Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dua tahun kenca si e, ernipi raja Mesir, maka ia sanga tedis i tepi Lau Nil.
2 Iidahna pitu lembu mbur, mejile, ndarat i bas lau e nari, jenari nggagat ia.
3 Kenca bage ndarat ka pitu lembu kertang-kertang. Idahina lembu si mejile ras mbur ndai ku tepi lau.
4 Emaka ipangani lembu si kertang-kertang e lembu si mbur ndai seh keri. Kenca bage medak me raja.
5 Kenca bage tunduh ka raja, ernipi ka ia. Iidahna i bas sada ngkebena pitu ruhi page perngis.
6 Jenari turah ka pitu ruhi page kertang-kertang ras melus iembusken angin si melas.
7 Emaka pituna ruhi page kertang-kertang ndai nelen pituna page si perngis ndai. Medak ka raja janah ietehna maka ia nggo ernipi.
8 Pagina erpagi-pagi lanai ia tenang. Emaka idilona kerina guru-guru si baso ras kalak si erpemeteh i Mesir. Iturikenna man kalak enda nipina, tapi sada pe la ngasup ngantusisa.
9 Emaka nina si ngaturken inemen man raja, "Sendah arus kuakuken salahku.
10 Mbarenda itembehindu aku ras kepala si ngaturken panganndu, emaka itutupkenndu kami i bas rumah kepala penjara.
11 I bas sada berngi ernipi kami duana. Duana nipi kami la seri antusenna.
12 I bas paksa si e lit sekalak i je anak perana kalak Heber, eme budak kepala penjara. Ikataken kami bana nipi kami e, jenari iantusina nipi kami ndai.
13 Kerina jadi bagi si ikatakenna. Isuruhndu aku erdahin bagi si gelgel, tapi itampulndu kerahung kepala si ngaturken pangan."
14 Emaka idilo raja me Jusup, janah minter ia ibaba ipenjara nari. Kenca ia ercukur, ras ganti uis, reh ia ngadap raja.
15 Nina raja man bana, "Lit nipingku, tapi la lit ise pe si ngasup ngantusisa. Lit singatakenca maka kam beluh ngantusi nipi."
16 Nina Jusup njabapsa, "Labo terantusi aku, o Raja, tapi Dibata banci mereken antusen si mehuli."
17 Nina raja, "Ernipi aku maka tempa-tempa tedis aku i tepi Lau Nil.
18 Kuidah pitu lembu mejile ras mbur, ndarat i bas lau e nari, jenari nggagat ia.
19 Kenca bage ndarat ka pitu lembu si deban si kertang-kertut, tempa-tempa tading tulanna nari ngenca. I belang-belang taneh Mesir enda e denga nge kuidah lembu si bage mejinna.
20 Ipangani lembu si kertang-kertut ndai lembu si mbur e seh keri.
21 Tapi ise pe la meteh kerna si e, erkiteken lembu kertang-kertut ndai tetap nge kertang ras mejin. Dungna medak aku.
22 Ernipi ka aku, maka kuidah pitu ruhi page perngis, turah i bas sada ngkebena.
23 Kenca bage luar pitu ruhi page kertang-kertang ras melus iembusken angin si melas.
24 Pituna ruhi page si kertang-kertang nelen ruhi page si perngis ndai. Kuturiken nipi e man guru-guru si baso, tapi sekalak pe la ngasup ngantusisa."
25 Nina Jusup man raja, "Duana nipi e seri antusenna; nggo ikataken Dibata man bandu, kai atena IlakokenNa.
26 Pituna lembu si mbur e, eme pitu tahun, pituna ruhi page si perngis e, e pe pitu tahun; duana seri ertina.
27 Pituna lembu kertang-kertang e si reh arah pudi, bage pe pituna ruhi page kertang-kertang ras melus iembus angin si melas e, eme pitu tahun kelihen.
28 Bagi si kukataken ndai, maka Dibata nggo nuduhken kai AteNa si IbanNa.
29 Pitu tahun dekahna riba-iba pangan i belang-belang Mesir.
30 Kenca bage jadi me pitu tahun dekahna kelihen, emaka tahun-tahun si lepas e ilupaken kalak, erkiteken kelihen e ncedaken negeri e.
31 Paksa nakan riba-iba ilupaken kalak kerina, erkiteken kelihen e tuhu-tuhu seh serana.
32 Kam ernipi dua kali, ngatakenca maka kerina kejadin e nggo itetapken Dibata. Pasti IlakokenNa i bas paksa si lanai ndekah.
33 Genduari arus ipilihndu sekalak si erpemeteh ras pentar guna ngaturken negeri enda.
34 Arus pe iangkat kam pegawai-pegawai si deban guna pepulung seperlima i bas ulih peranin tupung paksa nakan riba-iba si pitu tahun e.
35 Suruh pepulungna kerina pangan sanga paksa riba-iba si reh enda, janah bereken man bana kuasa muniken pangan e i tep-tep kota, ras njagaisa.
36 Pangan e jadi persedian man negeri enda, i bas paksa kelihen si pitu tahun i Mesir gelah rayat la mate kelihen i bas paksa mesera."
37 Raja ras pegawai-pegawaina setuju rencana enda.
38 Nina raja man kalak enda, "Labo lit dat kita jelma tersikapen asang Jusup enda, sekalak si lit kesah Dibata i bas dirina jine."
39 Nina raja man Jusup, "Nggo icidahken Dibata man bandu kerina kejadin enda. Erkiteken si e teridah maka ganjangen pemetehndu ras kebeluhendu asang ise pe.
40 Emaka kutamaken kam jadi si ngaturken negeringku, janah kerina rayatku patuh man bandu. Kenca aku kuasandu ngenca si mbelinna i bas negeri enda."
41 Genduari kuangkat kam jadi wakil raja i belang-belang Mesir.
42 Itangtangi raja cincin stempel kerajanna, jenari itamakenna ku jari-jari Jusup. Ipakekenna man Jusup baju si mejilena kal, janah iburakenna man Jusup bura emas.
43 Iberekenna gereta kinirajan si peduaken man Jusup janah pengawal kehormaten erdalan arah lebe gereta e janahna erlebuh, "Pelapang! Pelapang dalanna." Bage me Jusup nggo itangkuhken jadi wakil raja i belang-belang taneh Mesir.
44 Nina raja man Jusup, "Aku raja tapi ise pe la banci erban kai pe adi la nungkun man bandu."
45 Ibanna gelar Jusup gelar bangsa Mesir eme: Sapnat Panea. Iberekenna ka sada diberu man ndeharana eme: si Asenat anak Potipera imam i kota Heliopolis. Sanga e nggo telu puluh tahun umur Jusup. Itadingkenna istana raja, lawes ia ndalani taneh Mesir kerina.
46 (Kej 41:45)
47 I bas pitu tahun si riba-iba e, melala tuhu ulih taneh.
48 Emaka ipepulung Jusup me kerina pangan e, itamakenna ku lumbung i bas tep-tep kota. I tep-tep kota ipepulungna buah juma sekelewetna.
49 Seh kal buena juma ipepulungna seh maka nggo seri buena ras kersik i tepi lawit. Perban e lanai isukati pe.
50 Ope seh paksa kelihen e, nggo tubuh dua anak Jusup arah perjabunna ras Asnat.
51 Nina Jusup, "Erkiteken perbahanen Dibata nggo lupa aku kiniseranku ras keluarga bapangku." Emaka ibanna gelar anakna e Manase.
52 Tole nina, "Nggo ibereken Dibata man bangku tuah i taneh kiniseranku." Emaka ibanna gelar anakna si peduaken Eperaim.
53 Paksa mehumur si pitu tahun e nggo lepas.
54 Emaka mulai me paksa kelihen pitu tahun, bali ras si ikataken Jusup. Tep-tep negeri si deban nggo kelihen kerina, i Mesir ngenca lang.
55 Kenca kalak Mesir mulai kelihen, ipindona nakan man raja. Isuruhna ndahi Jusup, ras ngelakoken bagi si ikataken Jusup man kalak enda.
56 Sanga kelihen ngkenai kerina negeri, italangi Jusup me kerina lumbung ingan nimpan pangan. Idayakenna man kalak Mesir, erkiteken kelihen e tuhu-tuhu mesangat.
57 Jelma rehen ku Mesir i belang doni nari nukur nakan man Jusup, erkiteken kelihen ngkenai kerina ingan alu mesangat.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA