Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca bage ikataken TUHAN man Musa nina, "Dahilah raja. Nggo Kupemersik ukur raja ras pegawai-pegawaina, gelah banci Kucidahken kerina tanda kuasa enda i lebe-lebena,
2 gelah arah e banci iturikenndu man anakndu ras kempu-kempundu uga serana akap kalak Mesir nggo Kupermain-mainken alu tanda-tanda kuasa e. Alu bage kerina kam metehsa maka Aku kap TUHAN."
3 Emaka lawes Musa ras Harun njumpai raja nina, "TUHAN Dibata kalak Heber ngataken, 'Asa kai nari dekahna kam la nggit nembah man bangKu? Berelah bangsangKu lawes maka banci Aku isembahna.
4 Adi lalap la iberendu, Kusuruh pagi labang reh ku negerindu enda.
5 Lanai lang-lang buena seh maka kerina taneh ketamburen labang. Asa kai si langa icedaken udan baho e kerina pagi ipanganina, subuk bulung-bulung kayu si tading denga.
6 Istana-istanandu idemina, bage pe kerina rumah-rumah pegawai ras rayatndu. Enda pagi lebihen asa si pernah iidah nini-ninindu.'" Kenca e erkusur raja, lawes ia.
7 Nina pegawai-pegawaina man raja, "Asa kai nari dekahna ia nuhsahi kita? Berelah kalak Israel si dilaki lawes, gelah banci isembahna TUHAN Dibatana. La kin igejapndu maka Mesir nggo ceda?"
8 Emaka Musa ras Harun ibaba mulihi ngadap raja, janah ikataken raja man bana duana nina, "Banci kam lawes gelah isembahndu TUHAN Dibatandu. Tapi ise kin kam si lawes e?"
9 Erjabap Musa nina, "Kerina kami lawes, subuk anak-anak kami, bage pe si nggo metua. Ibaba kami kerina anak-anak kami si dilaki ras si diberu, biri-biri ras kambing kami, bage pe lembu kami, sabap la banci lang ibahan kami pesta lako pehaga TUHAN."
10 Nina raja, "Ersumpah aku i lebe-lebe TUHAN, maka tetap la kubere ibabandu ndeharandu ras anak-anakndu! Nggo tangkas maka nggo ersada arihndu ngelawan raja.
11 Lang! Si dilaki saja ngenca banci lawes ersembah man TUHAN adi e kin sura-surandu." Alu bage, Musa ras Harun ipelawesna ndarat i adep-adepen raja nari.
12 Kenca bage nina TUHAN man Musa, "Angkatlah tanndu i babo taneh Mesir gelah reh labang, maka ipanganina kerina si turah, kerina si tading ibahan udan baho e."
13 Iangkat Musa cikenna emaka ibahan TUHAN angin rembus i Timur nari babo negeri e sada wari sada berngi dekahna. Nandangi erpagi-pagi ibaba angin e labang ndai.
14 Erduyun-duyun ia reh, janah icinepina kerina negeri e. Ope denga si e la nggo pernah iidah kalak bage buena labang, janah ndigan pe la pernah nari bage.
15 Itamburina taneh seh mbiring kerina teridah; ipanganina asa kai si itadingken udan baho e, bage pe asa kai buah kayu si lit i bas batangna. Lanai lit tading bulung-bulung si meratah, subuk i bas batang kayu bage pe i bas sinuan-sinuan i belang-belang negeri Mesir.
16 Perban e pedas-pedas idilo raja si Musa ras Harun. Nina raja, "Aku nggo erdosa man TUHAN Dibatandu ras man bandu.
17 Alemilah dosangku sekali nari saja janah ertotolah man TUHAN Dibatandu, gelah IpedauhNa ukumen si mberat enda i bas aku nari."
18 Itadingken Musa raja jenari ertoto ia man TUHAN.
19 Emaka iobah TUHAN angin Timur ku angin Barat si meter. Iangkutna labang ndai, iembuskenna ku Teluk Sues. Sada labang pe lanai lit tading i belang-belang Mesir.
20 Tapi mekeng ibahan TUHAN ukur raja, emaka la iberena kalak Israel lawes.
21 Kenca bage nina TUHAN man Musa, "Pepinterlah tanndu kempak langit maka gelap si mesangat nutupi kerina negeri Mesir."
22 Ipepinter Musa tanna kempak langit, emaka gelap me kerina taneh Mesir telu wari dekahna.
23 Kalak Mesir lanai siidahen sapih-sapih ia, emaka paksa e sekalak pe la lit si ndarat i bas rumahna nari. Tapi i ja kalak Israel ringan, i je lit terang.
24 Idilo raja me Musa, janah nina, "Banci kam lawes gelah isembahndu TUHAN; ndeharandu ras anak-anakndu banci lawes ras kam. Tapi biri-birindu, kambingndu, ras lembundu arus tading i jenda."
25 Nina Musa erjabap, "Adi bage la banci lang isikapkenndu man kami asuh-asuhen guna persembahen gelehen ras persembahen tutungen si man persembahenken man TUHAN Dibata kami.
26 Emaka labo banci bage. Arus ibaba kami kerina asuh-asuhen kami, sada pe la banci tading. I bas si e nari arus ipilih kami asuh-asuhen si man persembahenken man TUHAN Dibata kami. Janah ope denga kami seh i jah, langa bo iteh kami asuh-asuhen si apai si man persembahenken man BaNa."
27 Ipemersik TUHAN ukur raja, emaka la iberena lawes kalak Israel.
28 Nina raja man Musa, "To lawesken! Ulanai ndigan pe kam kuidah! Adi kuidah denga kam, mate naring kam!"
29 "Payo katandu e," nina Musa erjabap. "Lanai bo ndigan pe idahndu aku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA