Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O Teopilus si’i wo’u buku to kutulisika korom. Ri raya bukungku to uyunya seore, aku mangantulis mangkonong samparia palaong to naika i Yesu pasi mangkonong samparia to Ia mampotundeka tau yako ri pomulanya Ia mangika palaong etu
2 rataka ri temponya i Pue Allah mangangokotaka muni Ia nto’u Saruga. Tempo Ia tawa natiokotaka etu, Ia magombo yako ri kuasa i Nosa Mapasing, mampaposiaka anaguruNya to ipilisiNya.
3 Wali ojo pampopate yau Ia, opo mpuyu mbengi kasaenya Ia malagi ngkani mampapokitaka anaguruNya koroNya pasi mampaponsanika sira mangkonong ewa wimba i Pue Allah mawali Makole nto lino. Wali manasa kojo Ia tuwu muni.
4 Pasi ri rayanya opo mpuyu mbengi etu, tempo Ia re’ewa sindara-ndara pei anaguruNya Ia mamporentangika sira, Ia manganto’o, “Ne’ewa mampiyaika kota Yerusalem si’i. Karoo ruyu rire mangampea sora to naparajanjika mPa’angKu komi, to Aku roomo mampakanasaka komi.
5 Apa i Yohanes to Pombaptis mangabaptisika tau ue, pei ri rayanya sawei mbengi si’i i Pue Allah damangabaptisika komi i Nosa Mapasing, batuanginya Ia damampaporoo i Nosa Mapasing ri raya ngkomi.”
6 Wali tempo anaguru i Yesu re’e sindara-ndara pei Ia ri rayanya opo mpuyu mbengi etu, sira mampotanaka resi Ia, sira manganto’o, “Wimba Pue, bara temponyamo Komi damangawaika muni to Israel maporenta ewa tempo owi?”
7 Wali i Yesu mangansono, to’oNya, “I Pue Allah, Pa’a, Ia semo to mampakatantu eonya pasi temponya. Yako ri kuasaNya Ia mampakatantuka. Pei Ia taa mangawaika komi mangansani temponya etu.
8 Pei tempo i Nosa Mapasing darata resi komi, tempo etu komi darawaika karoso. Pasi komi damawali matamanasangKu damangangkeni kareba yako resi Aku. Komi damangangkeni kareba etu resi tau to ri kota Yerusalem pasi tau to ri propinsi Yudea pasi Samaria, pasi rataka ri suogi lino.”
9 Wali ojo karoonya i Yesu mampogomboka anaguruNya etu panewa Ia tiokotaka ri tango nu mata nsira. Wali ilo’aka nsira Ia ilerung yau nu limu, wali sira tamo mangkita.
10 Tempo i Yesu tiokotaka nto’u saruga etu, sira ojo mangalo’alo’aka nto’u yangi pei tempo etu kodi majoli re’e dua mba’a tau langkai to buya pakenya. Tau etu makore ri awe nsira,
11 pei manganto’oka sira, “Gete, komi to Galilea, maka pei komi ojo mangalo’a-lo’aka nto’u yangi? I Yesu to natiokotaka yau muni nto’u saruga mangampiyaika komi etu, Ia dama’i muni. Pei tempo Ia dama’i muni ewaja ri tempo katiokotakaNya to owo roo nukita ngkomi etu.”
12 Wali ojo karoonya tau dua etu magombo, anaguru i Yesu mawolili muni njo’u kota Yerusalem yako ri tongku Saitun. Tongku Saitun etu bara ojo samba’a kilo kalongkonya yako ri Yerusalem.
13 Wali tempo sira rata muni nja’u Yerusalem, sira mangampago banua to nakaroos nsira ri rayanya mangampeas sora to naparajanjika i mPue Allah, singkonong ewa to nato’oka i Yesu sira etu. Nja’u banua etu re’e wo’u songi to kadua ntampenya wali sira mapone ndate ria pasi siromu ndate ria semo. Sanga nsira to siromu etu i Petrus, i Yohanes, i Yakobus, i Andreas, i Pilipus, i Tomas, i Bartolomeus, i Matius, pasi re’e wo’u i Yakobus, ana i Alpeus, i Simon to mangangewa to Roma to mangamporentang to Yahudi, pasi i Yudas, ana i Yakobus.
14 Sira to sampuyu pei samba’a etu samba’a-mba’amo pampobuukanya, wali sira siromu damakai-kai. Pasi re’e seja sawei mba’a to we’a to siromu sindara-ndara pei sira. Pasi re’e seja indo i Yesu, etu semo i Maria, pasi re’e wo’u sawei mba’a tua’i i Yesu.
15 Wali re’e seore, tempo sira siromu mangampea sora yako resi i Pue Allah etu, re’e siromu tau satu pei dua mpuyu mba’a to paka samba’a pangayanya. Tempo sira siromu etu, i Petrus makore ri oyonya pei magombo, ia manganto’o,
16 “A’i-a’i, gombo i mPue Allah to ratulis ri raya ntuntuNya, gombo etu taa maya taa tibanang. Wali gombo etu nato’o i Nosa Mapasing tempo owi mangampake nganga i Makole Daud. Ia manganto’o yami mangkonong i Yudas to mawali matanjaya ntau to mangansoko i Yesu seore.
17 I Yudas etu ia seja yunu ngkita seore pasi ia seja rapilis mangika palaong sindarandara pei kita.”
18 (Wali mangkonong i Yudas etu, ia nawaika ntau doi tempo ia mamposora yau i Yesu, panewa doi to saro mpalaonginya to maja’a etu ipakenya mangoli tana. Wali nja’u tana nolinya etu ia maranta tudu tondo lionya ri tana. Tempo ia tudu ri tana etu komponya maputu wali samparia banang nu ngkomponya etu masuwu yau.
19 Wali palaong etu natikareba resi samparia tau to re’e ri kota Yerusalem, wali see naka tana i Yudas etu nato’oka nsira Hakaldama, apa ane ri basa nsira gombo etu batuanginya Tana Raa.)
20 Wali i Petrus mampakapolas gombonya, ia manganto’o gombo to natulis yami i Makole Daud tempo owi ri raya ntuntu i mPue Allah mangkonong i Yudas etu, to’onya, “Ri raya buku Masmur re’e ratulis gombo i Daud, to’onya, ‘Biakamo tampa to nakaroos etu rapiyaika yau. Ne’e rabiaka pasi samba’a tau maroo nja’u ria.’ Pasi re’e seja to ratulis ewa si’i, to’onya, ‘Biakamo palaong to si ia darawaika yau resi tau to yusa.’ Etu semo gombo to natulis yami i Makole Daud mangkonong i Yudas.
21 Wali apa saba gombo etu manganto’o palaong i Yudas darawaika yau resi tau to yusa, see naka kita taa maya taa mangampilis samba’a yunu ngkita damangabolos ia. Tau to datapilis etu, etu semo tau to sangkani mangalulu seja kita seore tempo i Pue Yesu re’ewa ri oyo ngkita.
22 Etumo yako ri tempo i Yohanes mangabaptis tau, rataka ri tempo i Yesu tiokotaka yako ri oyo ngkita. Wali tau to darapilis etu, ia damawali seja matamanasa sindarandara pei kita mangkonong i Yesu Ia tuwu muni yako ri kapateNya.”
23 Wali ojo karoonya i Petrus magombo, tau to siromu nja’u ria sira mangampilis dua mba’a tau to langkai. Tau dua etu samba’a sanganya i Yusup to rato’oka i Barsabas, pasi rato’oka seja i Yustus. Pasi sanga nu yununya i Matias.
24 Ojo karoonya sira mangampilis tau dua etu, sira makai-kai, sira manganto’o, “Pue, Komi mangansani samparia raya ntau. Wali suduka kami tau dua si’i bara to imba to nupilis ngKomi
25 damawali pomakauMu damangabolos i Yudas. Apa i Yudas ia room mampiyaika palaonginya etu pei nayau ri tampa to masipato ia yau.”
26 Wali ojo karoonya sira makai-kai, sira mabata’a see manasa to imba tau dua etu to napilis i mPue Allah. Panewa tempo sira mabata’a etu kono kojo i Matias to rasudu. Wali ia semo to rapaposua mawali wo’u pomakau i mPue Yesu sindara-ndara pei pomakaunya to sampuyu pei samba’a.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA