Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nina TUHAN man Musa,
2 "Persembahken man bangKu anak dilaki sintua, sabap tep-tep anak dilaki sintua kalak Israel ras anak si pemena i bas asuh-asuhen Aku empuna."
3 Ikataken Musa man bangsa Israel nina, "Ingetlah wari enda, warina kam nadingken Mesir, inganndu iperbudak. Enda me wari TUHAN mulahi kam alu KuasaNa si mbelin. La banci ipanndu roti si itama ragi.
4 I bas wari enda, i bas bulan si pemena, bulan Abip, berkat kam nadingken Mesir.
5 TUHAN nggo erpadan tuhu-tuhu man nini-ninindu maka IberekenNa man bandu taneh kalak Kanaan, Heti, Amori, Hewi ras Jebusi. Kenca ItaruhkenNa kam ku taneh si mehuli ras mehumur e, arus maka irayakenndu pesta enda i bas bulan si pemena tep-tep tahun.
6 Pitu wari dekahna la banci la ipanndu roti si la itama ragi, jenari i bas wari si pepituken la banci la ibahan pesta guna kemulian TUHAN.
7 Pitu wari dekahna la banci ipanndu roti si lit ragina; ragi ras roti si itama ragi la banci lit i japa pe i bas daerahndu.
8 Asum pesta e ibenaken, turiken man kerina anak-anakndu maka enda kerina ibahanndu erkite-kiteken kai si nggo ibahan TUHAN man bandu tupung kam nadingken Mesir.
9 Si enda gunana jadi sada persinget, desken sada barang si itambatken i bas tanndu ntah pe i bas perdempakenndu, guna mpersingeti kam gelah terus ibelasken ras ipelajarindu Undang-undang TUHAN, sabap nggo ibaba TUHAN kam ndarat i Mesir nari alu KuasaNa si mbelin.
10 Rayakenlah pesta enda i bas waktu si nggo itentuken tep-tep tahun."
11 "TUHAN si naruhken kam ku taneh Kanaan, si nggo IpadankenNa tuhu-tuhu man bandu ras man nini-ninindu. Jenari kenca IberekenNa taneh e man bandu,
12 la banci la ipersembahkenndu kerina anak sintua dilaki man TUHAN. Tep-tep anak si pemena si tubuh i bas asuh-asuhenndu nari TUHAN empuna,
13 tapi tep-tep anak kelede sangkarna si pemena la banci la itebusindu alu mpersembahken sada anak biri-biri. Adi la atendu itebusindu kelede e, arus ipenggelkenndu kerahungna. Tep-tep anakndu sintua dilaki la banci la itebusindu.
14 Adi isungkuni anakndu kam denggo kai ertina aturen enda, arus ijabapndu ia, nindu, 'Alu kuasa si mbelin TUHAN nggo maba kami ndarat i bas negeri Mesir nari, i ja kami iperbudak.
15 Asum raja Mesir mekeng janah la iberena kami lawes, emaka ibunuh TUHAN kerina anak sintua i negeri Mesir, manusia ras asuh-asuhen. Em sabapna maka ipersembahken kami kerina anak si pemena i bas asuh-asuhen nari man TUHAN, tapi anak kami sintua itebusi kami.
16 Peraturen enda jadi sada persinget, desken sada barang si itambatken i bas tan ntah i bas perdempaken kami, gelah iinget kami maka TUHAN maba kami ndarat i bas negeri Mesir nari alu KuasaNa si mbelin.'"
17 Tupung bangsa Israel ibere raja Mesir lawes, la ia ibabai Dibata arah pasar ngikuti tepi lawit ku taneh Pilisti, aminna gia arah e nge si ndeherna. Nina i bas UkurNa, "La ateKu sambar perukuren kalak enda jenari mulihken ia ku Mesir adi itehna maka arus ia erperang."
18 Emaka IbabaiNa ia arah dalan si meluk-eluk arah gurun pasir nandangi Lawit Merah. Bangsa Israel berkat i Mesir nari sikap guna erperang.
19 Tulan-tulan Jusup pe ibaba Musa, sabap nai nggo isuruh Jusup kalak Israel erpadan mabasa nina, "Adi ipulahi Dibata kam pagi, babalah tulan-tulanku i bas ingan enda nari."
20 Lawes kalak Israel i Sukot nari, jenari ipajekkenna kemahna i Etam i tepi gurun pasir.
21 Suari TUHAN erdalan arah lebena i bas binangun embun guna nuduhken dalan man bana, janah berngi i bas binangun api guna mereken terang. Emaka kalak Israel banci erdalan berngi ras suari.
22 Binangun embun ndai tetap arah lebena adi suari, janah binangun api paksa berngi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA