Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Adi lit kalak nangko lembu ntah pe biri-biri jenari ibunuhna ntah idayakenna, sada lembu arus igantina alu lima lembu janah sada biri-biri iganti alu empat biri-biri.
2 Kai si itangkona arus igalarina. Adi kadena pe la lit, ia idayaken jadi budak guna nggalari si itangkona e. Adi asuh-asuhen si itangkona e lembu, kelede, ntah pe biri-biri, janah terdat nggeluh denga i bas ia, arus igalarina dua kali lipat.
3 (Kel 22:2)
4 Adi sekalak pinangko bengket ku bas sada rumah berngi-berngi jenari terbunuh ia i je, kalak si munuhsa la ersalah. Tapi adi e terjadi suari, ia ersalah munuh.
5 Adi lit kalak si namaken asuh-asuhenna nggagat i bas jumana ntah pe kebun anggurna, jenari asuh-asuhenna ndai lawes ku juma kalak si deban janah igagatna keri ulih juma kalak ndai, la banci la igantina ulih juma si bene ndai alu ulih juma ntah ulih kebun anggurna jine.
6 Adi lit sekalak si pegara api i bas jumana jenari api ndai jajat ku juma kalak si deban arah dukut-dukut janah meseng ibahanna page si sangana turah ntah pe si nggo isabi ras ipegun-gun, kalak si pegara api ndai arus nggalari kerugin si jadi ibahan api e.
7 Adi lit sekalak nimpan duit kalak si deban ntah pe barang si meherga iakapna, jenari itangko kalak i bas rumah kalak si munikenca ndai nari, pinangko ndai adi terdat, la banci la nggalar dua kali lipat.
8 Tapi adi pinangko ndai la dat, kalak si nimpan barang-barang si meherga ndai ibaba ku rumah ingan ertoto janah i je arus ersumpah ia maka labo itangkona barang kalak ndai.
9 I bas tep-tep perkara kerna erta, ntah e soal lembu, kelede, biri-biri, paken ntah barang-barang si deban si bene, duana kalak si ngataken maka ia empuna erta e, arus ibaba ku ingan ersembah. Kalak si ituduh Dibata ersalah arus nggalar dua kali lipat man imbangna erpekara ndai.
10 Adi lit sekalak ngasuhi kelede, lembu, biri-biri, ntah asuh-asuhen si deban i bas kalak nari, jenari asuh-asuhen ndai mate ntah penggel nahena, ntah pe irampas kalak, tapi la lit saksi si ngidahsa,
11 kalak si ngasuhisa ndai arus lawes ku ingan ersembah, jenari ersumpah ia i je maka labo itangkona asuh-asuhen kalak ndai. Adi labo itangkona asuh-asuhen e, arus ialoken empuna kerugin e, janah si ngasuhisa ndai la perlu nggalar.
12 Tapi adi asuh-asuhen ndai itangkona, la banci la igalarina man empuna ndai.
13 Adi asuh-asuhen e ibunuh rubia-rubia si merawa la banci la ibabana bangkena si tading denga jadi bukti; adi bage la perlu ia nggalar.
14 Adi lit sekalak si minjam asuh-asuhen, jenari luka ntah mate asuh-asuhen ndai sanga empuna la i je, la banci lang igalarina.
15 Tapi adi i je empuna sanga e, la pada igalarina. Adi asuh-asuhen e isewana, kerugin empuna itutupi alu sewana."
16 "Adi lit sekalak naki-naki sekalak singuda-nguda si lenga ertunangen, dingen ersada kula ia ras, la banci lang iberekenna man bana emas unjuken kenca bage iempoina.
17 Tapi adi bapana la nggit nerehken anakna e, la banci lang igalarina utangna bali ras emas unjuken singuda-nguda.
18 Diberu si mahan kinigurun la banci lang ibunuh.
19 Kalak si ersada kula ras asuh-asuhen la banci lang ibunuh.
20 Kalak si mahan persembahen man dibata si deban seakatan man bangKu, TUHAN, la banci lang iukum mate.
21 Ula kam erbahan si la bujur ntah nindas kalak pertandang; inget maka kam pe kalak pertandang nge nai i Mesir.
22 Ula kam erbahan si la bujur man diberu si nggo mbalu ntah man anak melumang.
23 Adi la bujur ibahanndu man bana, la banci lang, Kubegiken sorana nderkuh, adi ia nderkuh mindo penampat man bangKu.
24 Merawa Aku janah Kubunuh kam i bas peperangen. Ndeharandu la banci lang jadi mbalu janah anak-anakndu melumang.
25 Adi ipinjamkenndu duit man sekalak bangsangKu si musil, perbahanendu man bana bagi perbahanen kalak si dahinna pebungaken duit; emaka ula ibahanndu ia nggalar bunga.
26 Adi ibuatndu cabin kalak jadi jaminen duit si ipinjamna, la banci la iulihkenndu cabinna e man bana ope denga ben wari,
27 sabap e cabinna maka ula ia bergehen. Sabap kai nari kari banci jadi cabinna medem? Adi nderkuh ia mindo penampat man bangKu, la banci la Kualoi ia sabap Aku perkuah.
28 Ula ikatakenndu Dibata jahat, janah ula sumpahi sekalak peminpin bangsandu.
29 Persembahken man bangKu buah pagendu, buah anggurndu ras minak saitunndu adi nggo kam rani. Bereken man bangKu anakndu dilaki sintua.
30 Bereken man bangKu anak si pemena si tubuh i bas lembundu ras biri-birindu. Jenggi lembu ntah bajar biri-biri si pemena tubuh pelepas ras indungna pitu wari, jenari i bas wari si pewaluhken persembahenken man bangKu.
31 Kam kap bangsangKu, emaka la banci ipanndu asuh-asuhen si nggo ibunuh rubia-rubia si meliar; tapi bereken lah e man biang."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA