¹ Dawem, Bian Teopilus Bak, Lukas ona kon: Nonol mensae ebe hap ale gulbluk, zao mese kitak emsa aisil gweblak– Yesus mensa syal gwe-gwibirki hen tawa ta gwibirkiye, men dekon nonol syala kon gwesibir hanaka,
² hendep Alap ngatan zi mo lang san dep zer ine halka. Hwena zer inehan sremnak aumwa hap de ola kim zere mo dam tasibin zini tonbirida gweꞌanka, Alap mo Enhona dekam zep dekam de tame gun hup de sosonna golzimki.
³ Karek yala insa de goltowennak kim tilki, dekon kim etan ngaya gweka, Zen empat-pulu yaklakam etan-etankam zere hon de ang ta gwen wenya kip Zenaka zertrei gwizimꞌinka. Zen hen dekam owas-owasna man syal gwe-gwibir-zimꞌinka– dekam de anakan taibliblan hap, “Zen eiwa mes tangan ki etan ngaya gweka.” Dekam hen Alap Zen de irik gin hip denaka tawa ta gwibiꞌinka.
⁴ Aha yaklakam kim goletembane gweꞌanka, dekam zep gubiridaka, “Yerusalem an kon na-en bahem sek gwen. Men desae emsa gubirida gwek, Bian de kiresa ebe mae hap zer sonezimdin hip dena, desa em kon kara gweblan.
⁵ Sap Yohanis zen hokam baptis ta gwibirki, hwena molya holo gwek, emsa hwena Alap zere mo Enhokam sa baptis ta gwibiri.”
⁶ Zere hon de ang ta gwen wenya in kim ze nama tagam neblaꞌak, ki zep ze dakensik gweblaꞌak, “Bian, Em san ha angkam tangan esa Israelsa teipsibiridala– Roma mo irik gin nikon dikim asa gwiswe sonen hapye?”
⁷ Ki zep ding gulzimki, “Ebe mae hap hom nere mae mo Bianna golzimꞌira– em dikim hamal hap anakan etawa gwen hapye, ‘Israel dekam sa eze-en gwer.’
⁸ Hwena Alap sa ebe mae hap sosonna golzimdi– zere mo Enhona kim de ebon mae ing gweꞌankaye. Em dekam esa abe hap dena ol halada gwer– nonol tanganna Yerusalemk awe, hen awe de langna an san, hendep Samaria, hendep okama topse gwenna.”
⁹ In kim ki ze kirekam tonbiridaꞌanka, Alap ki zep zeno mae mo nwenak zer ine halka. Hendep butna ki zep zeno mae mo nwe nakon aning ta inehak.
¹⁰ Yesus in kim sewe seꞌanka, zen nama ngli san ekara gwe seꞌak. Hwena mumuk ennak zep zi darena baju ngap-ngap ala oson naban jo ke ine zaka. Zeno mae mo alp nakon yauꞌunka,
¹¹ ki zep ze enbiridaka, “Galileak de zi, em ba habe gulk sun ekara gwe seꞌan? Yesussu in Desa zer ine hannak kara la soner, Zen in kirekam kara la sonenan, kirekam sa etan lwahal zala.”
¹² Zaitun tra nabare kwatap tekna in zao lowe heꞌak, Yerusalem kon langana aha-ere kilometer enkam. Zen kim kon etan Yerusalem san dep lwanda halzak,
¹³ golak kim yaing gwezak, ki zep gulk de tekson san dep sesek gwek– men zewe zena lowehe gwekke. Zeno mae mo bosem-sena: Petrus, Yohanis, Yakobus, Andreas, Pilipus, Tomas, Bartolomeus, Matius, hen aha zini Yakobus– zen Alpeus mo tane, hen Simon. Zen men zen nonol Israel dikim Roma mo irik gin nikon eze-en gwen hap de easas gwennak ang gwekake. Hen ahana, Yakobus mo tanena Yudas.
¹⁴ In zen ze lowehe gweꞌak, we walya hen ki. Ahana Yesus mo anena Maria. Yesus mo oso walya hen zao lowe heꞌak. Zen kitak aha-ere enlala naban Alapsa nen sonebla tine gweꞌak.
¹⁵ 18Yudas in zen Yesussu zerguku, te-alana mensa zere mo syal karekna inkam nerblak, dekam zep ngana zerka. Hwena ngana iwe zep karekkam zanka. Usis ahlena hendep kitak tangan teiswen nahlablak. 19Yerusalemk de wenya kim tingan nasalblandak, zen dekam zep hwena ngana insa zere mae mo olkam bose dak, “Akeldama”kam. Zeno enlalana “Zi Kal Kama.” 15In zen Yesussu de taibliblan wenya gulk de teksonnak etagal gwek, beyana 120 enkam. Petrus dekam zep zeno mae mo ngirin nikon luweka, 16-17ki zep gubiridaka, “Aya-wal oso-wal, eiwa Alap mo hamal hap de ola, zen aha-en mae bejen jowe srem gwen. Zep Yudas Bak hap dena mensa Alap mo Enhona hamal hap Daud Bak hap golblaka, zen mes ki kirekam lwak. Sap zen neno mae mo apde syal bose– mensa Bian hen dam tasiki, hwena zen ki zep Yesussu de balk tan hap zon guluda zaka.
¹⁶ (1:15)
¹⁷ (1:15)
¹⁸ (1:15)
¹⁹ (1:15)
²⁰ Daud Bak mensa buku Mazmuruk ahana Yudas hap dena hamal hap ale gulku, zen a kirekam moye: ‘Zeno gola dikire dan-en gwek, hen bap zen ze aha zi gwen.’ Hen etan anakan mas gulku, ‘Zeno syala dikire ahanik gulink.’
²¹ Zep nen esa ahanaka zisi zeno weinak dep dam lasil, dekam eka etan edua-blas gwek– Yesus hup denaka ekakim anakan ol halada gwek, ‘Zen mes tin nikon etan ngaya gweka.’ Hwena anakare zisi nen dam tasin: Men zen nonol lonesen nakon ang ta gwekke, in kim Yohanis Yesussu baptis taka, dekon Yesus mae han nebon mae ang ta gwek, hendep yakla in dekam neno mae mo ngirin klesnak zer ine halka. Zen kire naka esa dam lasil– men kiye hen nena.”
²² (1:21)
²³ Dekam zep men zen ze tagal gwek zi darena dam nososuk. Ahana Matias. Aha zini Yusup. Zeno bosena dan-ahan. Zen zep hen “Barsabas”kam ahaksa “Yustus”kum nen gweblak.
²⁴ Dekam zep kitak Biansa nen soneblak, “Bian, Em tingare zi mo enhona tawana. Yudas mes zere mo syala hli yulku– dekam de song gwen hap, men kirekam Ena hamal hap dam tasikike. Zep abe mae hap Em zi darena an kon anakan dam tasizimdin, ‘An zen sa zeno weinak syal gwera.’”
²⁵ (1:24)
²⁶ Kim egu sonesik, ki zep dobe abu mo kim syal neibik. Matiaꞌa zep dam dasik.