Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia ularaka iami kaminang cara’de’ ri sikontu olo’-olo’ Napareka Karaeng Allata’ala. Akkuta’nangi anjo ularaka mae ri anjo bainea angkana, "Apaka ma’nassa tena tojeng Nakellaiko Allata’ala angkanrei anne sikontu rappo-rappo niaka ri kokoa?"

² Appialimi anjo bainea angkana, "Akkullei nakanre ikambe sikamma rappo-rappo niaka ilalang ri anne kokoa,

³ pantaranganna poko’ niaka ri tangnga-tangngana kokoa. TaNapa’biangai Allata’ala ikambe angkanrei rapponna anjo pokoka yareka anseroi; punna nakanrei yareka nagaukangi ikambe anjo Napappisangkanga, lamatei ikambe."

⁴ Appialimi anjo ularaka angkana, "Takammayai anjo; tena nulamate.

⁵ Nakkana kamma anjo Allata’ala lanri Naassenna angkanaya punna nukanre anjo rappo kayua, latassungkei akkala’nu; la’jariko sangkamma Allata’ala siagang lanuassengi apa kodia siagang bajika."

⁶ Naciniki anjo bainea angkanaya antekamma ga’gana anjo poko’ kayua, siagang nyamangi nikanre rapponna. Na napikkiriki angkanaya teai sipato’ baji’na punna a’jari bajiki pangngassenganna. Jari naallemi rapponna anjo poko’ kayua, nampa nakanre. Nampa nasare todong bura’nenna, na nakanre todong bura’nenna.

⁷ Silalonna memang le’ba’na nakanre anjo rappo kayua, tassungkemi akkala’na ke’nanga siagang naassemmi kalenna ke’nanga assolara’. Jari nakalimbukimi kalenna ke’nanga siagang leko’ kayu naanyanga ke’nanga.

⁸ Anjo karuenga nalangngere’mi ke’nanga nia’ Karaeng Allata’ala a’jappa lalang ri kokoa. Jari accokkomi ke’nanga ri alla’na poko’-poko’ kayua sollanna tanicinika ri Batara.

⁹ Mingka akkio’mi Karaeng Allata’ala ri anjo bura’nea angkana, "Kemaeko?"

¹⁰ Appialimi anjo bura’nea angkana, "KulangngerekKi’ nia’ ri kokoa. Mallaka’ nakuaccokko lanri assolarakka’."

¹¹ Akkuta’nammi Allata’ala angkana, "Inai angkana ri kau angkana assolarakko? Apaka nukanrei anjo rappo kayu Kupappisangkanga angkana teako kanrei?"

¹² Appialimi anjo bura’nea angkana, "Anjo baine Kipassareanga angngaganga’ ansarea’ anjo rappoa, sa’genna kukanre."

¹³ Akkuta’nammi Karaeng Allata’ala ri anjo bainea angkana, "Angngapa nugaukangi anjo kammaya?" Appialimi angkana, "Nitipua’ ri ularaka, sa’genna kukanre anjo rappoa."

¹⁴ Le’baki anjo Nakanamo Karaeng Allata’ala mae ri ularaka, "Lanihukkungko lanri anjo panggaukannu. Battu ri sikontua olo’-olo’ ikauji bawang musti antanggongi anne hukkunganga, iamintu: Appakkaramula ri kamma-kammaya anne lassossorokko siagang battannu a’jappa, siagang langnganreko limbu’bu lalang sikontu tallasa’nu.

¹⁵ Lasikabirisiko siagang anne bainea. Sossorannu siagang sossoranna latuli simusui. Laniancuruki ulunnu ri sossoranna, nalanukokko’ kacunu’na ke’nanga."

¹⁶ Nampa Nakana Batara mae ri anjo bainea, "LaKutambai pa’risi’nu ilalang attianannu siagang ri wattunnu ammana’. Mingka manna nakamma, latuli lompo cinnako mae ri bura’nennu, siagang latuli amminawang turukko ri ia."

¹⁷ Nampa Nakana Karaeng Allata’ala mae ri anjo bura’nea, "Nupilangngeri kana-kananna bainennu nampa nukanre anjo rappo kayu le’baka Kupappisangkang angkana teako kanrei. Lanri anjo panggaukannu, nitunraimi buttaya. Musti anjama terasakko lalang sikontu tallasa’nu nanampa akkulle assare wassele’ ganna’ anne buttaya untu’ kanrenu.

¹⁸ Romang-romang siagang ruku’-ruku’ akkatinting lanapatimboangko anne buttaya, siagang lamung-lamung tanilamung la’jari kanrenu.

¹⁹ Laballasakko anjama siagang lammattiki songo’nu nanampa nia’ wassele’na anne buttaya, sa’gennu ammotere’ poleang a’jari butta, nasaba’ battu ri buttayako nipare’. Battu ri buttayako nipare’, na nulammotere’ a’jari butta."

²⁰ Naarengi Adam anjo bainenna Hawa, lanri anjo bainea a’jari anronna sikontu rupataua.

²¹ Jari appare’mi Karaeng Allata’ala pakeang battu ri kukkulu’ olo’-olo’ untu’ a’jari pakeanna Adam siagang bainenna. Nampa Napipakeimo ke’nanga.

²² Nakanamo Karaeng Allata’ala, "Kamma-kamma anne a’jarimi rupataua sangkamma iKatte siagang naassemmi ke’nanga passala’ nikanaya baji’ siagang kodi. Jari parallui nijagai sollanna tena nakanrei rapponna anjo poko’ kayu assarea katallassang, sollanna tena nakkulle attallasa’ sa’genna satunggu-tungguna."

²³ Jari Nabongkami Karaeng Allata’ala anjo taua battu ri koko Eden na Nasuro angngusaha butta a’jaria assala’na.

²⁴ Nampa irayanganna anjo kokoa, ri dallekanna pakke’bu antamaya, nia’mo sipa’rappungang malaeka’ pajaga, siagang nia’mo se’re pa’dang a’rinraya pepe’na, amminroa ri kere-keremae, anjagai agang mangea ri anjo poko’ assarea katallassang. Jari tenamo manna sitau akkulle antama’ siagang a’reppese’ anjoreng ri anjo pokoka.

Kejadian

Video Kejadian 3

Ikuti Kami:

KONTAK | PARTISIPASI | DONASI