Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhabuna PANGERAN ka Mosa,
2 "Reng-oreng Isra’il soro ngeba tor-ator ka Sengko’. Tarema apa’a bai se terro eatorragiya.
3 Tor-ator jareya kodu aropa: emmas, salaka ban paronggu;
4 kaen linen se alos, kaen wol se bungo, bungo terrong ban mera, kaen dhari buluna embi’;
5 kole’na dumba lake’ se ecellup epamera, kole’ se alos, kaju akasia,
6 mennya’na damar, racegan se epobuwa ka mennya’ opacara ban kaangguy dupa se ro’om,
7 mamatan acem-macem se egabaya rarengganna efod ban totobba dhadhana Imam Agung.
8 Bangsa jareya soro agabayyagi Sengko’ kemah se ekennengngana Sengko’ sopaja Sengko’ ngennenga apolong ban reng-oreng jareya.
9 Kemah ban parlengkabanna kodu ekagabay menorot Tang rancana; bi’ Sengko’ ba’na ebala’ana baramma Tang rancana jareya."
10 "Ba’na agabay petthe dhari kaju akasia se lanjangnga saratos sapolo sentimeter, lebar ban tenggina padha sabidak ennem sentimeterran.
11 Bagiyan dhalem ban lowarra lapese emmas morne, ban e sakalenglengnga bagiyan attas pobuwi palepet dhari emmas.
12 Kaangguy kaju kol-pekolla gabayyagi long-kolong emmas pa’-empa’, pacekka’ ka roso’na se pa’-empa’, dhadhuwa’ salaja.
13 Kol-pekolla kagabay dhari kaju akasia, kole’e emmas,
14 kol-pekol jareya pamaso’ ka long-kolongnga se badha e so’-roso’na petthe jareya.
15 Kaju kol-pekol jareya kodu terros badha e long-kolongnga jareya, ta’ olle bukka’.
16 Papan bato se dhadhuwa’ se aesse ta-parenta se bi’ Sengko’ ebagiya ka ba’na rowa saba’ e dhalemmanna petthe jareya.
17 Kodhungnga petthe jareya kagabay dhari emmas morne, lanjangnga saratos sapolo sentimeter ban lebarra sabidak ennem sentimeter.
18 Pas agabay kerub dhadhuwa’ dhari emmas tempa’an,
19 saba’ e konco’na kodhungnga petthe jareya, settong e saneyap konco’na. Kerub se dhadhuwa’ jareya kodu acampo ban kodhungnga petthe jareya,
20 padhep-adhebban, ban kalembangnga pamenthang e attassa petthe jareya.
21 Saba’ bato se dhadhuwa’ jarowa e dhalem petthe jareya, pas pobu kodhungnga e attasanna.
22 E jadhiya Sengko’ atemmowa ban ba’na, ban dhari attassa kodhungnga jareya, e antarana kerub se dhadhuwa’ gella’, Sengko’ aberri’a parenta se kodu epanapa’ ka bangsa Isra’il."
23 "Ba’na agabay meja dhari kaju akasia se lanjangnga ballung polo ballu’ sentimeter, lebarra pa’ polo empa’ sentimeter, ban tenggina sabidak ennem sentimeter.
24 Meja jareya kole’e emmas morne, sakalenglengnga pobuwi palepet dhari emmas.
25 Sakalenglengnga pobuwi penggir se lebarra pettong satengnga sentimeter ban e sakalenglengnga penggir jareya pobuwi palepet dhari emmas.
26 Agabay long-kolong dhari emmas, pasang e padduna se pa’-empa’ e sokona.
27 Long-kolong jareya kaangguy panyekka’anna kol-pekol sopaja meja jareya ekennenga osong.
28 Kol-pekolla kodu kagabay dhari kaju akasia ban ekole’e bi’ emmas.
29 Agabay reng-pereng, ker-cangker, dhi-gendhi ban bung-tobung kaangguy tor-ator aengnga anggur. Parlengkabanna meja jareya kabbi kodu kagabay dhari emmas morne.
30 Meja jareya kodu saba’ e adha’na Petthe Parjanjiyan, ban e attassa meja jareya masthe terros badha roti sasajinna."
31 "Ba’na agabay ko’-tongko’na damar dhari emmas morne. Bagiyan langganna ban gu’-teggu’na kodu ekagabay dhari emmas tempa’an; bang-kembang rarenggan, tamaso’ bungkella kodu masettong ban langganna tor gu’-teggu’na.
32 E gu’-teggu’na jareya kodu pobuwi cangka nem-ennem, ja-salajana tello cangka.
33 Saneyap cangka kodu epobuwi rarenggan aropa kembangnga badam se badha bungkella tatello’ ebang.
34 E gu’-teggu’na kodu pobuwi rarenggan aropa kembangnga badam se gi’ mekko pa’-empa’, genna’ ban bungkella.
35 E baba’anna saneyap cangka sapasang jareya kodu epobuwi kembang se mekko settong.
36 Ko’-tongko’na damar ban cet-pocedda kembangnga sarta ka-cangkana kodu ekagabay dhari emmas bungkol se ta’ ethok-ketthok, se tempa’an morne.
37 Agabay damar papetto’, pobu ka ko’-tongko’na damar jareya, carana mobu ator sopaja tera’na nyonar ka adha’anna.
38 Pakakas se eangguya aberse’e sombuna ban tatagga damarra kodu ekagabay dhari emmas morne.
39 Emmas se ekagabaya ko’-tongko’na damar jareya ban parlengkabanna sagenna’na berra’na kodu tello polo lema’ kilogram.
40 Jaga sopaja ko’-tongko’na damar jareya sakabbinna menorot conto se bi’ Sengko’ la eduduwagi ka ba’na e gunong reya."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA