Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nierammi Yusuf mange ri Mesir ri tu Ismael. Nampa nibalukang mae ri Potifar, kapala pangawalaka ri balla’ karaenga.
2 Nitulummi Yusuf ri Batara, sa’genna tuli a’jari baji’ sikontu apa najamaya. Ammantammi ri balla’na karaenna, anjo tu Mesirka.
3 Nacini’mi karaenna angkana nitulungi ri Batara anjo Yusuf. Na lanri kammana minjo nanjari ngasemmo siagang baji’ sikontu apa najamaya.
4 Sannammi nyawana Potifar mae ri Yusuf, siagang naangka’mi a’jari palayang untu’ kalenna. Nampa nasare tugasa’ Yusuf untu’ angngurusuki bone balla’na kammayatompa sikontu pa’barang-baranganna.
5 Appakkaramula anjo wattua, passabakkang Yusuf, nibarakkakimi bone balla’na anjo tu Mesirka kammayatompa sikontu barang-baranna, baji’ niaka lalang balla’ kammayatompa niaka ri kokoa.
6 Sikontu apa-apa napatanga Potifar napappirannuang ngasengi mange ri Yusuf. Kammaminjo natenamo napangngassengi Potifar sikamma urusanga lalang balla’na, pantaranganna nikanaya apa nakanrea. Anjo Yusuf sanna’ gammara’na siagang sanna’ ga’gana.
7 Siapa are allo ribokoanganna, appakkaramulami battu ero’na bainenna Potifar angngagangi assikatinroang Yusuf. Nakio’mi anjo turungkaya mae assikatinroang siagang ia.
8 Mingka taerokai Yusuf. Nakanamo Yusuf ri ia, "Pammopporanga’ Ibu’. Le’ba’mi napappirannuang ngaseng Potifar sikontu apa-apanna mae ri nakke. Tenamo naparallu ampikkiriki apa-apa niaka lalang ri anne ballaka.
9 Anrinni sangkammai koasaku siagang koasana Potifar. Tena manna sirupa tanapappirannuangang ri nakke pantaranganna ikatte Ibu’. Antekamma lakkulle kugaukang anjo panggaukang ja’dala’ kammaya siagang ladoraka ri Allata’ala?"
10 Manna na allo-allo ninyonyo’ dudu ri bainenna Potifar, mingka tuli tena naero’ Yusuf angngagangi sikatinroang.
11 Ri se’reang allo ri wattunna antama Yusuf ri balla’ untu’ anggaukangi jama-jamanna, tena sikali tau anjoreng.
12 Nibeso’mi Yusuf ri bainenna Potifar siagang nakana, "Umba kisikatinroang." Naputara’mi kalenna Yusuf sa’genna ta’lappasa’, nampa lari assulukang, mingka ammantangi jubana nita’gala’ ri limanna anjo bainea.
13 Nacini’na bainenna Potifar lari Yusuf nampa ammantang jubana,
14 nakio’mi sikamma palayanna nampa nakana, "Cinissai! Anjo tu Ibrani naeranga bura’nengku mae anrinni ri balla’, napakasirikki’. Antamaki ri kamarakku nampa eroki anggau’ sala’, mingka ammarrang lompoa’.
15 Nalangngerekku ammarrang, larimi assulu’ nammantang jubana."
16 Nampa naboli’ bainenna Potifar anjo jubaya sa’genna ammotere’ bura’nenna.
17 Ammotere’na bura’nenna, nacaritami linta’ mae ri ia, nakana, "Anjo tu Ibrani nueranga mae anrinni, antamaki ri kamarakku untu’ ampakasirika’.
18 Mingka ammarrang lompoa’ sa’genna lari assulu’ nammantang jubana."
19 Teaimi sipato’ larrona Potifar.
20 Na naparentakammo sollanna nijakkala’ linta’ Yusuf nampa nipantama’ ri tarungkua, tampa’na tahananna sikamma karaenga nikurung.
21 Mingka nitulungi Yusuf ri Batara, siagang tuli nikamaseangi. Sa’genna ningai ri kapala balla’ tarungkua.
22 Napappirannuangi sikamma tahanang maraenga mae ri Yusuf. Yusuf nisare tanggong jawa’ mae ri sikontu jamang-jamang lalanga ri anjo tarungkua.
23 Anjo kapala balla’ tarungkua tenamo najannangngi sikontu apa-apa napappirannuanga mae ri Yusuf lanri nitulungi Yusuf ri Batara sa’genna a’jari ngaseng sikontu jama-jamanna siagang baji’.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA