Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani suratku na parlobei in, ale Teopilus, husuratkon do pasal haganup na binahen ampa podah na pinungkah ni Jesus,
2 das ronsi na tarangkat Ia, dob lobei ibere parentah marhitei Tonduy Na Pansing bani apostel-apostel, na dob pinilih-Ni ai.
3 Dob salpu hamarsikon na tinaron-Ni ai, ipataridahkon do diri-Ni manggoluh bani sidea marhitei buei tanda, ai ma ibagas siompat puluh ari na pinataridahkon-Ni ai diri-Ni bani sidea, lanjar mansahapkon pasal Harajaon ni Naibata.
4 Sanggah na rap Ia pakon sidea, iparentahkon ma bani sidea, “Ulang ma laho hanima hun Jerusalem, tapi paima hanima ma na binagahkon ni Bapa, na dob ibogei hanima hun Bangku.
5 Ia si Johannes bah do ididihon, tapi Tonduy Na Pansing do didihonon-Ku bani nasiam, seng pala piga ari nari.”
6 Jadi sanggah na martumpu ai sidea, isungkun sidea ma Ia, nini ma, “Ham Tuhan, pajongjongon-Mu ma sonari use harajaon in bani Israel?”
7 Nini ma hubani sidea, “Seng urusannima ai mambotoh adanganni atap panorangni, na dob tinontuhon ni Bapa in ibagas kuasa-Ni sandiri.
8 Tapi jaloonnima ma hagogohon ni Tonduy Na Pansing na sogop bennima, anjaha gabe saksing-Ku ma hanima i Jerusalem ampa i sab Judea ampa i Samaria ampa das hu ujung ni tanoh on.”
9 Jadi dob ihatahon sonai, tarangkat ma Ia inonoi sidea, dob ai ilingodi hombun ma Ia humbani panonggor ni sidea.
10 Sanggah na ituludkon sidea ai Ia laho hu nagori atas, jongjong ma dua halak parhiou silopak i lambung ni sidea,
11 na mangkatahon, “Nasiam halak Galilea, mase ma sai jongjong nasiam kawah-kawah dompak datas? Anggo Jesus ai, na tarangkat hun lobei nasiam hu nagori atas, sonai do roh Ia, songon na nididah nasiam ai Ia naik hu nagori atas.”
12 Dob ai mulak ma sidea hu Jerusalem hun dolog ai, na margoran Dolog Jetun; dohor do ai hun Jerusalem, sada pardalanan Sabat do daohni.
13 Dob das sidea, tangkog ma sidea hu kamar pardatas ai, ianan ni sidea ai, ai ma si Petrus ampa si Johannes, si Jakobus ampa si Andreas, si Pilippus ampa si Tomas, si Bartolomeus ampa si Mateus, si Jakobus anak ni si Alpeus, ampa si Simon Selotes, ampa si Judas anak ni si Jakobus.
14 Sidea ai do haganup na marnunut marsada ni uhur martonggo rap pakon parinangon-parinangon ampa si Maria, inang ni Jesus, sonai homa anggi-Ni ai.
15 Bani panorang ai ma jongjong si Petrus i tongah-tongah ni sanina-sanina ai, bueini adong do hira-hira saratus dua puluh halak, nini ma,
16 “Nasiam hasoman sanina, maningon saud do hata ni Surat in, na dob nilumbahon ni Tonduy Na Pansing hinan marhitei pamangan ni si Daud, ai ma pasal si Judas, na gabe pambobai ni sitangkap Jesus.
17 Masuk hinan do ia hubani bilangannami, anjaha dihut do ia bani jabatan on.
18 Dapotsi do sanlambar tanoh humbani upah hajahaton ai; anjaha sanggah tungkap ia madabuh, mapultak ma dagingni, gabe mandarat ma ganup bituhani.”
19 Anjaha haganup do pangisi ni Jerusalem mambotoh ai, mambahen igoran tanoh ai ibagas sahap ni sidea: Akeldamah, artini: Tanoh Daroh.
20 Ai tarsurat do ibagas buku Psalm, “Sai halong ma iananni ai, anjaha ulang ma adong na mangiankon ai!” Ambah ni ai, “Jaloon ni na legan ma jabatanni!”
21 Halani ai maningon adong do humbani sidea na mangkasomani hanami, sadokah marhujai-hujon Tuhan Jesus i tongah-tongahta,
22 olat ni pandidion ni si Johannes nari das hubani partarangkat-Ni ai hun banta, na gabe hasomannami manaksihon pasal parpuhoon-Ni ai.
23 Jadi ipajongjong sidea ma dua halak, ai ma si Josep, na margoran si Barsabas anjaha na ginoran homa si Justus, ampa si Matias.
24 Jadi martonggo ma sidea, nini ma, “Ham Tuhan, sitanda uhur ni haganup jolma, patuduh Ham ma barang ise do humbani na dua on ipilih Ham,
25 gabe sijalo jabatan diakon ampa apostel, na dob tinadingkon ni si Judas, na dob laho marayak siparayakonni.”
26 Lanjar manjomput na sinurat ma sidea, jadi dapot ma si Matias, gabe tarhira ma ia hasoman ni apostel na sapuluh sada ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA