Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dhabuna Allah,
2 "Sengko’ reya PANGERAN, Allahna ba’na, se ngeba ba’na kalowar dhari Messer, kennengnganna ba’na se ekadunor oreng.
3 Ja’ nyemba ka lah-illah laenna kajabana Sengko’.
4 Ja’ agabay arca se padha ban apa’a bai se badha e langnge’, se padha ban sabarang se badha e bume otaba se badha e dhalem aeng e baba’anna bume.
5 Ja’ nyemba otaba abakte ka ca-arca jareya, sabab Sengko’ reya PANGERAN, Allahna ba’na, ban Sengko’ ta’ endha’ epapadha ban apa’a bai. Reng-oreng se baji’ ka Sengko’ bi’ Sengko’ eokom sampe’ toronan se kapeng tello’ ban empa’.
6 Tape Sengko’ taresna ka abun-ebun oreng toronanna reng-oreng se taresna ka Sengko’ ban se atoro’ ka Tang parenta.
7 Ja’ ban-saromban nyebbut Tang nyama, sabab Sengko’, PANGERAN, Allahna ba’na, ngokoma sapa’a bai se ban-saromban nyebbut Tang nyama.
8 Raya’agi ban hormadi are Sabat menangka are se socce.
9 Bi’ Sengko’ ba’na eberri’i nem are kaangguy alalakon,
10 tape are se kapeng petto’ are Sabadda PANGERAN, Allahna ba’na. Are jareya angguy abakte ka Sengko’, e are jareya ba’na ta’ olle alalakon, tamaso’ na’-ana’na ba’na, nor-dunorra, keban peyara’anna, ban reng-oreng manca se badha e nagarana ba’na.
11 E dhalem nem are Sengko’, PANGERAN, agabay bume, langnge’, tase’ raja ban saessena, tape e are se kapeng petto’ Sengko’ ambu ta’ alalakon pole. Lantaran jareya Sengko’ aberkadi are Sabat ban masocce are jareya.
12 Hormadi rama ebuna sopaja ba’na lanjanga omorra e nagara se bi’ Sengko’, PANGERAN, Allahna ba’na, ebagi ka ba’na.
13 Ja’ mate e oreng.
14 Ja’ azina.
15 Ja’ co’-ngeco’.
16 Ja’ metenna oreng.
17 Ja’ terro ngala’a dhi’-andhi’na oreng; ja’ terro ngala’a binena oreng, dunorra, dumbana otaba sapena, hemarra otaba apa’a bai andhi’na oreng laen."
18 E bakto ngedhing monyena kelap saleng pacenthar ban sowarana tarompet, sarta nangale’e dhap-keddhap ban gunong ngokos, oreng Isra’il padha katako’en, kabbi laju padha majau.
19 Atorra reng-oreng jareya ka Mosa, "Sampeyan saos se abu-dhabu ka kaula, kaula padha merengngagiya; manabi Allah se abu-dhabu ka kaula, tanto kaula padha mate sadaja."
20 Dhabuna Mosa, "Ella ta’ osa tako’. Allah rabu dha’ enna’ coma nyoba’a ba’na, sopaja ba’na terrosa atoro’ ka papakonna ban ta’ agabaya dusa."
21 Tape reng-oreng Isra’il paggun manjeng majau pera’ Mosa malolo se nyemma’ ka ondhem se petteng se ekalenggi’i Allah.
22 Dhabuna PANGERAN ka Mosa, "Kabala ka oreng Isra’il, ja’ Sengko’ ngoca’ kantha reya, ‘Ba’na la tao dibi’ baramma Sengko’, PANGERAN, acaca ka ba’na dhari langnge’.
23 Ba’na ja’ agabay arca dhari salaka otaba emmas se bi’ ba’na esemba’a salaenna dhari Sengko’.
24 Kaangguy abakte ka Sengko’ ba’na kodu agabay mezba dhari tana; mon ba’na ngurbannagiya embi’ dumba ban sape menangka kurban obbaran ban kurban kasalameddan, kurban jareya saba’ e attassa mezba jareya. Sengko’ entara ka saneyap kennengngan se bi’ Sengko’ eteptebbagi menangka kennengnganna ba’na abakte ka Sengko’, ban e jadhiya Sengko’ aberkadana ba’na.
25 Mon mezba se bi’ ba’na eangguya abakte ka Sengko’ jareya ekagabay dhari bato, ja’ ngangguy bato se eketthok bi’ pa’a', sabab mon batona eketthok bi’ pa’a', meja jareya ta’ olle angguy egabay kennengnganna kurban ka Sengko’ pole.
26 Ja’ agabay mezba se tenggi sampe’ mon nyaba’a kurban ka attasanna kodu nae’ ka andha, sopaja bagiyanna badanna ba’na se ta’ pantes etangale’e oreng ta’ sampe’a etangale oreng.’"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA