Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jenari nina TUHAN man Musa, "Tik nari idahndu me kai si Kubahan man raja. Kupaksa me ia gelah iberena bangsangKu lawes. Lebih asa si e, Kupaksa ia gelah ipelawesna bangsa e ndarat i negeri Mesir nari."
2 Ngerana Dibata man Musa nina, "Aku kap TUHAN.
3 Aku nggo ncidahken bana man Abraham, man Isak ras man Jakup maka Aku me Dibata si Erkuasa, tapi la Kupetandaken diringKu man bana alu gelarKu si Badia; TUHAN.
4 Kubahan pe sada padan ras ia i ja Kupadanken mereken taneh Kanaan man bana; nai ia nggo ringan i je bagi kalak pertandang.
5 Genduari nggo Kubegi penderkuh kalak Israel, si nggo iperbudak kalak Mesir, janah nggo Kuinget padanKu mbarenda.
6 Erkiteken si e turikenlah katangKu enda man kalak Israel: Aku kap TUHAN; Kuselamatken ateKu kam janah Kubebasken kam i bas perbudaken kalak Mesir nari. Kudadaken tanKu si megegeh nehken ukumen si mesangat man bana, janah Kuselamatken kam.
7 Kujadiken kam jadi bangsangKu janah Aku jadi Dibatandu. Itandaindu nge pagi maka Aku kap TUHAN Dibatandu, kenca Kubebasken kam i bas perbudaken i taneh Mesir nari.
8 Kutaruhken ateKu kam ku taneh si nggo Kupadanken man Abraham, Isak ras Jakup; janah Kubereken denggo taneh e jadi sikerajangenndu. Aku kap TUHAN."
9 Ituriken Musa si enda man bangsa Israel, tapi la ibegikenna ia, sabap nggo bene ukurna ibahan perbudaken si kejam e.
10 Emaka nina TUHAN man Musa,
11 "Laweslah, kataken man raja Mesir maka la banci la iberena bangsa Israel nadingken negeri e."
12 Tapi nina Musa erjabap, "Bangsa Israel pe la nggit megiken aku, apai denga ka raja? Aku tuhu-tuhu kalak si la beluh ngerana."
13 Jenari iperentahken TUHAN si Musa ras Harun nina, "Kataken man bangsa Israel ras man raja Mesir maka nggo Kusuruh kam mbabai bangsa Israel ndarat i negeri Mesir nari."
14 Anak Jakup sintua eme Ruben. Anak Ruben lit ka empat dilaki eme: Enoh, Palu, Hesron, ras Karmi. Kalak enda me kerina nini terpuk-terpuk suku Ruben.
15 Simeon lit enem kalak anakna dilaki, eme: Jemuel, Jamin, Ohat, Jakin, Sohar, ras Saul; Saul enda nandena kalak Kanaan; kalak enda me kerina nini terpuk-terpuk suku Simeon.
16 Lewi lit telu kalak anakna dilaki, eme: Gerson, Kohat, ras Merari; kalak enda me kerina terpuk-terpuk suku Lewi. Lewi nggeluh 137 tahun dekahna.
17 Gerson lit dua kalak anakna dilaki, eme Lipni ras Simei janah duana ia nterem kesusurenna.
18 Kohat lit empat kalak anakna dilaki, eme: Amram, Isar, Hebron, ras Usiel. Kohat nggeluh 133 tahun dekahna.
19 Merari lit dua kalak anakna dilaki, eme: Mahli ras Musi. Enda me terpuk Lewi ras kesusurenna.
20 Amram ngempoi turang bapana, Johebet gelarna. Ipupusna Harun ras Musa. Amram nggeluh 137 tahun dekahna.
21 Isar lit telu kalak anakna dilaki, eme: Korah, Nepek ras Sikri.
22 Usiel pe lit telu kalak anakna dilaki eme: Misael, Elsapan ras Sitri.
23 Harun ngempoi Eliseba, anak Aminadap, turang Nahason; ipupusna si Nadap, Abihu, Eleasar, ras Itamar.
24 Korah lit telu kalak anakna dilaki, eme: Asir, Elkana, ras Abiasap; enda me nini terpuk Korah.
25 Eleasar, anak Harun, ngempoi anak Putiel, janah ipupusna Pinehas. Kalak enda me kerina kepala keluarga ras terpuk suku Lewi.
26 Kempak Harun ras Musa me TUHAN nggo ngerana nina, "Taruhkenlah kerina suku-suku bangsa Israel ndarat i negeri Mesir nari."
27 Ia me duana si nggo mindo man raja Mesir gelah ibebaskenna bangsa Israel.
28 Sanga TUHAN ngerana man Musa i negeri Mesir nina, "Aku kap TUHAN. Kataken man raja Mesir kerina si nggo Kukataken man bandu."
29 (Kel 6:28)
30 Tapi erjabap Musa nina, "Ma ItehNdu maka aku tuhu-tuhu kalak si la beluh ngerana? Tentu labo ibegiken raja aku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA