Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakanamo Batara ri Musa,
2 "Sikontu ana’-ana’ bura’ne bungasaka passareangi ri Nakke. Sikontu ana’-ana’ bura’ne bungasa’na Israel, siagang sikontu olo’-olo’ laki bungasaka lassu’, iNakke ngaseng pata."
3 Nakanamo Musa mae ri bansa Israel, "Anne alloa Nalappassang mako Batara lalang koasa malompoNa, sa’genna akkulle mako assulu’ battu ri Mesir, tampa’nu nipare’ ata. Lanri kammana anjo, pakalompomi anne alloa. Teako angnganrei roti ammakea pa’gambang.
4 Anne alloa, tanggala’ se’re bulang Abib yareka bulang se’re, nubokoimi pa’rasangang Mesir.
5 A’janjimi siagang assumpami Batara mae ri boe-boenu untu’ laNapassareang mae ri kau pa’rasanganna bansa Kanaan, Het, Amori, Hewi, siagang Yebus. Punna Naerang mako Batara mange anjoreng ri anjo pa’rasangang akkalumanynyanga siagang copponga, tunggala’ taung lalang bulang Abib, musti nugaukangi anne pa’gaukang kammaya.
6 Lalang tuju allo sallona musti angnganreko roti tenaya nammake pa’gambang, na ri allo makatujua musti apparekko passua’-suarrang untu’ ampakalompoi Batara.
7 Lalanna tuju alloa takkulleako angnganre roti ammakea pa’gambang, siagang takkulleai nia’ pa’gambang ri sikontu pa’rasangannu yareka manna apa-apa mamo ammakea pa’gambang.
8 Ri pakaramulanna anjo passua’-suarranga musti nucaritai mae ri ana’nu bura’nea angkanaya nanugaukang ngaseng anjo sikammaya lanri sikamma apa le’baka Nagaukang Batara untu’ ikau ngaseng ri wattunna nubokoi pa’rasangang Mesir.
9 Anne passua’-suarranga anjari pangngu’rangi mae ri kau, sanrapang pammatei nisikkoka ri limannu yareka pammatei ri abannu. Anne passua’-suarranga anjari pappiu’rangi mae ri kau sollanna tuli nubicara siagang tuli nupilajari Hukkung-hukkunNa Batara; saba’ Napasulukko Batara battu ri Mesir siagang koasa malompoNa.
10 Pakalompoi anjo passua’-suarranga tunggala’ taung, situru’ ri wattu le’bakamo nipattantu."
11 Nakana Musa ri bansa Israel, "LaNarurungangko Batara mange ri pa’rasangang Kanaan le’baka Napa’janjiang ammake sumpa mae ri kau siagang boe-boenu. Punna ikaumi pata anjo pa’rasanganga,
12 musti nupassareangi sikamma ana’ bura’ne bungasa’nu siagang sikamma olo’-olo’ piara lakia ia bungasa’ lassuka. Yangasenna anjo Batara pata,
13 mingka sikamma keledai laki bungasa’ lassuka musti nupasuluki battu ri Batara siagang sikayu ana’ gimbala’ nukoro’bangkang a’jari sambenna. Punna taerokako ampasuluki anjo keledaia, musti nutepoki kallonna. Sikamma ana’nu bura’nea ia uru lassuka musti nipasuluki.
14 Punna ri bokoang allo nakkuta’nang ana’nu angkana apa ngaseng battuanna anjo sikammaya, musti appialiko angkana, ‘Lalang koasa malompoNa Batara na Naerang maki’ assulu’ battu ri pa’rasangang Mesir, tampatta nipare’ ata.
15 Ri wattunna kapala batu Karaeng Mesir siagang taerokai allappassangki’ a’lampa, Nabunomi Batara sikontu ana’-ana’ bura’ne bungasa’ lassuka ri Mesir, baji’ ana’ rupataua kammayatompa ana’ olo’-oloka. Iaminjo saba’na nanikoro’bangkang mae ri Batara sikontu olo’-olo’ piara lakia ia bungasaka lassu’, mingka nipasuluki ana’-ana’ bura’neta ia bungasaka lassu’.’
16 Anjo kabiasang kammaya a’jari pappiu’rangi mae ri katte, sanrapang pammatei nipasikkoka ri limanta yareka pammatei ri abanta. Lanri kammana tuli nipiu’rangiang maki’ angkanaya Batara le’ba’ ampasulukki’ battu ri Mesir siagang koasa malompoNa."
17 Le’ba’na nalappassang Karaeng Mesir a’lampa bansa Israel, tena nanierangi ke’nanga ri Allata’ala allalo ri oloang allaloa ri pa’rasangang Filistin, manna naia kaminang ambani anjo oloanga. Napikkiriki Allata’ala angkana, "Gassingka assesse’ lalanji anne bansaya punna nacini’ angkanaya musti a’bunduki ke’nanga, nampa ammotere’ mange ri Mesir."
18 Lanri kammana anjo Naerammi Allata’ala ke’nanga allalo ri oloang akkaluka ri parang lompoa mange ri Tamparang Alara’. Ri wattunna nabokoi Mesir, sikamma tu bura’ne Israel angngerangi sanjata kamma tau la’bunduka.
19 Naerammi Musa buku-bukunna tumate Yusuf, lanri lalang tallasa’na Yusuf nasuroi assumpa tu Israel angkana lanagaukangi anjo kammaya. Kammaminne pasanna Yusuf, "Punna Nalappassangko sallang Allata’ala, mayakku musti nuerangi a’lampa battu ri anne tampaka."
20 Nabokoimi tu Israel Sukot nampa akkema ri kota Etam, ri birinna parang lompoa.
21 Punna allo niaki Batara a’jappa ri dallekanna ke’nanga lalang ri benteng rammanga; na punna bangngi a’jappai ri dallekanna ke’nanga lalang ri benteng pepeka untu’ ampicinikiangi ke’nanga oloang. Lanri kammana anjo akkullei ke’nanga a’jappa allo bangngi.
22 Sila’busu’ alloi nia’ anjo benteng rammanga ri dallekanna anjo bansaya siagang sikabusu’na bangngia nia’ anjo benteng pepeka anrurungangi ke’nanga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA