Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Alu wool biru, ungu, ras megara ibahanna paken si lanai kal lang-lang jilena guna ipake imam tupung ia ndahiken dahinna i bas Ingan si Badia. Ibanna paken imam man Harun, bagi si nggo ipedahken TUHAN man Musa.
2 Ibahanna epod i bas lenen halus; i bas wool biru, ungu, ras megara, bage pe benang emas nari.
3 Itepana emas jadi lambar-lambar si menipes, jenari ipotong-potongna jadi benang, gelah itenun ras lenen halus e, bage pe ras wool biru, ungu, ras megara.
4 Ibahanna dua tinali bas bara guna baju epod e, jenari ileketkenna arah sampingna, gelah banci iiket alu e.
5 Gendit si itenun halus, bahan-bahanna seri, ijaitkenna ersada ras baju epod e, bagi si nggo ipedahken TUHAN man Musa.
6 Isikapkenna batu permata delima, jenari iiketna alu bingke emas; i bas batu permata e iukirna alu mejile gelar-gelar anak Jakup si sepulu dua.
7 Itamakenna batu permata si nggo iukir e i bas tinali bas bara baju epod ndai jadi sada tanda bangsa Israel si sepulu dua, payo kal bagi si nggo ipedahken TUHAN man Musa.
8 Ibahanna sada tutup tenten, bahanna seri ras baju epod ndai, sulamenna pe seri.
9 Bentukna segi empat janah erlipat dua, gedangna 22 sentimeter, belangna pe 22 sentimeter.
10 Itamakenna i je empat baris batu permata si meherga. I bas baris si pemena: batu delima, topas ras baiduri sepah;
11 i bas baris si peduaken: sada batu samrud, sada batu nilam, ras sada berlian;
12 i bas baris si peteluken: sada lasuardi, sada akik, ras sada amatis;
13 janah i bas baris si peempatken: sada mutiara biru, sada delima, ras sada yasper. Kerina batu permata enda itamaken i bas bingke si ibahan i bas emas nari.
14 I bas tep-tep batu permata enda lit i je iukir gelar sekalak i bas anak-anak Jakup, gelah jadi tanda suku Israel si sepulu dua.
15 Guna tutup tenten e, ibahanna rante i bas emas murni nari, ipiuh bagi tinali.
16 Ibahanna dua pengiket i bas emas nari ras dua gelang emas, jenari gelang emas e ileketkenna ku tutup tenten e i bas sukina si arah datas.
17 Rante emas si dua ndai ileketkenna ku gelang si dua ndai,
18 jenari ujungna si dua nari ileketkenna ku pengiket si dua ndai janah alu cara si bagenda ileketkenna ka pe e arah lebe ku tinali baju epod ndai.
19 Ibahanna dua gelang emas, jenari isangketkenna ku tutup tenten e, i bas sukina si arah teruh, i bas tepi si arah bas rembak ras baju epod e.
20 Ibahanna dua nari gelang emas, jenari isangketkenna ku ujung si arah teruh tinali bas bara baju epod e arah lebe, deherken kelimna datasen gendit si halus tenunenna e.
21 Bagi si nggo ipedahken TUHAN man Musa, iiketna gelang tutup tenten e ras gelang epod ndai alu tinali biru, seh maka tutup tenten tetap arah datas tinali e janah la mosar.
22 Baju jubah si nutupi epod e ibahan i bas wool biru nari.
23 Lubang ingan nucukken takal ilapisi alu uis si itenun rapat gelah ula merigat.
24 I bas tepi jubah e arah teruh itamakenna buah galiman si ibahan i bas lenen halus ras wool biru, ungu ras megara, iselang-selingi alu giring-giring emas, pas kal bagi si nggo iperentahken TUHAN man Musa.
25 (Kel 39:24)
26 (Kel 39:24)
27 Ibahanna baju Harun ras anak-anakna,
28 bage pe bulangna, tengkulukna, dingen seluar gendek i bas lenen nari,
29 janah selempang i bas lenen halus nari ras i bas wool biru, ungu ras megara, si ihiasi alu sulamen, bagi si nggo ipedahken TUHAN man Musa.
30 Ibahanna pe perhiasen i bas emas murni nari, jadi tanda jabaten khusus, janah iukirna i je kata-kata enda: "Iendesken man TUHAN saja".
31 Iiketkenna perhiasen e ku bulang e arah lebe alu tinali biru, sue ras si nggo ipedahken TUHAN man Musa.
32 Kerina dahin kerna Kemah Perjumpan e nggo dung. Kerinana ibahan bangsa Israel sue ras si nggo ipedahken TUHAN man Musa.
33 Iendeskenna man Musa Kemah e ras kerina alat-alatna, sangketenna, papanna, beloti-beloti si bertengna, ras alasna;
34 tarumna si ibahan i bas kulit bajar biri-biri icelup megara; tarumna si ibahan i bas kulit halus nari; kire-kirena si jadi ampang-ampang;
35 Peti Perpadanen si isin papan batu e, lanja-lanjana, ras tutupna;
36 meja ras kerina alat-alatna, ras roti si man persembahenken man Dibata;
37 nahe lampu si ibahan i bas emas murni nari, lampuna, kerina alat-alatna, ras minak guna lampu-lampu e;
38 batar-batar emas, minak penangkuhen; barang tutungen si merim, kire-kire guna dalan bengket ku bas Kemah e;
39 batar-batar tembaga ras jerijak tembagana, lanja-lanjana, ras kerina alat-alatna; baskom ingan lau pemurihi ras tapakna,
40 kire-kire guna bidena ras tiang-tiangna bage pe alas tiang e; kire-kire guna dalan bengket ku bas bide e ras tinalina, pantuk-pantuk guna Kemah e; kerina alat-alat si man paken i bas Kemah e,
41 ras paken si lanai kal lang-lang jilena si man paken imam i bas ingan si badia e, paken si badia man Imam Harun ras anak-anakna.
42 Kalak Israel nggo ndahiken kerina dahin e sue ras si nggo ipedahken TUHAN man Musa.
43 Ipepayo Musa kerinana janah idahna maka nggo ibahan kalak ndai kerinana sue ras si nggo ipedahken TUHAN. Emaka ipasu-pasu Musa ia kerina.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA