Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ta’ sabarampa abidda dhari jareya badha pangladinna rato kadhuwa se agabay sala ka ratona. Se settong tokang gabayya nom-enomanna rato, settonganna tokang rotina.
2 Rato ce’ dukana ka pangladinna se kadhuwa jareya,
3 laju adhabu sopaja se kadhuwa jareya epamaso’ ka penjara se badha e compo’na kapalana pangawalla karaton; Yusup badha e jadhiya keya.
4 Abit keya se kadhuwa jareya e penjara; bi’ kapalana pangawalla karaton Yusup epadaddi pangladinna se kadhuwa jareya.
5 E settong malem tokang gabayya nom-enoman ban tokang rotina rato se badha e penjara jarowa amempe. Artena mempena jareya ta’ padha.
6 E bakto Yusup entar ka se kadhuwa jareya kalagguwanna, se kadhuwa buru katon sossa.
7 Yusup atanya, "Aponapa sampeyan samangken me’ padha katon sossa?"
8 Sambidda se kadhuwa buru, "Malemma kaula bi’ kanca paneka padha amempe, ban e ka’iya tadha’ oreng se onenga ngarte’e mempe ganeka." Ca’na Yusup, "Namong Guste Allah se oneng ngarte’e mempe. Tore careta’agi ka kaula kadi ponapa mempena sampeyan ganeka."
9 Tokang gabayya nom-enomanna rato jareya ngoca’, "E dhalem mempe ganeka pangrasana badha bungkana anggur e adha’an kaula.
10 Bungkana anggur ganeka acangka tello’. Dhaunna gi’ buru nyelbi’, laju kalowar kembang ban buwana lebba’, padha sa’-massa’.
11 Kaula teppa’ neggu’ gellassa rato, daddi bi’ kaula anggur gella’ epetthek, laju eperres ka gellas ganeka; anggurra bi’ kaula laju eatorragi ka rato."
12 Ca’na Yusup, "Artena kantha paneka: Ranca’ se tatello’ artena tello are.
13 Tello are aggi’ sampeyan bakal epakalowara dhari penjara paneka bi’ rato. Salana sampeyan bakal esapora’a, ban sampeyan bakal epabaliya epalako kadi asalla. Sampeyan bakal ngangka’agiya anggur ka rato akadi ba’-lamba’na.
14 Tape mon kabadha’anna sampeyan pon nyaman pole, kaula kaenga’e, gi’; kaula careta’agi ka rato, nyo’ona tolong me’ olle kaula epakalowar dhari penjara paneka.
15 Sabab sanyatana kaula paneka ekeco’ dhari nagarana oreng Ibrani; sarengngan pole e nagara Messer paneka kaula ta’ oneng alako juba’, daddi ta’ sapantessa kaula paneka eokom e penjara."
16 E bakto tokang roti gella’ ngedhing ja’ mempena tokang gabayya nom-enomanna rato jarowa bagus artena, laju ngoca’ ka Yusup, "Kaula amempe keya. Pangrasana kaula nyo’on budhak asoson tello’.
17 Budhak se tas-attas aesse jajan acem-macem, dhadha’aranna rato, tape jajan ganeka ecocco’ no’-mano’."
18 Ca’na Yusup, "Artena mempena sampeyan sapaneka: Budhak se tello’an artena tello are.
19 Tello are aggi’ sampeyan bakal epakalowara sareng rato, saamponna laju epakon ketthok le’erra. Badanna sampeyan epakona gantong e settong cangga, saamponna ganeka dagingnga sampeyan laju ekakan no’-mano’."
20 Saellana olle tello are dhari jareya, teppa’ are kalahiranna rato. Rato ajang-onjang ce’ bannya’na; ponggabana eonjang kabbi. Rato laju adhabu sopaja tokang gabayya nom-enomanna ban tokang rotina epakalowara dhari penjara ban terros egiba ka adha’anna sakabbinna ponggaba karaton.
21 Tokang gabayya nom-enoman jareya epalako pole akantha se asal,
22 tape kapalana tokang roti rowa eokom mate. Cocok ban katerranganna Yusup.
23 Tape tokang gabayya nom-enoman jarowa pas ce’ loppana ka Yusup, ta’ enga’ sakale.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA