Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kidang wat sai jelma bakas gelarni Ananias. Ia jama inggomni gelarni Safira, ngejual juga sebidang tanoh kedauni tian.

² Duit jak penjualan udi sebagianni ia segokko untuk dirini tenggalan rik sai barehni ia serahko jama rasul-rasul. Ia ngeguaiko ano inggomni juga pandai.

³ Maka Petrus cawa jama ia, "Ananias, mengapi niku naganko iblis nguasai hatimu, sampai niku bebuhung jama Ruh Allah, hema-hema nyegokko untuk dirimu tenggalan sebagian jak duit penjualan tanoh udi?

⁴ Tanoh udi kedaumu semakkung niku ngejualni. Rik seraduni tanoh udi dijual pun, duitni masih juga kedaumu. Jadi mengapi wat maksud di delom hatimu untuk bebuat injuk reno? Lain manusia sai niku buhungi kidang Allah!"

⁵ Reno Ananias ngedengi cawa-cawa udi, ia tumbak, raduni mati. Sunyinni jelma sai ngedengi tentang kejadian udi jadi rabai.

⁶ Maka jelma-jelma ngura ratong ngebungkus mayat Ananias, raduni diusung mik luah untuk dikuborko.

⁷ Kekira telu jam jak seno, inggomni kuruk. Ia mak pandai api sai ampai tejadi.

⁸ Petrus cawa jama ia, "Cuba keni pandai jama nyak: Api kedo tanoh sai niku rik kajongmu jual udi, selamon reji regani?" "Temon, reno regani," jawab inggomni Ananias.

⁹ Raduni Petrus cawa jama ia, "Mengapi niku rik kajongmu sepakat untuk nyuba Ruh Tuhan? Dengiko! Jelma-jelma sai nguborko kajongmu radu muloh. Tian haga ngusung niku mik luah juga."

¹⁰ Waktu seno juga inggomni Ananias udi tumbak rik mati di hadap Petrus. Rik waktu jelma-jelma ngura udi kuruk, tian ngehalu ia radu mati. Raduni ngusung mayatni mik luah rik nguborkoni digeler kajongni.

¹¹ Maka sunyinni jelma-jelma percaya udi rik jelma-jelma barehni, sai ngedengi tentang peristiwa udi, jadi rabai.

¹² Ulihni guaini rasul-rasul maka lamon keajaiban rik hal-hal luar biasa tejadi di hantara masyarakat. Sunyinni ulun percaya sehati bekumpul di Serambi Salomo di Lamban Ibadah.

¹³ Rik jelma luah mak ngedok sai bani ratong bekumpul jama ulun-ulun percaya udi. Kidang ulun-ulun percaya udi dihormati nihan ulih masyarakat.

¹⁴ Rik makin saka makin betambah lamon jelma-jelma sai percaya jama Tuhan -- baik bakas maupun bebai.

¹⁵ Malah keadaan jadi sebegitu rupa, sampai jelma-jelma meruyuh dipikko di atas rang pedom atau apai, raduni diusung mik renglaya, in tian paling cutik dapok kena halinu Petrus, kik Petrus liu di dudi.

¹⁶ Beduyun-duyun ulun-ulun ratong jak kota-kota sekitar Yerusalem. Tian ngusung jelma-jelma sai meruyuh, rik sai kekurukan ruh-ruh jahat. Rik sunyinni jelma udi dimunyaiko sunyinni.

¹⁷ Akherni imam agung rik seluruh jelma-jelma sai nutuk ia, yakdo golongan ulun-ulun Saduki, mulai betindak, mani tian sesera.

¹⁸ Rasul-rasul udi ditangkok, raduni dikurukko mik delom bui umum.

¹⁹ Kidang di bingini, sai malaikat Tuhan ngebukak rangok-rangok bui, raduni ngusung rasul-rasul udi mik luah. Malaikat udi cawa jama rasul-rasul udi,

²⁰ "Mikdo cecok di Lamban Ibadah rik keni pandai jama ulun-ulun tentang hurik sai ampai inji."

²¹ Maka rasul-rasul udi pun nurut luhot malaikat udi. Pagi-pagi nihan tian mik di Lamban Ibadah rik mulai ngajar di dudi. Sementara ano imam agung rik jelma-jelma sai nutukni ratong, raduni ngadako sidang mahkamah jama jelma-jelma sai mimpin Yahudi. Kak raduni tian ngayun ulun mik ngakuk rasul-rasul udi jak bui untuk diusung ngehadap tian.

²² Kidang waktu jelma-jelma sai dikayun udi sampai di bui, tian mak ngehalu rasul-rasul udi di disan. Jadi tian muloh, raduni ngelaporko hal udi jama mahkamah.

²³ "Waktu sekam sampai di bui," ani tian jama mahkamah, "sekam ngehalu rangok bui udi tekunci betik-betik, rik pengawal-pengawal sedang jaga di rangok. Kidang waktu sekam ngebukak rangok udi, sekam mak ngehalu sai jelma pun di delomni."

²⁴ Waktu perwira pengawal Lamban Ibadah udi rik imam-imam kepala ngedengi laporan udi, tian bingung mengenai rasul-rasul udi, rik rabai haga api sai dapok tejadi.

²⁵ Radu jak seno ratong sai jelma bakas ngusung kabar inji, "Dengiko! Jelma-jelma sai Tuan-tuan tahan di bui udi tano sedang ngajar jelma lamon di Lamban Ibadah!"

²⁶ Maka perwira pengawal Lamban Ibadah udi jama-jama pengawal-pengawalni mik ngakuk rasul-rasul ano luot. Kidang tian mak ngegunako kekerasan, mani tian rabai jama jelma lamon; dang-dang jelma lamon udi kanah nayar tian jama batu.

²⁷ Rasul-rasul udi diusung kuruk ngehadap mahkamah. Raduni imam agung memeriksa tian.

²⁸ Ia cawa, "Sekam radu ngelarang keras jama keti in dang ngajar tentang Ulun udi. Kidang tano cuba liak api sai keti lakuko! Keti nyebarko pengajaranmu udi di seluruh Yerusalem, rik keti malah haga nuduh bahwa sekamdo sai penyebab kematian Ulun udi."

²⁹ Petrus rik rasul-rasul sai barehni ngejawab, "Sekam harus nutuk Allah rik lain hak nutuk manusia.

³⁰ Isa, sai keti salibko, radu dihurikko luot jak kematian ulih Allah nenek muyang ram.

³¹ Rik Allah radu ngeniko jama Ia kedudukan rik kekuasaan sai langgar sebagai Jelma Sai Mimpin rik Penyelamat; in bangsa Israel dikeni kesempatan untuk betubat jak dusa-dusani rik mansa keampunan.

³² Sekamdo saksi-saksi mengenai sunyinni ano -- sekam rik juga Ruh Allah sai dikeniko ulih Allah jama jelma-jelma sai nurut perintah-perintah-Ni."

³³ Waktu anggota-anggota Mahkamah Agama udi ngedengi ano, tian butong nihan, rik tian sepakat untuk ngebunuh rasul-rasul udi.

³⁴ Kidang di hantara anggota-anggota mahkamah udi wat sai jelma Farisi gelarni Gamaliel. Ia guru agama sai dihormati nihan ulih sunyinni jelma. Ia cecok raduni ngayun jelma ngusung mik luah rasul-rasul udi serebok.

³⁵ Kak raduni ia cawa jama Mahkamah Agama udi, "Puari-puari ulun-ulun Israel! Pikerko betik-betik mengenai api sai haga Puari-puari lakuko tehadap jelma-jelma inji.

³⁶ Mani tumbai pernah muncul Teudas, sai nganggap diri ulun balak, sehingga kekira-kira epak ratus jelma nutuk ia. Kidang ia dibunuh rik sunyinni jelma-jelma sai nutuk ia cerai-berai rik gerakanni pun lebon.

³⁷ Radu jak seno, waktu wat sensus, muncul muneh Yudas, jelma jak Galilea. Ulih pengaruhni, lamon juga sai nutuk ia. Kidang ia juga tebunuh, rik sunyinni jelma-jelma sai nutuk ia cerai-berai.

³⁸ Jadi tano jama peristiwa inji, nasihatku yakdo: dangdo bebuat api-api tehadap jelma-jelma inji, taganko gaoh tian. Mani kik ajaran-ajaran rik gerakan tian inji jak manusia, maka ajaran rik gerakan ano haga lebon.

³⁹ Kidang kik udi ratong jak Allah, maka Puari-puari mak dapok ngalahko tian. Malah halokni ternyata kanah bahwa Puari-puari ngelawan Allah." Petuah Gamaliel udi diterima ulih mahkamah.

⁴⁰ Maka rasul-rasul udi diurau, raduni dilecut, kak raduni dilarang ngajar lagi tentang Isa. Radu jak seno, ampai tian dilepasko.

⁴¹ Rasul-rasul udi ninggalko Mahkamah Agama udi jama riang nihan mani Allah radu nganggap tian patut untuk mansa hinaan ulihni Isa.

⁴² Rik unggal rani di Lamban Ibadah rik di lamban-lamban ulun, tian terus ngajar rik nyiarko Kabar Betik tentang Isa bahwa Iado Raja Penyelamat sai dijanjiko udi.

Kisah Para Rasul

Video Kisah Para Rasul 5

Ikuti Kami:

KONTAK | PARTISIPASI | DONASI