Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai bingkat ma sidea hun Elim, gabe das ma ganup tumpuan ni halak Israel hu halimisan Sin, na i holangkolang ni Elim pakon Sinai, bani ari sapuluh lima, bani bulan dua, dob luar sidea hun tanoh Masir.
2 Jadi marungut-ungut ma ganup tumpuan ni halak Israel dompak si Musa pakon si Aron i halimisan,
3 nini ma dompak sidea, “Ambit matei ma namin hanami ibunuh tangan ni Jahowa i tanoh Masir, sanggah na hundul hanami i lambung ni hudon na marisi gulei, sanggah na bosur hanami mangan ruti; ai iarahkon hanima do hanami luar hu halimisan on laho mamunuh ganup tumpuan on marhitei lohei.”
4 Dob ai nini Jahowa ma dompak si Musa, “Tonggor ma, parohon-Ku ma udan ruti bannima hun nagori atas; maningon ma luar bangsa in anjaha ipatumpu ma bohal sungkup-sungkup sadari, ase Hulajou sidea atap irikkonon ni sidea do titah-Ku atap lang.”
5 Bani ari paonomkon, sanggah na paulihon na binoban ni sidea ai sidea, gabe lompit dua ma ai marimbang na ipatumpu sidea ari-ari.
6 Dob ai nini si Musa pakon si Aron ma dompak ganup halak Israel, “Bodari ma botohon nasiam paboa Jahowa do na paluarhon nasiam hun tanoh Masir,
7 anjaha girah sogod idahon nasiam ma hasangapon ni Jahowa, ai domma ibogei parungut-unguton nasiam dompak Jahowa. Ai ise ma hanami mambahen pala nasiam marungut-ungut dompak hanami?”
8 Anjaha nini si Musa ma, “Anggo ibere Jahowa gulei panganon nasiam bodari anjaha sogod bosur mangan ruti, halani domma ibogei Jahowa ungut-ungut nasiam, na marungut-ungut ai nasiam dompak-Si -- Ise ma anggo hanami? Seng dompak hanami nasiam na marungut-ungut ai, dompak Jahowa do.”
9 Dob ai nini si Musa ma dompak si Aron, “Hatahon ma hubani ganup tumpuan ni Israel, ʻPadohor nasiam ma hu lobei ni Jahowa, ai domma ibogei parungut-unguton nasiam in.ʼ”
10 Jadi sanggah na marsahap si Aron hubani ganup tumpuan ni Israel, idompakkon sidea ma dompak halimisan, anjaha tonggor ma, taridah ma hasangapon ni Jahowa ibagas hombun ai.
11 Anjaha nini Jahowa ma dompak si Musa,
12 “Domma Hubogei parungut-unguton ni halak Israel, hatahon ma hubani sidea, ʻBodari mangan gulei ma hanima, anjaha sogod bosuran ma hanima mangan ruti, ase ibotoh hanima, Ahu do Jahowa Naibatanima.ʼ”
13 Bodari ni ai roh ma marhulan-hulan leto anjaha irongkob ma parbarung-barungan ai, anjaha patarni ai marrageian ma namur inggot parbarung-barungan ai.
14 Anjaha sanggah manaik namur na marrageian ai, tonggor ma, adong ma marrageian bani halimisan ai songon batu ni ambotik na matah paretekni pakon parhibulni.
15 Dob ididah halak Israel ai, nini sidea ma samah sidea, “Man Hu” (Aha do on?), ai seng ibotoh sidea atap aha ai. Jadi nini si Musa ma dompak sidea, “On ma ruti na binere ni Jahowa hubani nasiam bahen sipanganon.
16 On ma hata na tinonahkon ni Jahowa, ʻPatumpu nasiam ma hunjin ganup marguru hubani na sungkup panganonni; satumba sahalak boi buaton nasiam hubani hasomanni salampolampo, marguru hubani buei ni bilangan nasiam.ʼ”
17 Jadi ibahen halak Israel ma sonai, ipatumpu sidea ma, deba buei deba otik.
18 Tapi dob isuhat, gabe seng lobihan na patumpuhon na buei ai anjaha seng hurangan na patumpuhon na otik ai; ganup patumpuhon marguru hubani na boi panganonni.
19 Dob ai nini si Musa ma dompak sidea, “Ulang ma itebai atap ise hunjin das hubani patar.”
20 Tapi seng itangihon sidea si Musa; adong do deba manebai hunjai das hubani patarni, gabe gilokon ma ai anjaha marbau; jadi manringis ma si Musa dompak sidea.
21 Ipatumpu sidea ma hunjai siap sogod, marguru hubani na sungkup panganonni bei; tapi anggo milas ma ari, malala ma ai.
22 Bani ari paonomkon dua lompit ma ipatumpu sidea ruti ai, dua tumba sahalak; anjaha dob roh partua-partua ni bangsa ai patugahkon ai hubani si Musa,
23 nini ma dompak sidea, “On do itonahkon Jahowa, ʻPatar ari parsaranan, Sabat na pansing do bani Jahowa, pamasak nasiam hinan ma sipamasakon nasiam anjaha lompah nasiam hinan ma silompahon nasiam; tapi sagala na lobih, simpan nasiam ma ai bahen sipanganon nasiam patar.ʼ”
24 Jadi isimpan sidea ma ai das hubani patarni, songon na tinonahkon ni si Musa, gabe seng ra masik ai atap gilokon ibagas.
25 Nini si Musa ma, “Pangan nasiam ma in sadari on, ari parsaranan ni Jahowa do sadari on; seng jumpah nasiam in sadari on i ladang.
26 Onom ari patumpuon nasiam in, tapi bani ari papituhon, ari Sabat in, seng dong jumpah ijai.”
27 Bani ari papituhon adong do deba humbani bangsa ai na laho patumpuhon, tapi seng dong jumpahsi.
28 Jadi nini Jahowa ma dompak si Musa, “Sadia dokah on engkaronnima mangkorjahon tonah-Ku pakon titah-Ku?
29 Tonggor ma, domma ibere Jahowa hu bennima ari Sabat, halani ai ibere do bannima bani ari paonomkon ruti haporluan dua ari; ganup hanima tading ma bani iananni bei, ulang adong halak na luar humbani iananni bani ari na papituhon ai.”
30 Jadi marsaran ma bangsa ai bani ari papituhon ai.
31 Manna ma ibahen halak Israel goranni ai; songon batu ni hatumbar do rumangni, lopak rupani anjaha daini songon ruti na tinanggulian.
32 Dob ai nini si Musa ma, “On do hata na tinonahkon ni Jahowa, ʻGoki hanima ma satumba hunjai sisimpanon bani ginomparnima, ase ididah sidea ruti na Hupapangankon bannima i halimisan sanggah na Hupaluar in hanima hun tanoh Masir.ʼ”
33 Jadi nini si Musa ma dompak si Aron, “Buat ma sada tapongan, nahkon ma hujai manna gok satumba anjaha pajongjong ma ai hu lobei ni Jahowa, sisimpanon hubani ginompar nasiam.”
34 Songon na tinonahkon ni Jahowa hubani si Musa, ipajongjong si Aron ma ai i lobei ni poti parpadanan ai bahen pardingatan.
35 Ompat puluh tahun do dokahni ipangan halak Israel manna ai, paima das sidea hu tanoh siianonkon ni sidea ai; sai manna ai do ipangan sidea paima das sidea hu parbalogan ni tanoh Kanaan.
36 Ia satumba (homer) saparsapuluh ni satapongan (Efa) ma ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA