Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ase misir ma si Israel pakon ganup na adong bani. Das ma ia hu Berseba, jadi igalangkon ma galangan hubani Naibata ni bapani, si Isak.
2 Dob ai ihatahon Naibata ma hubani si Israel marhitei panonggoran sanggah borngin, nini ma, “Jakob, Jakob! Ijon do ahu, nini mambalosi.”
3 Dob ai nini ma, “Ahu do Naibata, Naibata ni bapamu;” ulang ma ho mabiar tuad hu tanoh Masir, ai gabe bangsa na bolon do ho tumpakonku ijai.
4 Huhasomani pe ho tuad hu tanoh Masir, anjaha arahkonon-Ku do ho tangkog magira; anjaha si Josep do na manutup matamu holi.
5 Dob ai misir ma si Jakob hun Berseba; anjaha anak ni si Israel do mamboban si Jakob, bapa ni sidea ai, ampa anak ni sidea ronsi parinangon ni sidea, ibagas gareta, na tinongos ni Parao mangalop sidea.
6 Iboban sidea ma homa pinahan ronsi ugas-ugas ni sidea, na sinari ni sidea i tanoh Kanaan, jadi das ma sidea hu tanoh Masir, si Jakob ampa ganup ginomparni ai.
7 Anak pakon pahompuni dalahi ampa boru pakon pahompuni naboru, haganup ginomparni iboban hu tanoh Masir.
8 On ma goran ni anak ni si Israel na das hu tanoh Masir, ai ma si Jakob pakon anakni ai. Bunga tubuh ni si Jakob ai ma si Ruben.
9 Anak ni si Ruben ai ma si Henok, si Palu, si Hesron pakon si Karmi.
10 Anak ni si Simeon ai ma si Jemuel, si Jamin, si Ohad, si Jakin, si Zohar pakon si Saul, anak ni boru Kanaan ai.
11 Anak ni si Levi ai ma si Gersom, si Kehat pakon si Merari.
12 Anak ni si Juda ai ma si Er, si Onan, si Sela, si Peres pakon si Zerah; tapi si Er pakon si Onan domma matei i tanoh Kanaan. Anak ni si Peres ai ma si Hesron pakon si Hamul.
13 Anak ni si Isasar ai ma si Tola, si Pua, si Job pakon si Simron.
14 Anak ni si Sebulon ai ma si Sered, si Elon, pakon si Jahleel.
15 Ai ma anak ni si Lea, na tinubuhkon bani si Jakob i Padang Aram, ampa si Dina, boruni ai. Ganup sidea, anakni pakon boruni, tolu puluh tolu halak do.
16 Anak ni si Gad ai ma si Zifion, si Haggi, si Suni, si Esbon, si Eri, si Arodi pakon si Areli.
17 Anak ni si Asser ai ma si Jimna, si Jiswa, si Jiswi pakon si Beria, ampa si Sera, botou ni sidea; anjaha anak ni si Beria ai ma si Heber pakon si Malkiel.
18 Ai ma anak ni si Zilpa, na binere ni si Laban hubani si Lea, boruni ai; na sapuluh onom halak ai do na tinubuhkonni hubani si Jakob.
19 Anak ni si Rahel, parinangon ni si Jakob, ai ma si Josep pakon si Benjamin.
20 Tubuh do bani si Josep i tanoh Masir si Manase pakon si Efraim, na tubuh bani humbani si Asnat, boru ni si Potifera, malim i huta On.
21 Anak ni si Benjamin ai ma si Bela, si Beker, si Asbel, si Gera, si Naaman, si Ehi, si Ros, si Mupim, si Hupim pakon si Ared.
22 Ai ma ginompar ni si Rahel, na tinubuhkonni bani si Jakob, sapuluh ompat halak ganupan.
23 Anak ni si Dan ai ma si Husim.
24 Anak ni si Naftali ai ma si Jahzeel, si Guni, si Jezer pakon si Syilem.
25 Ai ma ginompar ni si Bilha, na binere ni si Laban hubani si Rahel, boruni ai, anjaha pitu halak do ganup na tinubuhkonni bani si Jakob.
26 Haganup halak na das hu tanoh Masir rap pakon si Jakob, ai ma ginomparni sandiri, seng ipadihut parinangon ni anakni, haganup onom puluh onom halak.
27 Anak ni si Josep na tubuh bani i tanoh Masir dua halak do. Ase pitu puluh halak ma tumpu ginompar ni si Jakob na das i tanoh Masir.
28 Dob ai isuruh si Jakob ma si Juda parlobei marayak si Josep, ase roh si Josep hu Gosen manjumpahkon bapani. Jadi das ma sidea hu tanoh Gosen.
29 Jadi ipasang si Josep ma garetani, laho ma ia hu Gosen manjumpahkon si Israel, bapani ai. Dob iidah ia, mintor idahop ma borgok ni bapani ai, anjaha inunut tangis.
30 Nini si Israel ma dompak si Josep: Age matei ahu sonari, ai domma huidah bohimu, domma hubotoh manggoluh ope ho hape.
31 Nini si Josep ma dompak saninani pakon dompak isi ni rumah ni bapani: Tangkog ma ahu patugahkon hubani Parao, hatahononku ma hu bani: Domma roh saninangku pakon isi ni rumah ni bapangku, na i tanoh Kanaan hinan, marayak ahu.
32 Halak parmahan biribiri do sidea, ai parpinahanon do hagoluhan ni sidea; iboan sidea do biribiri, lombu ronsi ganup na adong bani sidea.
33 On pe, anggo ipio Parao nasiam anjaha isungkun: Aha do parhorjaan nasiam?
34 Balosi nasiam ma: Halak parpinahan do jabolonmu on humbani sietek-etekonnami nari ronsi nuan, sonai hanami age ompungnami, ase andohar boi nasiam marianan i tanoh Gosen, halani magigi do halak Masir mangidah halak siparmahan biribiri.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA