Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakana Batara ri Musa,
2 "Suroi tu Israel angngerang passare mae ri Nakke. Inai-nai ta’gio’ atinna, musti angngerangi passare
3 a’rupa: bulaeng, pera’ siagang tambaga;
4 kaeng lenang alusu’, kaeng wol gau’, lame butung siagang eja, kaeng bulu bembe,
5 kukkulu’ gimbala’ laki nikasumba ejaya, kukkulu’ alusu’, kayu akasia,
6 minynya’ untu’ lampu, rampa-rampa minynya’ upacara siagang untu’ dupa mabau’,
7 a’rupa-rupa batu paramata untu’ nipabelo-belo ri baju efod siagang pattongko’ barambanna Imang Lompoa.
8 Suroi anjo bansaya appare’ se’re kema untu’ iNakke, sollangKu akkulle ammantang ri tangnga-tangngana ke’nanga.
9 Anjo kemaya siagang pakkakasa’na musti napareki ke’nanga situru’ rancana le’baka Kupicinikiangko."
10 "Apparekko se’re patti battu ri kayu akasia; la’buna 110 sentimetere’, sangkara’na siagang tinggina massing-massing 66 sentimetere’.
11 Lapisi bageang lalanna siagang bageang pantara’na siagang bulaeng ti’no’ siagang papparekangi les battu ri bulaeng.
12 Untu’ kayu pa’bule’na, apparekko appa’ ponto bulaeng nampa nupakai’ ri appaka bangkenna, ta’ruai ponto ri massing sa’rinna.
13 Appare’ tongko pa’bulekang battu ri kayu akasia na nulapisi’ siagang bulaeng,
14 nampa nupantama’ anjo kayu pa’buleka antama’ ri pontona ri massing sa’rinna anjo pattia.
15 Anjo kayu pa’buleka musti tuli lalanna ri anjo ponto-pontoa, siagang takkulleai nipasulu’.
16 Nampa musti nupadongkoki lalang ri anjo pattia anjo ruaya batu niaka tattulisi’ lalang sikamma parenta Kupassareanga mae ri kau.
17 Papparekangi pattongko’ bulaeng ti’no’ anjo pattia; la’buna 110 sentimetere’ siagang sangkara’na 66 sentimetere’.
18 Apparekko rua malaeka’ akka’nyi’ battu ri bulaeng de’de’,
19 tasse’rei massing ri cappa’na anjo pattia. Anjo ruaya malaeka’ akka’nyi’ musti nipa’jari se’rei bageang siagang pattongko’na,
20 siagang musti nipasidallekangi na takka’rang ka’nyi’na irateanna anjo pattia.
21 Padongkoki anjo ruaya batu lalang ri anjo pattia siagang patabai anjo pattongko’na irateanganna.
22 AnjorengA’ ri tampaka lasibuntulu’ siagang ikau; siagang battu rate ri pattongko’na, ri alla’na anjo ruaya malaeka’ akka’nyi’, laKusareko hukkung-hukkungKu untu’ bansa Israel."
23 "Apparekko se’re mejang battu ri kayu akasia; la’buna 88 sentimetere’, sangkara’na 44 sentimetere’, siagang tinggina 66 sentimetere’.
24 Lapisi bulaeng ti’no’ siagang patabai les bulaeng ri tammulilina.
25 Pareki biring mejang 7,5 sentimetere’ siagang sarei passimbang bulaeng tammulilina anjo birinna.
26 Apparekko appa’ ponto bulaeng nampa nupataba ri appaka panyingkulu’ bangkenna, ri ampi’na birinna.
27 Anjo pontoa untu’ antahangi kayu pa’bule’na sollanna akkulle anjo mejanga nibule’.
28 Anjo kayu pa’buleka musti kayu akasia nipare’ siagang nilapisi bulaeng.
29 Apparekko piring-piring, cangkiri’-cangkiri’, bongki-bongki, siagang mangko’-mangko’ untu’ passare je’ne’ anggoro’. Sikontu pakkakasa’na anjo mejanga musti battu ri bulaeng ti’no’ ngaseng nipare’.
30 Anjo mejanga musti niboliki ri dallekanna Patti Parjanjianga, siagang musti tuli nia’ sadia roti tattala irate ri anjo mejanga."
31 "Apparekko bangkeng lampu battu ri bulaeng ti’no’. Pa’lapa’na siagang panna’gallanna musti bulaeng nide’de’; bunga-bunga belo-belona, kammayatompa pucu’na siagang pammantangngang pucu’na musti a’jari se’rei siagang pa’lapa’na siagang panna’gallanna.
32 Anjo panna’gallanna musti nipareki annang tangkenna, tattallu tangke ri massing sa’rinna.
33 Ri tunggala’ tangkenna musti nipareki belo-belo a’rupa tallu bunga siagang pucu’na na pammantangngang pucu’na.
34 Ri panna’gallanna musti nipareki belo-belo a’rupa appa’ bunga siagang pucu’na na pammantangngang pucu’na.
35 Irawanganna anjo tunggala’ tangkenna musti nipareki se’re pucu’.
36 Sikontu bangkenna anjo lampua siagang pucu’-pucu’na kammayatompa tangke-tangkenna musti nipareki battu ri sipolong bulaeng ti’no’ nide’de’.
37 Apparekko tuju lampu ri bangkenna anjo lampua siagang pataba bajiki sa’genna tassioro’ mae ri dallekang singara’na.
38 Apparekko pakkakasa’ untu’ antangkasi sumbuna anjo kanjolia nampa pa’dongkokanna bulaeng ti’no’ todong nipare’.
39 Ammakeko tallumpulo allima kilo battala’na bulaeng untu’ ampareki bangkenna anjo lampua siagang sikontu pakkakasa’na.
40 Jagai sollanna nipare’ anjo lampua situru’ conto le’baka Kupicinikiangko irate ri anne monconga."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA