Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN man Musa, "Tadingkenlah ingan enda. Berkatlah kam ras bangsa si ibabandu ndarat i Mesir nari, jenari laweslah ku taneh si nggo Kupadanken man Abraham, Isak ras Jakup ras man kesusurenna.
2 Kusuruh sekalak malekat nuduhken dalan man bandu, janah Kupelawes pagi bangsa Kanaan, bangsa Amori, bangsa Heti, bangsa Peris, bangsa Hewi, ras bangsa Jebusi.
3 Kam berkat ku taneh si mehuli dingen mehumur. Tapi Aku jine la ikut ras kam, maka ula kam Kukernepken i tengah dalan sabap kam bangsa si mekeng kuduk."
4 Isuruh TUHAN Musa ngatakenca man bangsa e, "Kam bangsa si mekeng tuhu-tuhu. Adi Aku erdalan ras kam kentisik sajalah gia la banci la kernep kam Kubahan. Genduari tangtangilah kerina perhiasenndu, jenari Aku netapkenca uga ibahan man bandu." Kenca ibegi bangsa e kata TUHAN enda, ceda atena, emaka lanai ia make perhiasen.
5 (Kel 33:4)
6 Emaka kenca nadingken Deleng Sinai, bangsa Israel lanai nari make perhiasen.
7 Adi ipajekken bangsa Israel kenca kemahna, minter ka ibuat Musa Kemah si Badia e, jenari ipajekkenna ndauh sitik i bas ingan erkemah e nari. Kemah e igelari Kemah Perjumpan ras TUHAN, janah ise pe si atena nungkun man TUHAN, lawes ia ku je.
8 Katawari pe adi Musa lawes ku je, bangsa Israel tedis i bas pintun kemahna janah ipernehenna Musa seh ia bengket ku bas Kemah e.
9 Kenca Musa bengket ku bas, tiang embun e minter nusur ku teruh, jenari ngadi i bas pintun Kemah, janah TUHAN ngerana man Musa i bas embun nari.
10 Nggo kenca idah bangsa Israel tiang embun e i bas pintun Kemah, minter erjimpuh ia kerina.
11 TUHAN ngerana petala-tala ras Musa, desken sekalak jelma ngerana ras temanna. Kenca bage mulihken Musa ku ingan erkemah. Tapi anak perana si jadi suruh-suruhenna eme Josua anak Nun, tetap tading i bas Kemah e.
12 Nina Musa man TUHAN, "Payo tuhu maka nggo IkatakenNdu man bangku maka IbabaiNdu bangsa enda ku taneh si IpadankenNdu, tapi la IkatakenNdu man bangku ise pagi si IsuruhNdu ras aku. Nggo IkatakenNdu maka ItandaiNdu tuhu-tuhu aku janah ngena AteNdu man bangku.
13 Genduari, adi bage kin, turikenlah man bangku sura-SuraNdu, gelah banci Kam kuelai, janah tetap kubahan meriah UkurNdu. Inget ka pe maka nggo IpilihNdu bangsa enda jadi SikerajangenNdu."
14 Nina TUHAN, "Aku ras kam, janah Aku mereken kemenangen man bandu."
15 Erjabap ka Musa nina, "Adi la Kam ras kami lawes, la padah IsuruhNdu kami nadingken ingan enda.
16 Uga ningkalak metehsa maka ngena AteNdu man BangsaNdu ras man bangku adi labo Kam ikut ras kami lawes? Adi Kam tetap ras kami, i je nge maka teridah kami lain ras bangsa si deban i bas doni enda."
17 Nina TUHAN man Musa, "Bagi si ipindondu, bage me Kubahan sabap Kutandai kam tuhu-tuhu janah ngena ateKu kam."
18 Kenca bage ibahan Musa pemindonna nina, "Mindo aku man BaNdu gelah IcidahkenNdu man bangku sinalsal terang KemulianNdu."
19 Nina TUHAN njabapsa, "Kerina kiniulinKu banci Kupementas arah lebendu, janah i lebe-lebendu Kukataken gelarKu si badia. Aku kap TUHAN, janah Kucidahken lias ate ras perkuah ateKu man kerina kalak si nggo Kupilih.
20 La Kubere idahndu ayongKu; sabap ise pe la ngasup ngidah ayongKu, tetap nggeluh.
21 Enda kap sada ingan deherKu i ja banci kam tedis i das sada batu.
22 Adi mentas kari sinalsal terang kemulianKu, Kutamaken kam ku bas sada lubang i bas batu e, jenari Kututupi kam alu tanKu seh Aku nggo lepas.
23 Kenca bage Kuagui tanKu gelah banci idahndu gurungKu, tapi labo ayongKu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA