Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nampa assikatinroammo Adam siagang bainenna iamintu Hawa, sa’genna tianammo anjo bainenna. Ammana’mi sitau ana’ bura’ne, nanakana, "Lanri pannulunNa Batara nakuanggappamo sitau ana’ bura’ne." Naaremmi anjo anaka Kain.
2 Nampa ammana’mo pole Hawa sitau ana’ bura’ne, niarenga Habel. Habel a’jari pakalawaki gimbala’, mingka Kain a’jari pamarri.
3 Siapa are wattu ribokoanganna naallemi Kain siapa are wassele’ lamung-lamunna nampa nakoro’bangkang mange ri Batara.
4 Na naalle tommo Habel kalase’renna ana’ gimbala’ bungasa’na, nanasamballe, nampa nakoro’bangkang bageang kaminang bajika mange ri Batara. Sannammi nyawaNa Batara mae ri Habel siagang anjo koro’bang napassareanga.
5 Mingka natollaki Kain siagang koro’bang napassareanga. Larro sikalimi Kain, siagang sekke’mi nicini’ tanja’na.
6 Jari Nakanamo Batara ri Kain, "Angngapa nanularro? Angngapa nasekke’ kamma tanja’nu?
7 Punna baji’ apa nugaukanga, mattantu ta’muriko. Mingka punna kodi apa nugaukanga, attayammi dosaya untu’ antama’ ri atinnu. Eroki dosaya angkoasai kalennu, mingka musti nubetai."
8 Nampa nakana Kain mae ri Habel, andi’na, "Umba nakia’lampa mange ri kokoa." Battui ke’nanga mange anjoreng, nabakkaimi na nabuno anjo andi’na Habel.
9 Akkuta’nammi Batara ri Kain angkana, "Kemaei Habel, andi’nu?" Appialimi Kain angkana, "Takuassengai. Apaka musti kujagai andikku?"
10 Nakanamo Batara, "Angngapa nugaukangi anjo panggaukang palla’ kammaya? Akkio’-kioki cera’na andi’nu battu rawa ri buttaya, sanrapang sa’ra annuntuka pa’balasa’.
11 Nataba mako pattunra sa’genna takkulleamo nuusahai buttaya. Allammasa’mi cera’na ri anjo buttaya, sanrapang angkanaya nasungkemi bawana untu’ antarimai cera’na andi’nu ri wattunna nubuno.
12 Punna a’lamung-lamungko latena apa-apa wassele’na; la’lampako mange-mange siagang latena pammantangannu ri lino."
13 Nakanamo Kain ri Batara, "Ta’liwaki battala’na anjo hukkunganga, na takkullea kutanggong.
14 Kibongkama’ battu ri anne buttaya, bella battu ri dallekang mala’biritTa. La’lampama’ mange-mange na tena pammantangangku ri lino, siagang lanibunoa’ ri tau ambuntulukia’ sallang."
15 Mingka Nakanamo Batara, "Tena. Punna nibunoko, lanibalasaki anjo tau ambunoako, iamintu tuju tau siagang anjo tau ambunoako lanibuno tongi." Nampa Nasareimi Batara pammatei anjo Kain, sollanna punna nia’ tau ambuntuluki tena nalanibuno.
16 Nampa a’lampamo Kain battu ri dallekang mala’biri’Na Batara, namange ammantang ri butta niarenga "Pa’lampang" irayanganna koko Eden.
17 Nia’mo ana’na Kain siagang bainenna, iamintu sitau bura’ne niarenga Henokh. Nampa ambangummo Kain se’re kota na naareng anjo kotaya situru’ arenna ana’na.
18 Henokh iami manggena Irad. Irad iami manggena Mehuyael. Mehuyael iami manggena Metusael, na Metusael iami manggena Lamekh.
19 Anjo Lamekh rua bainenna, iamintu niarenga Ada siagang Zila.
20 Ada angnganakkangi Yabal, na iaminne sossoranna Yabal a’jari bansa pakalawaki siagang ammantanga ri pa’barung-barunganga.
21 Andi’na niareng Yubal, na iaminne sossoranna Yubal a’jari pakacapi siagang pakarena suling.
22 Zila angnganakkangi Tubal-Kain, na sossoranna a’jari panre ri sangka’ rupaya pakkakasa’ tambagaya siagang bassia. Andi’na Tubal-Kain bainea niarengi Naama.
23 Nakanamo Lamekh ri ruaya bainenna, "Ikau Ada siagang Zila, pilangngeri anne! Nia’ sitau turungka kubuno lanri naba’jia’.
24 Punna tuju tau nibuno untu’ ambalasaki lanri nibunona Kain, jari tujupulo tau lanibuno punna nibunoa’."
25 Anggappami pole Adam siagang bainenna sitau ana’ bura’ne. Nakanamo Hawa, "Nasarema’ Allata’ala ana’ bura’ne a’jari sambenna Habel, le’baka nabuno Kain." Lanri kammana minjo nanaaremmo Hawa anjo anaka Set.
26 Nia’ ana’na Set iamintu ana’ bura’ne niarenga Enos. Iaminjo jammanga nappakkaramulamo taua napau arenNa Batara punna anynyomba.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA