Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dhabuna PANGERAN ka Mosa, "Kassa’ ngadhep ka rato. Bi’ Sengko’ rato ban ba-ponggabana epacengkala sopaja Sengko’ ngennenga mabadha kaajiban acem-macem e adha’anna reng-oreng jareya;

² bariya keya sopaja ba’na ngennenga nyareta’agi ka na’ potona baramma bangsa Messer egabay en-maenan bi’ Sengko’ ban parkara kaajiban apa bai se epabadha Sengko’ e adha’anna bangsa jareya. Daddi sopaja kabbi padha’a tao ja’ Sengko’ reya PANGERAN."

³ Mosa ban Harun pas ngadhep rato Messer, laju mator, "PANGERAN, Allahepon Ibrani, adhabu kadi ka’dhinto, ‘Sampe’ bila ba’na se ta’ endha’a atoro’ ka Tang parenta? Panneng Tang ommat me’ olle kalowar dhari dhinna’, sopaja ngennenga abakte ka Sengko’.

⁴ Mon ba’na gi’ nolak, lagguna Sengko’ madhatengnga balang ka nagarana ba’na.

⁵ Tana sanagara Messer bakal ta’ etangaleyana sabab katotoban balang se talebat bannya’na. Men-tamennan, la’-mala’ ju-kajuwan se tombu e lon-talon, se ta’ mate ekenneng ojan es, bakal ekakana lang-balang jareya sampe’ tadha’ karena.

⁶ Karatonna ba’na, bengkona ba-ponggabana ban bengkona ra’yadda bakal possa’a ban balang. Balai jareya bakal lebbiya berra’ dhari sabarang se la tao ealame bangatowana ba’na kabbi.’" Saellana jareya Mosa pas abalik, terros nyengla.

⁷ Atorra para ponggabana rato, "Kantos bilaepon oreng ka’dhinto se ambuwa madhateng kasossa’an ka bangsa Messer? Diggal saos reng-oreng Isra’il me’ olle ondur dhari ka’dhinto sopaja kengenga abakte ka PANGERAN, Allahepon. Ponapa junandalem ta’ ngagali ja’ Messer kantos ancor kadi ka’dhinto?"

⁸ Daddi Mosa ban Harun etembali pole bi’ rato, dhabuna rato, "Kassa’ la kat-mangkat mon entara abakte ka PANGERAN, Allahna. Tape sapa’an se entara jareya?"

⁹ Atorra Mosa, "Sadajana, ngangodhadan sareng oreng se ampon towa; na’-kana’ lalake’an sareng babine’an; embi’ sareng dumba sareng sape, sabab bangsa abdidalem kodu mabadha paraya’an menangka panghormadan ka PANGERAN."

¹⁰ Dhabuna rato, "Sengko’ asompa’a kalaban asmana PANGERAN, ja’ sengko’ ta’ magiya oreng Isra’il ngeba babine’an ban na’-kana’! Terrang ba’na reya juba’ maksodda.

¹¹ Enja’! Pera’ lalake’an se olle entar abakte ka PANGERANna, mon pajat jareya se daddi karebba ba’na!" Mosa ban Harun laju padha etondhung dhari ajunanna rato.

¹² Dhabuna PANGERAN ka Mosa, "Pangaceng tanangnga ba’na ka attassa tana Messer, me’ olle pas dhateng balang. Balang jareya matadha’a sakabbinna men-tamennan se gi’ odhi’ saellana ojan es."

¹³ Mosa laju ngangka’ tongkedda, epangaceng e attassa tana Messer. PANGERAN pas madhateng angen dhari temor sampe’ saare samalem. E bakto moncar are pas dhateng balang noro’ angen jareya.

¹⁴ Bannya’na ta’ sakera-kera, sampe’ sanagara possa’ ban balang jareya. Oreng ta’ tao nangale’e balang se bannya’na kantha jareya, ban saellana jareya ta’ kera badha oreng se nangaleyana pole balang se bannya’na kantha jareya.

¹⁵ Tana topo bi’ balang, sampe’ nagara jareya petteng. Bu-tombuwan e tana ban wa’-buwa’an e bungkana se gi’ badha saellana ekenneng ojan es, ekakan kabbi epatadha’ karena bi’ lang-balang jareya. Sanagara Messer tadha’ kajuwan otaba men-tamennan se gi’ badha bagiyanna se abarna biru.

¹⁶ Rato pas duli nembali Mosa ban Harun, dhabuna, "Sengko’ dusa ka PANGERAN, Allahna ba’na, bariya keya dusa ka ba’na.

¹⁷ Sengko’ menta’a sapora. Sateya mara nyo’onnagi ka PANGERAN, Allahna ba’na jareya, sopaja babaja maot reya eambuwana."

¹⁸ Mosa pas kalowar dhari jadhiya, nyo’on ka PANGERAN.

¹⁹ PANGERAN pas ngoba angen temor jareya, epadaddi angen bara’ se ce’ santa’na. Lang-balang jareya egiba angen bara’ ka Tase’ Galagas, sampe’ tadha’ karena settonga balakka’ e nagara Messer.

²⁰ Tape bi’ PANGERAN rato jareya epacengkal, daddi paggun ta’ kasokan ngedine oreng Isra’il ondur dhari Messer.

²¹ Dhabuna PANGERAN ka Mosa, "Jungjung tanangnga ba’na ka attas, nagara Messer tanto pas petteng calemodan."

²² Mosa nyongjung astana ka attas, nagara Messer pas petteng calemodan tello are abidda.

²³ Oreng Messer ta’ nangale’e pa-apa sakale sampe’ tello are abidda; ban e dhalem tello are jareya tadha’ se kalowaran. Tape e bengkona oreng Isra’il paggun tera’.

²⁴ Rato pas nembali Mosa, dhabuna, "Kassa’ kat-mangkat mon ba’na entara abakte ka PANGERANna. Babine’an ban na’-kana’ olle giba. Coma embi’, dumba ban sapena kodu edina."

²⁵ Atorra Mosa, "Manabi kadi ka’dhinto junandalem kodu marenge sape sareng dumba ka reng-oreng Isra’il, se ebadhiya tor-ator sareng kurban obbaran ka PANGERAN, Allahepon Isra’il.

²⁶ Namong sadajana ebinna oreng Isra’il kodu ebakta sadaja, sabab dhari ebin gapaneka oreng Isra’il kodu mele dibi’ keban se ekurbannagiya ka PANGERAN, Allahepon Isra’il. Buru sanapa’na ka ka’dhissa’ bangsa Isra’il kengeng nantowagi keban ponapa se ebadhiya kurban."

²⁷ Tape bi’ PANGERAN rato jareya epacengkal, sampe’ ta’ kasokan ngedine reng-oreng Isra’il kalowar dhari nagarana.

²⁸ Dhabuna ka Mosa, "Ondur ba’na dhari dhinna’! Sengko’ ta’ terro nangaleyana robana ba’na pole! Mon sampe’ sengko’ nangale’e robana ba’na pole, ba’na tanto mate!"

²⁹ "Lerres dhabuepon junandalem," atorra Mosa, "junandalem ta’ kera ngoladi abdidalem pole."

Keluaran

Video Keluaran 10

Ikuti Kami:

KONTAK | PARTISIPASI | DONASI