Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dhabuna PANGERAN ka Mosa, "Mara mangkat dhari dhinna’ abareng ban bangsa se bi’ ba’na egiba dhari Messer reya ka nagara se bi’ Sengko’ ejanjiyagi ka Ibrahim, Ishak ban Yakub ban na’ potona.

² Sengko’ nyorowa Tang malaekat epangaterra ba’na. Sengko’ ngojuga bangsa Kana’an, Amori, Het, Feris, Hewi ban Yebus.

³ Nagara se eentarana ba’na jareya sogi tor landhu. Tape Sengko’ dibi’ ta’ abarengngana ba’na sopaja bi’ Sengko’ ba’na ta’ epamateya, sabab ba’na reya settong bangsa se cengkal."

⁴ Saellana jareya PANGERAN makon Mosa abala kantha reya ka bangsa Isra’il, "Ba’na reya bangsa se cengkal. Saompamana Sengko’ abarengnge ba’na maske pera’ sakejja’, tanto bi’ Sengko’ ba’na epamate kabbi. Mara bukka’ pareyasanna ba’na jareya, Sengko’ pas nantowagiya epabaramma’a ba’na bi’ Sengko’." Saellana ngedhing dhabuna PANGERAN jareya, reng-oreng Isra’il ce’ sossana. Pareyasanna laju ebukka’ kabbi. Daddi, samangkadda dhari Gunong Sinay, bangsa Isra’il ta’ ngangguy pareyasan pole.

⁵ (33:4)

⁶ (33:4)

⁷ Sabban bangsa Isra’il akemah, Mosa mondhut Kemah pas epasang abak jau dhari parkemahanna reng-oreng jareya. Kemah jareya enyamae Kemah Socce, ban pa’-sapa’a se marlowagi babala’anna PANGERAN, entar ka jadhiya.

⁸ Mon Mosa meyos ka Kemah jareya, reng-oreng Isra’il padha manjeng e adha’anna kemahna bang-sebang sambi ngabassagi Mosa sampe’ maso’ ka dhalem Kemah gella’.

⁹ Saellana Mosa maso’ pas badha ondhem se aropa cangga se toron sarta pas ambu e adha’na labangnga Kemah jareya. Dhari ondhem jareya PANGERAN abu-dhabu ka Mosa.

¹⁰ E bakto reng-oreng Isra’il nangale’e ondhem se aropa cangga gella’ e labangnga Kemah Socce, kabbi padha asojud e labangnga kemahna bang-sebang.

¹¹ PANGERAN abu-dhabu dhep-adhebban bi’ Mosa, padha ban oreng se acaca bi’ kancana. Saellana jareya Mosa pas abali ka parkemahan. Tape Yusak ana’na Nun, oreng ngodha se biyasana nolonge Mosa, paggun neng e Kemah jareya.

¹² Atorra Mosa ka PANGERAN, "Lerres Junandalem makon abdidalem mimpin reng-oreng Isra’il ka’dhinto ka nagara ka’dhissa’, namong Junandalem gi’ tadha’ dhabuna pasera se sareng Junandalem epakona nolonge abdidalem. GUSTE, Junandalem adhabu ja’ Junandalem oneng ka abdidalem sareng lebur ka abdidalem.

¹³ Manabi lerres saka’dhinto, ngereng dhabuwagi ka abdidalem ponapa kasokanna Junandalem, sopaja abdidalem kengenga ngabdi ka Junandalem sareng masenneng Junandalem terros. Kaemodi ja’ bangsa ka’dhinto sareng Junandalem ampon epele epadaddi ommattepon Junandalem dibi’."

¹⁴ Dhabuna PANGERAN, "Sengko’ dibi’ se nontona ban alindhungana ba’na sopaja ba’na ngaandhi’a tana se la ejanjiyagi Sengko’ rowa."

¹⁵ Atorra Mosa, "Manabi Junandalem ta’ nolonge abdidalem sadaja, abdidalem ja’ pakon mangkat saos dhari ka’dhinto.

¹⁶ Kadi ponapa oreng laen se onenga ja’ Junandalem lebur ka ommattepon manabi ommat ka’dhinto sareng Junandalem ta’ etolonge? Lantaran Junandalem asarengnge abdidalem sareng bangsa abdidalem sadajana, daddi sa-bangsa padha oneng ja’ ommattepon Junandalem bida sareng sa-bangsa laenna e bume."

¹⁷ Dhabuna PANGERAN ka Mosa, "Parnyo’onanna ba’na bi’ Sengko’ ekabbulana, sabab Sengko’ la tao ka ba’na ban lebur ka ba’na."

¹⁸ Atorra Mosa pole, "GUSTE, ngereng abdidalem panengale kamolja’annepon Junandalem."

¹⁹ Dhabuna PANGERAN, "Sengko’ lebada e adha’anna ba’na, ban ba’na bakal nangaleyana sakabbinna Tang kamolja’an. Bi’ Sengko’ ba’na ebala’ana Tang nyama se socce. Sengko’ reya PANGERAN, ban Sengko’ reya noduwagi kamora’anna Tang ate ban kabellasan ka reng-oreng peleyan Sengko’ dibi’.

²⁰ Ba’na ta’ olle ngabas Tang roba sabab pa-sapa se ngabas Tang roba tanto mate.

²¹ Tape e seddi’anna Sengko’ reya badha gumo’ bato; ba’na olle manjeng e jadhiya.

²² E bakto sonar kahadiranna Sengko’ lebat e jadhiya, bi’ Sengko’ ba’na e saba’a e ke’-lekke’na gumo’ jareya sarta etotobana bi’ Tang tanang sampe’ Sengko’ la lebat.

²³ Saellana jareya Tang tanang ealleya sopaja ba’na bisa’a nangale’e Sengko’ dhari budhi, tape ta’ bisa nangale’e Tang roba."

Keluaran

Video Keluaran 33

Ikuti Kami:

KONTAK | PARTISIPASI | DONASI