Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Emaka ibaba Jusup lima kalak seninana ngadap man raja. Ikatakenna man raja, "Bapangku ras seninangku nggo reh i Kanaan nari rikut ras biri-birina, lembuna ras erta-ertana kerina. Genduari ia sangana i daerah Gosen."
2 Kenca bage ipetandakenna senina-senina e man raja.
3 Isungkun raja kalak enda nina, "Kai pendahinndu?" Nina kalak enda njabapsa, "Kami kalak permakan, Tuan, bali ras nini-nini kami.
4 Kami nggo reh ku jenda ate kami tading i bas negeri enda, sabap kelihen i taneh Kanaan seh kelekna, seh maka lanai lit dukut pe man gagaten asuh-asuhen kami. Adi banci i daerah Gosen min kami ringan."
5 Nina raja man Jusup, "Erkiteken bapa ras seninandu nggo seh,
6 taneh Mesir enda jadi sikerajangenna. Bereken daerah Gosen man inganna sabap daerah e kap si mejilena i bas negeri enda. Adi lit ia si ngasup, suruh lah ermakan asuh-asuhenku pe."
7 Kenca si e ibabana bapana ngadap man raja. Ipasu-pasu Jakup raja e.
8 Isungkun raja ia nina, "Piga tahun nggo umurndu?"
9 "Dekahna aku nggeluh erpindah-pindah lit seratus telu puluh tahun. Tahun-tahun geluhku e la kap ndekah, dem alu kiniseran, la seh asa umur nini-niningku asum ia nggeluh erpindah-pindah," nina Jakup njabapsa.
10 Ibereken Jakup tole pasu-pasuna man raja jenari lawes ia.
11 Kenca bage ipetetap Jusup me bapa ras senina-seninana ringan i taneh Mesir. Iberekenna man kalak enda taneh arah ingan si mejilena i negeri e, ndeher ras kota Ramses, sue ras si iperentahken raja.
12 Isikapken Jusup nakan man bapana, senina-seninana kerina ras keluarga bapana si deban, seh ku bas anak si ngudana kal pe.
13 Kelihen si jadi e lanai teralang serana seh maka ijapa pe lanai lit pangan. Kerina rayat Mesir ras Kanaan nggo kote erkiteken kelihen e.
14 Penukur gandum kalak enda ipepulung Jusup kerina, jenari ibabana ku istana raja.
15 Kenca kerina duit i Mesir ras i Kanaan nggo keri itukurken nakan, rehen me kalak Mesir ndahi Jusup nina, "Bereken pangan man kami! Ula pelepas kami mate. Sampatilah, sabap sen kami nggo keri."
16 Nina Jusup ngaloi, "Adi keri nggo kerisenndu, baba asuh-asuhenndu ku jenda. Aku mereken panganndu ganti asuh-asuhen e."
17 Emaka ibaba kalak enda me kerina asuh-asuhenna man Jusup, janah ibereken Jusup pangan man bana ganti kuda, biri-biri, kambing, lembu ras kalde kalak enda. I bas tahun e iberekenna nakan man kalak enda, ganti kerina asuh-asuhenna.
18 Kenca lepas tahun si e, reh ka kalak enda ndahi Jusup nina, "La kami erbuni-buni man bandu, o Tuan, maka duit kami nggo keri kerina dingen asuh-asuhen kami nggo jadi sikerajangenndu. Lanai lit kai pe si man berenken kami bandu, seakatan diri kami ras taneh kami.
19 Ula pelepas kami mate. Sampati lah! Ula pediat juma kami terulang. Tukurlah kami ras taneh kami jadi ganti pangan. Jadi budak raja gia kami, janah taneh kami pe raja gia empuna. Bere min kami pangan gelah ula kami mate, ras pe benih gelah banci kami merdang i juma kami."
20 Itukuri Jusup kerina taneh i Mesir jadi erta raja. Tep-tep kalak Mesir terpaksa ndayaken tanehna perban kelihen e lanai teralang kelekna. Erkiteken si e kerina taneh i Mesir nggo jadi sikerajangen raja.
21 Kerina rayat Mesir nggo jadi budak iban Jusup.
22 Taneh imam-imam nari ngenca la itukurna. Imam-imam e la perlu ndayaken tanehna perban ibereken raja nge gajina asa cukupna.
23 Nina Jusup man rayat, "Itehndu maka kam ras tanehndu nggo kutukur jadi sikerajangen raja. Enda dage benih gelah merdang kam i jumandu.
24 Adi nggo rani arus iberekenndu seperlimana man raja. Si lebihna banci ipakendu jadi benih ras man panganndu ras keluargandu."
25 Nina kalak enda ngaloi, "Nggo iselamatkenndu geluh kami; mehuli kal perbahanenndu man kami, Tuan, emaka genduari jadi suruh-suruhen raja kami."
26 Erkiteken si e ibahan Jusup sada undang-undang i taneh Mesir maka seperlima i bas ulih juma arus ibereken man raja. Seh genduari undang-undang e erdalan denga. Taneh imam-imam ngenca la jadi erta raja.
27 Kalak Israel ringan i Mesir i daerah Gosen. Nggo bayak ia, janah anak-anakna pe nggo seh kal teremna.
28 Dekahna Jakup ringan i Mesir lit sepulu pitu tahun, seh maka umurna pe nggo lit seratus empat pulu pitu tahun.
29 Kenca paksa kematenna nggo erdeherna, idilona anakna Jusup nina, "Tamaken tanndu kelang-kelang pahangku gelah ersumpah kam la nguburken aku i Mesir enda.
30 Ateku gelah aku ikuburken i bas kuburen niningku. Pindahken lah aku i Mesir enda nari, jenari kuburken lah aku i bas inganna ikuburken." Nina Jusup njabapsa, "Kulakoken bagi ikatakenndu."
31 Nina Jakup, "Ersumpah kam dage maka bage nge pagi ibahanndu." Emaka ersumpah Jusup, janah Jakup ertoto ngataken bujur i das ingan medemna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA