Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nalangngere’mi Yakub akkana kamma anne ana’-ana’na Laban, "Naallemi Yakub sikamma pa’barang-baranganna bapatta. Yangasenna anjo kakalumanynyanganna sangnging barang-barang battu ri bapatta."
2 Nacini’ tommi Yakub angkana tenamo nasangkamma riolo baji’na Laban mae ri kalenna.
3 Nakanamo Batara mae ri Yakub, "Ammotere’ mako mange ri pa’rasanganna manggenu siagang sikamma bija pammanakannu. INakke lanjagaiko."
4 Le’baki anjo nasuromi Yakub taua ampauangi Rahel siagang Lea sollanna battu angngagangi sicini’ ri paranga, ri tampa’ pangnganreanna bembena siagang gimbala’na.
5 Nampa nakanamo Yakub ri ke’nanga, "Kuciniki bapa’nu tena nabaji’ sangkamma biasa mae ri nakke, mingka Allata’ala nipakala’birika ri manggeku anjagaia’.
6 Ikau sipa’rua nuasseng tommi angkanaya inakke le’ba’ma’ anjama terasa’ tojeng untu’ bapa’nu.
7 Mingka manna nakamma kammaji naballe-balleiku siagang napinrai sa’genna pissampulo gajiku. Mingka tena nilappassangi ri Allata’ala a’gau’ ja’dala’ mae ri nakke.
8 Ri wattunna nakana bapa’nu, ‘Bembe a’batti’-battika la’jari sawala’nu,’ sikamma bembea allassukammi ana’ a’batti’-batti’. Ri wattunna nakana, ‘Bembe a’ballanga la’jari sawala’nu,’ yangasenna anjo bembea allassukammi ana’ a’ballang.
9 Kammaminjo bateNa Allata’ala angngallei olo’-olo’na bapa’nu nampa Napassareang mae ri nakke.
10 Na ri wattu a’lakina anjo olo’-oloka, asso’nama’ nakucini’ sikontu bembe laki sitabanga a’laki, a’buriki kalenna, a’batti’-battiki, siagang a’ballangi.
11 Siagang nia’mi Allata’ala a’rupa malaeka’ a’bicara ri nakke lalang anjo so’naku, angkana, ‘Yakub!’ Appialima’ angkana, ‘Iye".
12 Nakanamo pole anjo malaekaka, ‘Ciniki, sikontu anjo bembe laki sitabanga a’laki, a’buriki, a’batti’-battiki siagang a’ballangi. Kukunjungi angngerangi anjo mae ri kau, nasaba’ Kucini’ ngasemmi apa nagaukanga Laban mae ri kau.
13 INakkemi Allata’ala le’baka ampappicinikangi KalengKu ri kau ri Betel. Anjoreng le’ba’ mako assare se’re batu pangngu’rangi, na nutiriki minynya’ mabau’ zaitun irateanna. Anjoreng tommako assumpa mae ri Nakke. Kamma-kamma anne sadia mako siagang ammotere’ mako ri pa’rasangang kalassukannu.’"
14 Appialimi Lea siagang Rahel angkana, "Tenamo ammantang kakalumanynyanganna manggena ikambe lanasossorang ikambe.
15 Ikambe anne napare’ sangkamma maki’ tumaraeng. Ikambe anne le’ba’ maki’ nabalukang, siagang anjo ballinna natarimaya le’ba’ tommi napaccappu’.
16 Sikontu kakalumanynyangngang le’baka Naalle Allata’ala battu ri manggena ikambe sikontutojenna ikambe pata siagang ana’-ana’na ikambe. Gaukammi apa Naparentakanga Allata’ala mae ri kau."
17 Apparurumi Yakub untu’ ammotere’ mange ri manggena ri butta Kanaan. Napanai’mi sikamma bainenna siagang ana’-ana’na ri untaya, nampa naemba sikontu bembena siagang gimbala’na kammayatompa sikontu apa-apa le’baka nagappa ri Mesopotamia.
18 (31:17)
19 Anjo wattua niaki Laban ri paranga sitabang anggoncingi bulu gimbala’na, na anjo wattua nalukka’mi Rahel patung pajaga kaluargana manggena.
20 Naakkallimi Yakub anjo Laban, natena napauangi pa’lampanna.
21 Naallemi sikontu pa’barang-baranganna nampa a’lampa karo-karo. A’limbammi ri Binanga Efrat nampa a’lampa mange ri Moncong Gilead.
22 Tallungallopi le’ba’na anjo nampa nipauang Laban angkana larimi Yakub.
23 Napa’rappungammi sikamma taunna Laban, nampa a’lampa siagang ke’nanga mange angngondangi Yakub. Tuju allo sallona nampa akkulle narapi’ ke’nanga ri daera Moncong Gilead.
24 Ri wattunna bangngi battumi Allata’ala mae ri Laban lalang so’na, na Nakana, "Tutuko, tea’ laloko garattaki Yakub manna sibuku kana."
25 Anjo wattua le’ba’mi nabangung kemana Yakub ri se’reang bulu’. Nampa ri se’reang bulu’ maraeng ri anjo todong daeraya nabangung tommi kemana Laban siagang taunna.
26 Le’baki anjo nakanamo Laban ri Yakub, "Angngapa nuakkallia’ siagang nulariang ana’-anakku, sanrapang tau nitahanga?
27 Angngapa nuakkallia’ siagang a’lampa tamakkana-kana? Ebara’ angkana appala’ kanako, mattantu kulappassangko a’lampa siagang baji’, nirurungang siagang kelong-kelong rabana siagang kacapi!
28 Ba’lalo tena nanusarea’ kasampatang untu’ ambaui cucungku untu’ a’jari pammatei passibokoi. Teai sipato’ dongo’na panggaukannu!
29 Gannaki kagassingangku untu’ a’gau’ ja’dala’ ri kau punna erokka’. Mingka ri bangngia niaki Allata’ala napakalompoa manggenu ampakaingaka’ sollanna tena sikali kugarattakko.
30 Kuassengi angkanaya a’lampako lanri ero’ duduko ammotere’. Mingka angngapa nulukkaki patung pajaga kaluargaku?"
31 Appialimi Yakub angkana, "A’lampa’ tamakkana-kana lanri mallaka’ angkana gassingka kitahangi ana’-anatta purina.
32 Passala’ anjo patunga, punna nia’ kalase’renna tau anrinni kigappa allukkaki, lanihukkung matei. Kiparessami, apaka nia’ barang-baranta anrinni purina. Punna nia’, kiallemi ammotere’. Nampa massing taunta akkulle a’jari sa’bi." Tanaassengai Yakub angkana Rahel allukkaki anjo patunga.
33 A’lampami Laban mange ri kemana Yakub nampa naparessa. Le’baki anjo a’lampa tommi mange ri kemana Lea siagang ri kemana anjo ruaya baine suroa, mingka tanagappayai anjo patunga. Kala’busanna antama’mi ri kemana Rahel.
34 Ilalanna anjo le’ba’mi naalle Rahel anjo patunga nampa napantama’ ri purukang pattekekanna untaya, nampa ia kalenna ammempoi rate ri anjo pattekekanga. Naparessami Laban sikontu kemana Rahel, mingka takkulleai nagappa anjo patunga.
35 Nakanamo Rahel ri manggena, "Teaki’ larroi Bapa’, nasaba’ takkullea’ ammenteng anruppaiki’, nasaba’ battui bulangku." Naboya baji’-baji’mi Laban anjo patunga, mingka tanabuntulai.
36 Jari larromi Yakub, nanakana, "Kaja’dallang apa le’ba’ kugaukang? Apa salangku sa’gengku kiondang kamma’ anne purina?
37 Kamma-kamma anne, ri le’ba’namo kiparessa sikontu barang-barangku, apaka nia’ kibuntulu’ barang-baranta purina? Pasulu’mi anjo baranga siagang padongko’mi anrinni, sollanna baji’na nataungku kammayatompa taunta, akkullei nacini’ siagang natappuki angkana inai ri katte sipa’rua annaba.
38 Ruampulo taunga’ le’ba’ ammantang ri katte. Gimbalatta siagang bembeta katambammi a’bija-bija, natale’bakapa kukanre manna sikayu bembe lakia battu ri olo’-olotta.
39 Ia matea nikokko’ ri olo’-olo’ sekke’ tale’bakai kuerang mae ri katte, mingka kalengku assambei. Ia nilukkaka ri alloa yareka ri bangngia, tuli kituntuki ri nakke sollanna kusambei.
40 Sarroa’ nabambangi allo ri wattu singara’ siagang nataba dinging ri wattu bangngina. Kammayatompa sarroa’ takkullea tinro.
41 Kammaminjo kukasia’ ri wattu anjamaku ri katte ruampulo taung sallona. Sampulo angngappa’ taung salloku anjama untu’ anggappai anjo ruaya anatta, nampa annang taung pole salloku anjama untu’ anggappai anjo bembea siagang gimbalaka. Na lalang siapaya anjo sallona, niaki pissampulo kipinra gajiku.
42 Ebara’ angkana tena Najagaia’ Allata’alana boeku, iamintu Allata’ala napakalompoa Abraham siagang Ishak, ma’nassa salloma’ le’ba’ kisuro a’lampa tanggappaya apa-apa. Mingka Naparhatikangi Allata’ala kasusaangku siagang jama-jamang le’baka kugaukang, nampa ri bangngia le’ba’mi Napassareang apa Napattantua."
43 Appialimi Laban angkana, "Anjo ruaya baine, anakku; ana’na ke’nanga inakke pata, siagang anjo pa’rappungang gimbalaka inakke todong pata. Sikontutojenna sikontu apa-apa niaka nucini’ anrinni inakke ngaseng pata. Mingka tena apa-apa akkulle kugaukang untu’ antahangi cucungku.
44 Lanri kammana, umba kippare’ parjanjiang, nampa nisusung anne batu-batua untu’ a’jari pammatei ri anjo parjanjianga."
45 Angngallemi Yakub se’re batu nampa napaenteng untu’ a’jari batu pangngu’rangi.
46 Nampa nasuro sikamma taunna appasse’re batu untu’ napattambung. Le’baki anjo angnganremi assama-sama ke’nanga ri ampi’na anjo batu attambunga.
47 Naaremmi Laban anjo pattambunganna batua Yegar-Sahaduta, nampa Yakub naarengi Galed.
48 Nakanamo Laban ri Yakub, "Anne pattambungang batua la’jari pangngu’rangi mae ri katte sipa’rua." Iaminjo saba’na naniareng anjo tampaka Galed.
49 Nakanamo pole Laban, "Poro Batara anjannangngiki’ ilalang tallasa’ sikabellainta." Lanri kammana anjo tampaka niareng tommi Mizpa.
50 Nakanamo pole Laban, "Punna a’gau’ kodiko mae ri ana’-anakku, yareka a’buntingko baine maraeng, manna pole tena naassengi taua, u’rangi angkanaya Najannangngiki’ Allata’ala.
51 Iaminne batu-batu le’baka kupattambung, na iaminne batu pangngu’rangi.
52 Baji’ na anne pattambunganga, kammayatompa anjo batu pappakaingaka, iami lampakaingakki’ angkanaya takkulleai kulalloi anne pattambunganga untu’ mange ambundukiko. Nampa ikau pole takkulleai nulalloi anne pattambunganga siagang anne batu pangngu’rangi untu’ mange ambundukia’.
53 Allata’ala napakalompoa Abraham siagang manggeku Nahor la’jari haking mae ri katte." Nampa assumpamo Yakub lanri Allata’ala nasombaya Ishak, manggena, untu’ anrupai anjo janjinna.
54 Anynyamballemi sikayu olo’-olo’ nampa napassareang a’jari koro’bang irate ri anjo buluka. Nampa naundammo sikamma taunna untu’ angnganre assama-sama. Le’baki angnganre, a’bangngimi ke’nanga irate ri anjo buluka.
55 Ammukona bari’basa’, lassibokoinna ke’nanga, nabaumi Laban cucunna, nabarakkaki ke’nanga, nampa ammotere’ mange ri tampa’ pammantanganna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA