reno perjanjian ano disahko ulih Allah jama upacara sunat. Maka radu jak Ishak, anak Abraham laher, Abraham nyunat ia waktu ia beumor walu rani. Kak raduni Ishak nyunat juga anakni, yakdo Yakub. Rik Yakub pun nyunat muneh kerua belas anakni, yakdo sai jadi bapak-bapak leluhur bangsa Yahudi.

⁹ Bapak-bapak leluhur ram udi sesera jama Yusuf, hingga tian ngejual ia jadi budak di Mesir. Kidang Allah jejama jama ia,

¹⁰ rik ngelepasko ia jak sunyinni kesusahanni. Allah ngeniko jama ia kasih rik kebijaksanaan waktu ia ngehadap Firaun raja Mesir, hingga Firaun ngejadiko ia gubernur negeri Mesir rik sai bekuasa istana Firaun.

¹¹ Kak raduni tejadi suatu zaman kebetohan sai balak di sunyinni negeri Mesir rik Kanaan hingga ulun menderita nihan. Nenek muyang ram mak ngedok kanikan.

¹² Maka waktu Yakub ngedengi wat gandum di Mesir ia ngayun anak-anakni, nenek muyang ram, mik di dudi untuk mula-mula nihan.

¹³ Waktu tian mik kerua kalini, Yusuf ngeni pandai jama puari-puarini ano bahwa iado Yusuf. Ampai waktu senodo raja Mesir pandai tentang keluarga Yusuf.

¹⁴ Kak raduni Yusuf ngirim kabar jama bakni, yakdo Yakub, untuk ngilu ia jama-jama sunyinni keluargani malih mik Mesir -- sunyinni wat pitu puluh lima jelma.

¹⁵ Maka Yakub malih mik Mesir rik di dudido ia rik nenek muyang ram mati.

¹⁶ Mayat tian kak raduni diusung muloh mik Sikhem rik dikuborko di kuboran sai radu dibeli jama sejumlah duit ulih Abraham jak suku bangsa Hemor jak Sikhem.

¹⁷ Waktu radu redik saatni Allah menepati janji-Ni jama Abraham, bangsa ram di Mesir radu betambah lamon.

¹⁸ Akherni sai raja bareh sai mak kenal jama Yusuf, memerintah di Mesir.

¹⁹ Raja udi mempermainko bangsa ram rik kejam jama nenek muyang ram. Ia memaksa tian ngetokko upi-upi tian sai ampai laher in telantar rik mati.

²⁰ Waktu zaman senodo Musa laher; ia upi sai helau nihan. Telu bulan sakani ia dipelihara di lamban bakni,

²¹ rik radu jak ia ditokko, anak bebai Firaun ngakuk ia, raduni memelihara ia sebagai anakni tenggalan.

²² Sunyinni ilmu bangsa Mesir diajarko jama ia rik ia jadi jelma sai bekuasa nihan delom cawa rik perbuatanni.

²³ Waktu Musa umor epak puluh tahun, timbul mirak delom hatini untuk mik ngeliak keadaan bangsani ulun Israel.

²⁴ Raduni ia ngeliak sai jelma jak tian dianiaya ulih sai jelma Mesir; maka ia ngebela jelma sai dianiaya udi jama ngebunuh jelma Mesir udi.

²⁵ Sangko Musa bangsani haga ngerti bahwa Allah sedang memakai ia untuk ngebebasko tian. Kidang kenyataan tian mak ngerti.

²⁶ Jemohni ia ngeliak muneh rua jelma Israel betinju, raduni ia berusaha ngedamaiko tian. Ia cawa, 'Keti inji muari. Mengapi keti betinju?'

²⁷ Kidang jelma sai mukul kantikni udi ngedurong Musa mik pingger raduni cawa, 'Sapa sai ngangkat niku jadi jelma sai mimpin rik hakim sekam?

²⁸ Api niku haga ngebunuh nyak juga injuk niku ngebunuh ulun Mesir udi nambi?'

²⁹ Waktu Musa ngedengi api sai dicawako ulih ulun udi, Musa lijung jak Mesir raduni tinggal di negeri Midian. Di dudi ia mansa rua anak.

³⁰ Epak puluh tahun radu jak seno sai malaikat Tuhan ratong jama Musa di padang gurun redik Gunung Sinai. Malaikat udi ratong di delom apui di semak belukar sai sedang nyala.

³¹ Musa hiran ngeliak hal seno, sehingga ia mik redik-redik untuk pandai api udi. Raduni ia ngedengi suara Tuhan cawa,

³² 'Nyakdo Allah nenek muyangmu; Nyak Allah jak Abraham, Ishak, rik Yakub.' Musa gegoran kerabaian hingga ia mak bani lagi ngeliak semak belukar udi.

³³ Raduni Tuhan cawa muneh, 'Lepasko selop sai niku pakai ano, mani tanoh di rangmu cecok ano yakdo tanoh sai suci.

³⁴ Nyak radu ngeliak rik memperhatiko pahikni penderitaan umat-Ku di Mesir. Nyak radu ngedengi keluhan tian, Nyak ratong untuk ngebebasko tian. Tano, ija! Nyak haga ngutus niku muloh mik Mesir.'

³⁵ Musa injido Musa sai mak diakui ulih bangsa Israel rik sai ditulak jama cawa injuk reji, 'Sapa sai ngangkat niku jadi jelma sai mimpin rik hakim sekam?' Kidang justru iado jelma sai diutus Allah untuk jadi jelma sai mimpin rik penyelamat, jama bantuan malaikat sai ratong jama ia di semak belukar sai menyala udi.

³⁶ Musa udido sai memimpin bangsa Israel luah jak Mesir jama ngelakuko keajaiban-keajaiban rik hal-hal luar biasa di Mesir, di Laok Suluh, rik di padang gurun selama epak puluh tahun.

³⁷ Iado juga Musa sai cawa jama bangsa Israel, 'Allah haga ngeniko jama niku sai nabi sai dipilih jak hantaramu tenggalan, gegoh injuk Ia memilih nyak.'

³⁸ Musado sai di tengah-tengah bangsa Israel di padang heni, jadi perantara untuk malaikat sai cawa jama ia di Gunung Sinai jama nenek muyang ram. Iado sai nerima jak Allah kabar sai hurik untuk disampaiko jama ram.

³⁹ Sekalipun injuk reno nenek muyang ram mak haga taat jama ia. Tian nulak ia rik mirak muloh mik Mesir.

⁴⁰ Tian cawa jama Harun, 'Sanido diwa-diwa untuk sekam, in diwa-diwa udi mimpin sekam. Mani sekam radu mak pandai lagi api sai tejadi jama si Musa udi sai ngusung sekam luah jak Mesir!'

⁴¹ Raduni pada waktu senodo tian nyani sai patung anak jawi, raduni tian ngeni persembahan kurban jama patung udi rik nyani pesta untuk memuja patung sai disani tian tenggalan.

⁴² Maka Allah ninggalko tian rik naganko tian nyumbah bintang-bintang di langit. Udi nutuk api sai tetulis delom buku nabi-nabi. Injuk reji, 'Hai jelma-jelma Israel! Lain hak untuk Nyak niku nikol rik ngurbanko binatang selama epak puluh tahun di padang heni.

⁴³ Kemah berhala Molokhdo sai niku usung-usung jejama jama patung binatang berhalamu, yakdo Refan; anodo patung sai niku sani untuk disumbah. Ulih sebab seno Nyak haga ngetokko niku sampai jaoh mik seberang di negeri Babel.'

⁴⁴ Kemah rang Allah ratong jama manusia didapok jama nenek muyang ram di padang gurun. Kemah udi disani atas perintah jak Allah jama Musa rik nutuk cuntoh sai diliakko Allah jama Musa.

⁴⁵ Kak raduni kemah udi diusung ulih nenek muyang ram pada waktu tian rik Yosua mik ngerebut negeri ram inji jak kekuasaan bangsa-bangsa sai diuser Allah di hadapan tian. Kemah udi wat di dudi sampai zaman Daud.

⁴⁶ Daud nyenangko hati Allah rik ngilu jama Ia in ia diizinko nyani sai lamban untuk Allah sai disumbah Yakub udi.

⁴⁷ Kidang Salomodo sai ngediriko lamban untuk Allah.

⁴⁸ Kidang Allah Sai Mahatinggi mak tinggal di delom lamban sai disani manusia; mani di delom buku nabi tetulis injuk reji,

⁴⁹ 'Langit ano takhta-Ku, rik bumi alas cukut-Ku. Lamban api sai niku haga diriko untuk Nyak? Dipa rang untuk Nyak istirahat?

⁵⁰ Bukankah Nyak tenggalan sai ngejadiko sunyin hal?' renodo cawa Allah.

⁵¹ Bukan main keras ulu Puari-puari rik hara payah taat jama Allah! Cupingmu tilu nihan tehadap cawa Allah! Keti gegoh jama nenek muyangmu; selalu ngelawan Ruh Allah!

⁵² Api wat nabi sai mak dianiaya ulih nenek muyangmu? Tian ngebunuh utusan-utusan jak Allah sai tumbai radu ngumumko bahwa Jelma Sai Ngebantu Allah sai benor udi haga ratong. Rik tano keti ngekhianati rik ngebunuh Jelma Sai Ngebantu Allah udi.

⁵³ Malaikat-malaikat radu nyampaiko perintah-perintah Allah jama niku kidang keti mak nutukni!"

⁵⁴ Reno anggota-anggota Mahkamah Agama udi ngedengi sunyinni sai dicawako ulih Stefanus, tian sakik hati rik butong nihan jama ia.

⁵⁵ Kidang Stefanus sai dikuasai ulih Ruh Allah, ngeliak mik langit. Ia ngeliak kemuliaan Allah rik Isa cecok di rang bekuasa di kebelah kanan Allah.

⁵⁶ "Liak," cawa Stefanus, "nyak ngeliak surga tebukak rik Anak Manusia cecok di kebelah kanan Allah!"

⁵⁷ Anggota-anggota mahkamah udi nyalok cuping tian sambil mekik-mekik, raduni jama-jama nyerang Stefanus.

⁵⁸ Tian nyiret ia mik luah kota kak raduni nayar ia jama batu. Jelma-jelma sai nyaksiko kejadian udi nitipko kawai tian jama sanak ngura sai gelarni Saulus.

⁵⁹ Sementara tian nayar Stefanus, Stefanus beseru, "Tuhan Isa, terimado ruhku!"

⁶⁰ Raduni ia belutut rik mekik jama suara sai keras, "Tuhan, dang dusa inji ditanggungko di atas tian!" Seraduni nyawako injuk reno ia pun mati.

Kisah Para Rasul

Video Kisah Para Rasul 7

Ikuti Kami:

KONTAK | PARTISIPASI | DONASI