Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Siapa are allo ribokoanganna nipabattuammi kabara’ Yusuf angkana garring sannaki manggena. Jari a’lampami mange angkunjungi Yakub. Naerang tongi ruaya ana’na, iamintu Manasye siagang Efraim.
2 Nalangngere’na Yakub angkana niaki battu Yusuf, napikulle-kulleimi nagassingi kalenna, nampa ammempo ri katinroanga.
3 Nakanamo Yakub mae ri Yusuf, "Le’ba’mi Napappicinikang KalenNa Allata’ala Kaminang Koasaya mae ri nakke ri Lus, ri butta Kanaan, siagang le’ba’ma’ Nabarakkaki.
4 Nakana ri nakke, ‘LaKusareko jai cucu, sollanna a’jari jai bansa turungannu; laKupassareangi anne pa’rasanganga mae ri turungannu, a’jari napatang sa’genna satunggu-tungguna.’"
5 Napannarrusu’mi kananna Yakub, nakana, "Yusuf, anjo ruaya ana’nu lassuka anrinni ri Mesir, ri tenanapa kubattu, iamintu Efraim siagang Manasye, kupasangkammai anakku, sangkamma Ruben siagang Simeon.
6 Punna anggappako pole siapa-siapa ana’, tena nalakupasangkamma anakku ke’nanga, mingka ana’numi. Warisi’ lanagappaya ke’nanga iamintu battua ri Efraim siagang Manasye.
7 Anne kugaukangi kammaya, untu’ Rahel amma’nu. Lalang ri pa’jappangku ammotere’ battu ri Mesopotamia, matemi amma’nu ri butta Kanaan, tena nabella battu ri Efrata, nasanna’ si’nana pa’maikku. Kutarawangi anjoreng, ri biring agang mangea ri Efrata." (Kamma-kamma anne Efrata niaremmi Betlehem.)
8 Ri wattunna nacini’ Yakub anjo ana’-ana’na Yusuf, akkuta’nammi angkana, "Inai anne ana’-anaka?"
9 Appialimi Yusuf angkana, "Iaminne ana’-anakku, Napassareanga Allata’ala ri nakke anrinni ri Mesir." Nakanamo Yakub, "Pa’reppeseki ke’nanga mae ri nakke sollanna kubarakkaki."
10 Tena nakkulle accini’ baji’ Yakub lanri toami siagang tabajikami paccini’na matanna. Napa’reppese’mi Yusuf anjo ana’-ana’na mae ri Yakub. Nampa naraka’ siagang nabau Yakub anjo ke’nanga.
11 Nampa nakanamo Yakub ri Yusuf, "Tena sikali kukapangi angkana lasicini’ ija’ siagang ikau. Mingka kamma-kamma anne ba’lalo Nasarema’ Allata’ala pangngellai untu’ ancini’ tongi ana’-ana’nu."
12 Nampa naallemo anjo ke’nanga battu ri riwaanna Yakub. Nampa kalenna assu’ju’mi ri dallekanna manggena.
13 Le’baki anjo napaempomi Yusuf anjo ruaya ana’na ri ampi’na Yakub. Efraim, iamintu bungkoa ri sa’ri kairi, nampa Manasye, iamintu toaya ri sa’ri kanang. Mingka napadongko’mi limanna Yakub iamintu lima kananna irate ri ulunna Efraim, nampa lima kairinna napadongko’ irate ri ulunna Manasye.
14 (48:13)
15 Le’baki anjo nabarakkakimi Yusuf, nakana, "Allata’ala, Iami Batara napakalompoa Abraham siagang Ishak, Iami anrurunganga’ sa’genna kamma-kamma anne;
16 Iami malaeka’ allappassanga’ battu sikontu bahayaya. Poro Iaminjo Allata’ala ambarakkaki anne ana’-anaka. Poro attallasaki satunggu-tungguna arengku, arenna Abraham siagang arenna Ishak lanri anne ana’-anaka! Poro ammana’-accucui ke’nanga, namajai turunganna ke’nanga ri lino."
17 Tena nasannang nyawana Yusuf ri wattunna nacini’ manggena ampadongkoki lima kananna irate ri ulunna Efraim. Jari nata’gala’mi limanna manggena nampa ero’ napalette’ battu ri tompo’ ulunna Efraim mae ri tompo’ ulunna Manasye.
18 Nakana ri manggena, "Teaki’ kamma anjo bapa’. Iaminne ana’ bungasaka. Kipadongko’mi limanta irate ri tompo’ ulunna."
19 Mingka taerokai manggena, na nakana, "Kuassenji ana’, kuassenji. Manasye lalompoi koasana, siagang turunganna la’jari tongi bansa lompo. Mingka andi’na lalompoangngangi koasana naia, kammayatompa turunganna andi’na la’jari bansa-bansa lompo."
20 Nampa nabarakkakimo pole anjo ana’-anaka anjo alloa, nakana, "Lanatappui tu Israel arennu punna nabarakkaki taua. Lanakana ke’nanga, ‘Poro Napa’jariko Allata’ala sangkamma Efraim siagang Manasye.’" Lanri kammana la’bi napariolomi Yakub anjo Efraim na Manasye.
21 Nampa nakanamo Yakub mae ri Yusuf, "Sangkamma nucinika, a’birimmi a’jalakku. Mingka laNatulung ngasengko Allata’ala siagang laNaerang ngasengko ammotere’ mange ri pa’rasanganna boe-boenu.
22 Ri kaumi, teai ri sikamma sari’battannu kupassareang Sikhem, anjo daera coppong le’baka kurampasa’ battu ri tu Amori siagang pa’dang na panaku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA