Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I bas sada wari, Dina, eme anak Jakup ras Lea, erdalan-dalan njumpai piga-piga diberu kalak Kanaan.
2 Kenca Sikem anak Hamor, kalak Hewi, kepala daerah e, ngidah si Dina, itagangina, iperkosana.
3 Tapi perbahan mejile iakapna singuda-nguda e, minter ngena atena, emaka iusahakenna maka ngena ka ate singuda-nguda e man bana.
4 Ikatakenna man bapana, "Sungkun min singuda-nguda enda man ndeharangku."
5 Ieteh Jakup maka anakna nggo icemarken, tapi erkiteken anakna si dilaki i juma denga ermakan la uga pa pe nina seh maka anak-anakna mulih ku rumah.
6 Emaka reh Hamor bapa Sikem ndahi Jakup.
7 Sanga si e rembang ka reh anak Jakup si dilaki i juma nari. Kenca ibegina kai si nggo jadi, sengget pusuhna ras merawa ia, perban arah perbahanenna e nggo ijuruken Sikem bangsa Israel alu mperkosa anak Jakup si diberu.
8 Nina Hamor man bana, "Nggo leket ukur Sikem man anakndu si diberu. Bere min maka iempoina ia.
9 Si persada min arihta maka banci si empon bangsa kami ras bangsandu.
10 Alu bage banci kam tading i negeri enda ras kami, banci ipilih kam ingandu tading, bebas kam erbinaga, ras banci ibuat kam taneh jadi sikerajangenndu."
11 Kenca bage ngerana Sikem man bapa ras turang Dina, "Bere min pemindonku, maka kubereken kai saja si ipindondu.
12 Kataken man bangku kai pemindondu, pindolah asa kai atendu tukurna; kubereken kerina pemindondu, gelah min iberendu aku erjabu ras ia."
13 Erkiteken nggo icemarken Sikem si Dina, emaka anak-anak Jakup si dilaki njabap Sikem ras bapana Hamor alu tipu.
14 Nina, "La ibere kami erjabu turang kami ras sekalak si la isunat. E njuruken kami.
15 Banci ibere kami turang kami erjabu adi kerina kam si dilaki isunatken bali ras kami.
16 Emaka kami nggit si empon ras kam, janah kenca bage maka kami ringan i tengah-tengahndu dingen jadi sada bangsa ras kam.
17 Tapi adi la kam nggit bagi si ikataken kami ras isunatken, ibuat kami Dina lawes jenda nari."
18 Sarat-sarat si ikataken kalak enda, nggo bujur iakap Hamor ras anakna Sikem.
19 Emaka mis ilakoken anak perana e kai si nggo isuruh, erkiteken ngenana atena man anak Jakup. Sikem me kalak si mehergana i bas keluargana.
20 Lawes Hamor ras anakna Sikem ku ingan perpulungen i pintu gerbang kota, guna ngataken man kalak kota e.
21 "Kalak enda kalak bujur-bujur; pelepas kalak enda ringan i bas negeri enda ras kita, ula larang ku ja atena. Taneh enda cukup belangna man kalak enda pe. Marilah si empoi anakna si diberu, janah sibereken iempoina anak-anakta.
22 Bage pe kalak enda nggit tading ras kita, janah jadi sada bangsa ras kita, adi kerina kita si dilaki nggit isunatken, bali ras ia pe isunatken.
23 Ma kin kerina kari asuh-asuhenna ras kerina sikerajangenna, jadi sikerajangenta? Emaka siuekenlah maka ia banci tading ras kita."
24 Kerina si ngiani kota e cocok akapna bagi si ikataken Hamor ras Sikem, emaka kerina si dilaki isunatken.
25 Telu wari kenca si e, sanga mesui denga akap kalak e, lawes me Simeon ras Lewi, turang Dina, ku kota e maba pedang alu la ise pe metehsa. Jenari ibunuhna kerina dilaki si lit i bas kota e,
26 termasuk Hamor ras anakna Sikem. Ibabana minter mulih Dina i bas rumah Sikem nari.
27 Kenca jelma si nterem e nggo ibunuhi kalak enda duana, anak-anak Jakup si debanna ngerampuki kota e. Enda me pembalasen si ibahanna erkiteken turangna nggo ijuruken.
28 Ibuat kalak enda biri-biri, lembu, kalde, ras kerina si debanna si lit i bas kota e ras i juma.
29 Ibuatna kerina si lit ergana, itabanna kerina diberu ras anak-anak, jenari iangkatna kerina kasa kai si lit i rumah-rumah.
30 Nina Jakup man Simeon ras Lewi, "Perbahanen kena e erbanca kuakap gulut nge e. Genduari nembeh me ate kalak Kanaan, kalak Peris ras kerina jelma si lit i bas negeri enda man bangku. La nterem anak buahku; emaka adi ipersada kalak enda kenca arihna ngelawan ras nerang aku, e keri me kerina keluarganta."
31 Nina kalak enda, "La kami ngasup ngidah turang kami ijadiken bali ras diberu si pendahinna erlua-lua."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA