Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E bakto Yakub meyarsa ja’ e Messer badha gandum, laju adhabu ka tra-pottrana, "Ba’na me’ manyaman malolo?

² Sengko’ ngedhing e Messer badha gandum; kassa’ entar melle dha’ essa’, sopaja sengko’ ban ba’na ta’ sampe’a mate kalaparan kabbi."

³ Daddi taretanna Yusup se laen ebu se kasapolo oreng jareya pas entar melleya gandum ka Messer.

⁴ Tape Benyamin, taretanna Yusup se tonggal eppa’ tonggal ebu, ta’ ebagi noro’, polana tako’ nemmo calaka’.

⁵ Tra-pottrana Yakub entar melleya gandum ka Messer abareng ban reng-oreng laenna, sabab sa-Kana’an padha kalaparan.

⁶ Se ajuwal gandum ka reng-oreng dhari sabingkerra dunnya jareya iya areya Yusup, se daddi gubennor Messer. Daddi tan-taretanna Yusup jareya sanapa’na ka Messer laju asojud ka tana e adha’anna ale’na.

⁷ E bakto ngoladi reng-oreng jareya Yusup emot ja’ jareya tan-taretanna, tape Yusup tha-kantha ta’ kennal. Laju adhabu ka tan-taretanna jareya epakasar, "Ba’na oreng dhimma?" "Abdidalem oreng Kana’an, nyabis ka ka’dhinto terro ngobangana gandum," saodda tan-taretanna jareya.

⁸ Maske Yusup emot ka tan-taretanna jareya, tape tan-taretanna padha ta’ enga’ ka salerana.

⁹ Yusup pas emot ka se asopenna parkara tan-taretanna jareya, laju adhabu, "Ba’na reya ta-mata; ba’na dha’ enna’ nalektegana e dhimma kakoranganna tang nagara."

¹⁰ "Bunten, guste!" saodda tan-taretanna jareya. "Abdidalem abdiepon junandalem, ka ka’dhinto namong ngobangana gandum.

¹¹ Abdidalem ka’dhinto sataretan, guste. Abdidalem oreng sae sadaja, banne ta-mata."

¹² Dhabuna Yusup, "Lecek! Ba’na dha’ enna’ nalektegana e dhimma kakoranganna tang nagara reya."

¹³ Atorra tan-taretanna jareya, "Abdidalem ka’dhinto sataretan dhubellas, guste, tonggal eppa’, se alenggi e Kana’an. Se settong ampon seda, ban se bungso asarengnge eppa’ e compo’."

¹⁴ "Pajat teppa’ kantha tang oca’," dhabuna Yusup, "ba’na reya ta-mata.

¹⁵ Bi’ sengko’ ba’na eojiya. Sengko’ asompa kalaban asmana rato ja’ ba’na ta’ ebagiya kalowar dhari nagara reya mon ale’na ba’na se bungso ta’ egiba dha’ enna’.

¹⁶ Sala settong e antarana ba’na mole ngone’e; se laen etahana e dhinna’ sampe’ oca’na ba’na ekenneng bukteyagi. Mon enja’, demi asmana rato, ba’na reya ta-mata ongguwan."

¹⁷ Saellana jareya tan-taretanna epamaso’ ka penjara tello are abidda.

¹⁸ E are se kapeng tello’ Yusup adhabu ka tan-taretanna jareya, "Sengko’ reya oreng se tako’ ban ta’at ka Allah. Ba’na bi’ sengko’ epasalamedda tape badha saradda.

¹⁹ Kaangguy abukteyagi ja’ ba’na oreng jujur, sala settong e antarana ba’na etahana e penjara se ekennengnge ba’na sateya reya. Se laen olle mole ngeba gandum se ebelliya ba’na kaangguy sabalana se teppa’na kalaparan.

²⁰ Saellana jareya ba’na kodu abali dha’ enna’ ngeba ale’na se bungso. Jareya menangka bukte ja’ cacana ba’na jareya bendher, ban ba’na bi’ sengko’ ta’ eokoma mate." Tan-taretanna Yusup narema potosanna gubennor jareya,

²¹ sarta laju padha ngoca’, "Tenggu, sateya sengko’ ban ba’na padha nanggung kasossa’an reya polana kasala’anna sengko’ ban ba’na ka ale’ lamba’ rowa. Ba’na kabbi padha tao saapa kasangsara’anna ale’ e bakto jareya, tape e bakto menta tolong, sengko’ ban ba’na padha ta’ marduli. Daddi sateya sengko’ ban ba’na nanggung kasangsara’an reya sateya."

²² Ca’na Ruben, "Lamba’ sengko’ gu ta’ la ngoca’ ka ba’na sopaja ale’ ja’ pama-baramma. Tape ba’na ta’ endha’ ngedhingngagi. Sateya matena etanggungngagi ka sengko’ ban ba’na kabbi."

²³ Yusup ngarte ka cacana tan-taretanna jareya, tape tan-taretanna ta’ tao, sabab tan-taretanna jareya mon acaca ban Yusup ngangguy juru basa.

²⁴ Yusup nyengga, laju nanges. Saellana ngenneng abu-dhabu pole, laju abali ka kennengnganna tan-taretanna. Simeyon esoro giba, esoro tale’e e adha’anna tan-taretanna.

²⁵ Yusup makon sopaja rong-karong andhi’na tan-taretanna eesse’e gandum, ban pessena epamaso’ ka karongnga bang-sebang. Bariya keya sopaja tan-taretanna jareya esangowe se ekakana e jalan. Papakonna jareya ejalannagi kabbi.

²⁶ Saellana jareya tan-taretanna Yusup mowa’ gandum ollena melle jarowa ka hemarra, samarena pas padha mangkat dhari jadhiya.

²⁷ E settong kennengngan reng-oreng jareya ambu, ngenebba. Sala settong e antarana badha se mokka’ karongnga gandumma, makanana hemarra, laju nemmo pessena e attasanna gandumma.

²⁸ "Tang pesse epabali," oca’na aera’ ka tan-taretanna. "Abas, ya, badha e tang karong!" Atena reng-oreng jareya arassa tako’. Kabbi padha saleng atanya sambi katako’an, "Epabaramma’a sengko’ reya bi’ Allah?"

²⁹ Sanapa’na ka Kana’an tan-taretanna Yusup jareya nyareta’agi ka eppa’na pa-apa se la ealame e Messer.

³⁰ Oca’na, "Gubennor Messer ka’issa’ padhabuna ce’ kasarra ka kaula. Ponapa pole kaula sataretan paneka earane ata-matae nagarana.

³¹ Kaula ampon mator, ‘Abdidalem oreng e-sae, banne ta-mata, abdidalem oreng jujur.

³² Abdidalem sataretan sadajana dhubellas, padha tonggal eppa’; se settong seda, dineng se bungso asarengnge eppa’ e Kana’an.’

³³ Gubennor ganeka adhabu, ‘Sengko’ terro abukteyagiya apa ba’na reya oreng jujur onggu. Sala settong e antarana ba’na kodu neng e dhinna’, ta’ olle mole; se laen olle mole ngeba gandum ka la-balana se kalaparan.

³⁴ Kone’e ale’na ba’na se bungso, giba dha’ enna’ ka sengko’. Buru sengko’ parcaja ja’ ba’na banne ta-mata, ja’ ba’na pajat oreng jujur. Taretanna ba’na se etahan bi’ sengko’ pas epabaliya ka ba’na, ban ba’na olle neng e nagara reya, olle adagang sakencengnga.’"

³⁵ Saellana jareya, e bakto reng-oreng jareya padha mokka’ karongnga bang-sebang, laju padha nemmo kanthongnga pessena bang-sebang se aesse pesse. Daddi kabbi laju padha katako’an, bariya keya eppa’na.

³⁶ Eppa’na laju adhabu, "Apa ba’na terro sengko’ kaelangana tang ana’ kabbi? Yusup la tadha’; Simeyon la tadha’. Sateya ba’na ngeba’a Benyamin keya. Sengko’ se nanggung kasossa’an!"

³⁷ Ruben laju mator ka eppa’na, "Manabi Benyamin ta’ ebakta abali sareng kaula, ana’ kaula se lalake’ kadhuwa pate’e sadaja. Diggal kaula se ajaga’a, tanto Benyamin abali ka sampeyan."

³⁸ Tape Yakub adhabu, "Enja’! Benyamin ta’ olle giba! Kaka’na la mate, sateya pera’ kare Benyamin malolo se ekaandhi’ sengko’. Sengko’ tako’ e dhalem parjalanan Benyamin pas nemmo calaka’. Sengko’ la towa; mon gi’ kodu nanggung kasossa’an se kantha jareya sengko’ tanto mate."

Kejadian

Video Kejadian 42

Ikuti Kami:

KONTAK | PARTISIPASI | DONASI