Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ilalanna anjo wattua naparentakammi Yusuf ri kapala palayanna ri balla’, nakana, "Bonei ngasemmi karunna anjo taua, sipakkullena naerang ke’nanga. Nampa nupantama’ massing doe’na ri massing karunna, ri tompo’na gandunga.
2 Pantama tongi cangkiri’ perakku ri karunna andi’na ke’nanga bungkoa, pasiagangi doe’ pa’bayara’ gandunna." Nagaukammi palayanga anjo parentana Yusuf.
3 Ammukona, ri bari’basa’ dudua, assibokoimi Yusuf siagang sikamma sari’battanna. A’lampami ke’nanga siagang keledaina ke’nanga.
4 Tenapa nabella ke’nanga battu ri kotaya anjo, nakanamo Yusuf ri kapala palayanna, "Ondangi linta’ anjo taua. Punna nurapi’ ke’nanga, angkana mako ri ke’nanga angkana, ‘Angngapa nubalasaki kabajikanga siagang kaja’dallang?
5 Angngapa nanulukkaki cangkiri’ pera’na karaengku? Anjo cangkirika napakei untu’ angnginung siagang untu’ appacini’. Kaja’dallang lompo anne nugaukang ngaseng!’"
6 Ri wattunna battu anjo palayanga mange ri sikamma sari’battanna Yusuf, napaumi anjo apa naparentakanga Yusuf.
7 Appialimi ke’nanga angkana, "Apa erotta karaeng? Assumpai ikambe angkana tena na’gau’ kamma ikambe!
8 Kalenta angngassengi karaeng, angkana anjo doe’ nabuntuluka ikambe ri tompo’na gandunga lalang ri karunga, napoterammi ikambe mae ri katte. Jari, tena olona ikambe la’lukka’ pera’ yareka bulaeng battu ri balla’na guburnurka!
9 Ebara’ angkana niaki kigappa anjo baranga ri kalase’renna ikambe, lappassammi nihukkung mate, nampa ikambe a’jari atamaki’ mae ri katte, karaeng."
10 Nakanamo anjo palayanga, "Baji’mi. Mingka iaji bawang anjo nipanggappaya la’jari atangku. Maraenganga akkullei a’lampa."
11 Linta’mi ke’nanga massing ampanaungi siagang ansungkei karunna.
12 Anjo palayanna Yusuf naparessa ngasemmi anjo karunga, sa’genna narapi’ karunna anjo bungkoa, nanagappamo anjo cangkiri’ peraka lalang ri karunna Benyamin.
13 Sanna’mi susana pa’mai’na sikamma daenna, sa’genna nakekke’mi pakeanna ke’nanga. Napanai’mi ke’nanga anjo tekekanna keledaina nampa ammotere’ mange ri kotaya.
14 Ri wattunna battu Yehuda siagang sikamma sari’battanna mange ri balla’na Yusuf, nia’ iji Yusuf ri balla’na. Su’ju’mi ke’nanga ri dallekanna.
15 Nakanamo Yusuf, "Apa ngaseng anne nugaukanga? Apaka tena ngaseng nuassengi angkana inakke anne akkullei kuasseng ngaseng panggaukang ja’dala’nu lanri nia’na pangngassengangku?"
16 Appialimi Yehuda angkana, "Apa akkulle nagaukang ikambe karaeng? Antekamma batena ikambe akkulle assassala’ yareka ampattojengi kalenna ikambe? Nasungkemi Allata’ala kasalanna ikambe. Kamma-kamma anne ikambe anne a’jari ata ngaseng maki’ mae ri katte, karaeng; teai ri ia bawang kipanggappaya anjo cangkiri’ peraka."
17 Nakanamo Yusuf, "Tena! Tena kuero’ appakamma anjo! Iaji bawang anjo tau kupanggappaya anjo cangkiri’ peraka la’jari atangku. Ia maraenga akkullei bebasa’ ammotere’ mange ri manggenu."
18 Majumi Yehuda a’reppese’ ri Yusuf nampa nakana, "Pammopporanga’, karaeng. Kisarema’ sike’de’ kasampatang a’bicara siagang ikatte. Teaki’ larroi ri atanta karaeng. Ikatte sangkammaki’ kalenna karaeng Mesir.
19 Le’ba’ maki’ akkuta’nang mae ri kambe angkana, ‘Apaka nia’ ija manggenu yareka sari’battannu maraeng?’
20 Appialimi ikambe angkana, ‘Toami manggena ikambe siagang ri wattu toanami nalassu’ andi’na ikambe. Daenna battu ri se’rea amma’ anjo andi’na ikambe matemi. Jari kamma-kamma anne ia mami kalenna attallasa’ battu ri ia rua massari’battang se’re amma’. Nampa sanna’ nikarimangnginna ri manggena ikambe.’
21 Kisuroi ikambe angngerangi mae ri katte, sollanna akkulle kicini’.
22 Nampa appialimi ikambe angkana anjo anaka takkulleai sisa’la’ siagang manggena. Punna assisa’laki battu ri manggena, lamatei manggena napakamma.
23 Nampa kikana, ‘Takkullea ngasengko andallekang punna tena nuerangi anjo andi’nu.’
24 Ri wattunna ammotere’ ikambe mange ri manggena ikambe, napabattumi ikambe anjo kananta.
25 Nampa nisuro ikambe ri manggena ikambe battu pole mae anrinni untu’ ammalli apa-apa lanikanre.
26 Appialimi ikambe angkana, ‘Takkulleai ikambe a’lampa mange anjoreng, nasaba’ takkulleai ikambe andallekang ri guburnurka punna tena namminawang todong andi’na ikambe bungkoa. Iapa nakkulle ikambe mange anjoreng punna a’lampa todong.’
27 Nampa nakanamo manggena ikambe, ‘Nuasseng ngasengi angkana anjo bainengku Rahel, ruaji ana’na.
28 Ia bungasaka a’lampami ambokoia’. Ia attantumi angkana le’ba’mi nikanre ri olo’-olo’ sekkeka ri romanga, nasaba’ sa’genna kamma-kamma anne tenamo nale’ba’ kucini’.
29 Punna nualle pole antu ana’ bungkoa battu ri nakke, nampa nia’ apa-apa kajariang ri kalenna, nupabattumi susaya ri kalengku, napassabakkang iaminjo kulamate, lanri inakke anne toama’.’"
30 Nakanamo pole Yehuda ri Yusuf, "Lanri kammana, karaeng, punna ammotereki anne atanta ngaseng mange ri manggena ikambe, nampa tena anjo andi’na ikambe, mattantu lamatemi manggena ikambe napakamma. Nyawana niaki ri antu anaka. Nalanri toa dudunamo, sa’genna anjo kasusaang naeranga ikambe la’jari sabaki nalamate.
31 (44:30)
32 Nampa pole le’ba’mi anne atanta a’janji mae ri manggena ikambe, angkanaya anne atanta antanggongi anjo anaka. Nakana anne atanta ri ia, punna tena naerangi atanta ammotere’ anjo anaka mae ri ia, inakkeminne atanta lantanggongi hukkunganna lalang sikontu tallasa’na anne atanta.
33 Jari kupalaki ri katte karaeng, kipa’biamma’ ammantang anrinni a’jari atanta, untu’ ansambeangi anjo andi’na ikambe. Lappassammi anjo andi’na ikambe ammotere’ siagang sikamma daenna maraenga.
34 Antekamma lakkulle anne atanta ammotere’ mae ri manggena ikambe punna tena nammotere’ anjo anaka? Tanakulleai natahang atanta anciniki sallang musiba antabayai anjo manggena ikambe."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA