Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yusup marobbu ka badanna eppa’na sambi molar ban ngaloskos mowana.
2 Saellana jareya laju apareng parenta sopaja jinazana eppa’na ebalsem.
3 Se abalsem sampe’ pa’ polo are abidda, kantha kapprana abidda mon oreng abalsem jinaza. Reng-oreng Messer noduwagi kasossa’anna sampe’ pettong polo are abidda.
4 Saellana lebat bakto se pettong polo are kaangguy noduwagi kasossa’an jareya Yusup adhabu ka ba-ponggabana rato, "Sengko’ menta’a tolong matorragi kantha reya ka rato:
5 ‘E bakto eppa’ para’ seda’a, abdidalem epakon ajanji jinazana eppa’ esareyagiya e palowadan se ampon esadhiya’agi dibi’ sareng eppa’, enggi ka’dhinto neng e Kana’an. Daddi abdidalem nyo’ona edi dhimen badhi ngoburragiya eppa’; manabi ampon lastare abdidalem abaliya pole ka ka’dhinto.’"
6 Dhabuna rato, "Kassa’ la mangkat, koburragi eppa’na menorot se la ejanjiyagi bi’ ba’na."
7 Daddi Yusup laju meyos nyareyagiya eppa’na. Sakabbinna ponggaba ban para seppo karaton, sakabbinna pamimpin e Messer padha noro’ ngater.
8 Ana’ binena, tan-taretanna ban la-balana eppa’na se laen padha noro’ kabbi. Se ta’ noro’, sarta paggun neng e dhaera Gosyen, coma na’-ana’na reng-oreng jareya kabbi se gi’ ne’-kene’, dumba ban embi’na tor ebinna.
9 Se ngaterragi badha se padha nompa’ kareta ban nompa’ jaran. Se ngaterragi jareya talebat bannya’na.
10 Sanapa’na ka Goren-Ha’atad e temoranna Songay Yordan, reng-oreng jareya padha nanges agingging epakaja sampe’ abit; Yusup mabadha opacara kaangguy noduwagiya kasossa’an pettong are abidda.
11 E bakto reng-oreng Kana’an nangale’e reng-oreng jareya padha nanges e Goren-Ha’atad jareya, laju padha ngoca’, "Ce’ ngennessa opacarana reng-oreng Messer mon noduwagiya kasossa’anna polana kapateyan!" Daddi kennengngan jareya enyamae Abel-Mizraim.
12 Daddi tra-pottrana Yakub la ajalannagi apa se edhabuwagi Yakub.
13 Jinazana egiba ka Kana’an, laju esareyagi e Guwa Makhpela e temorranna Mamre, e teggal se ebelli Ibrahim dhari Efron oreng Het kaangguy tana koburan.
14 Samarena nyareyagi eppa’na, Yusup laju abali ka Messer, asareng ban tan-taretanna ban sakabbinna oreng se ngater dhari Messer.
15 Saellana eppa’na seda, tan-taretanna Yusup padha ngoca’, "Baramma mon Yusup gi’ sake’ ate ban gi’ amaksod malessa kajahadanna sengko’ ban ba’na ka aba’na gi’ lamba’ rowa?"
16 Daddi tan-taretanna jareya pas apessennan kantha reya ka Yusup, "Sabellunna eppa’ seda,
17 eppa’ abaseyat ka sengko’ sataretan sopaja ngoca’ kantha reya ka ba’na, ‘Berri’i sapora tan-taretanna ba’na se nganeyaja ba’na lamba’ rowa.’ Daddi sateya tan-taretanna ba’na reya, iya areya abdina Allah se esemba eppa’na ba’na, nyo’ona sapora ka ba’na polana se la nganeyaja ba’na lamba’ rowa." Yusup molar e bakto narema pessen jareya.
18 Saellana jareya tan-taretanna padha dhateng dibi’ laju asojud e ajunanna Yusup. "Sengko’ reya abdina ba’na kabbi," ca’na reng-oreng jareya.
19 Tape Yusup adhabu, "Ella, ta’ osa tako’. Sengko’ reya banne Allah.
20 Ba’na padha nganeyaja sengko’, tape panganeyaja’anna ba’na jareya bi’ Guste Allah la eoba epadaddi kabecce’an kaangguy nolong odhi’na reng-oreng sabannya’na se sampe’ sateya gi’ odhi’ polana kadaddiyan lamba’ rowa.
21 Tadha’ se parlo ekatako’e bi’ ba’na. Sakabbinna kabutowanna ba’na ban na’-ana’na bi’ sengko’ ecokobana." Daddi atena tan-taretanna jareya padha ayem saellana ngedhing dhabuna Yakub se ce’ nyamanna jareya.
22 Yusup terros alenggi e Messer ban la-balana eppa’na. E bakto seda yuswana saratos sapolo taon.
23 Yusup gi’ sempat ngoladi tra-pottrana ban ja-bajana Efraim; bariya keya gi’ sempat mondhut na’-ana’na Makhir, iya areya poy-kompoyya Manasye.
24 Dhabuna Yusup ka tan-taretanna, "Sengko’ la para’ mateya, tape Guste Allah tanto abanto ba’na kabbi, sarta masthe abakta ba’na kabbi abali ka nagara se la ejanjiyagi ka Ibrahim, Ishak ban Yakub."
25 Saellana jareya la-balana bi’ Yusup epakon asompa. "Mara ajanji ka sengko’," ca’na dhabuna, "mon ba’na kabbi bi’ Allah ebakta abali ka nagara jareya, tang badan giba’agi keya."
26 Daddi Yusup seda e Messer e bakto yuswana saratos sapolo taon. Jinazana ebalsem ban ebaddhai petthe.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA