Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anjo wattua naallemi cipuru’ pa’rasanganga sangkamma apa le’baka kajariang ri jammanna Abraham. Mangemi Ishak andallekang ri Abimelekh, karaeng Filistin, ri Gerar, appala’ ising untu’ ammantang anjoreng.
2 Nagaukammi anjo kammaya, lanri le’ba’na Napappicinikang KalenNa Batara ri ia naNakana, "Teako a’lampai mange ri Mesir, mingka ammantang mako anrinni ri anne pa’rasanganga, situru’ Kuparentakanga ri kau.
3 Inakke lanjagaiko siagang lambarakkakiko. Sikontu anne daeraya laKupassareangi mae ri kau, siagang mae ri turungannu. LaKurupai janjingKu, ia le’baka Kupau mae ri Abraham manggenu.
4 LaKusareko ana’-cucu sanrapang bintoenga ri langi’ jaina, siagang sikontu anne daeraya laKupassareangi mae ri ke’nanga. Sikontu bansaya ri lino lappala’ ngasengi ri kau sollanna Kubarakkaki ke’nanga sangkamma le’ba’na Kubarakkaki turungannu.
5 LaKubarakkaki ngasengko, lanri le’ba’namo mannuruki Abraham ri Nakke siagang nakatutui sikamma hukkungKu siagang parentaKu."
6 Jari ammantammi Ishak ri Gerar.
7 Ri wattunna akkuta’nang taua anjoreng ri passala’na Ribka, appialimi Ishak angkanaya andi’na anjo Ribka, teai bainenna. Mallaki Ishak angkanaya lanibunoi ri yangaseng anjo taua sollanna akkulle naalle anjo Ribka sannaka ga’gana.
8 Ammantannamo Ishak anjoreng siapa are sallona, ri se’reang allo attontommi Karaeng Abimelekh battu ri tontonganna, nanacini’mo Ishak siagang Ribka assikama’-kamaseang.
9 Jari nakio’mi Ishak nampa nakuta’nang angkana, "Sai bainennu anjo bainea? Angngapa nanupau angkana andi’nu?" Appialimi Ishak angkana, "Kupikkiriki angkanaya punna kupau angkana bainengku tena tanibunoku."
10 Nakanamo Abimelekh, "Apa anne le’baka nugaukang mae ri kambe? Tena tania’na kalase’renna ra’yakku akkulle sikatinroang siagang bainennu punna kamma. Na punna kajariang anjo kammaya, ikaumi nakatu’guri anne kasalanna ikambe."
11 Nampa napakainga’mo Abimelekh sikontu ra’ya’na, angkana, "Inai-nai angganggui anne taua yareka bainenna, lanihukkung matei."
12 Appakioro’mi bine siagang a’lamung-lamummi Ishak anjoreng ri pa’rasanganga. Nanggappamo wassele’ a’lappi sibilangngang battu ri apa napakioroka, lanri nibarakkakinna ri Batara.
13 Pila’ katambammi kakalumanynyangnganna, sa’genna a’jarimi tu sanna’ akkalumanynyanna.
14 Angngiri matami tu Filistin ri ia lanri jaina surona, pa’rappungang gimbala’na siagang sapina.
15 Nampa natambungimi butta ke’nanga sikamma bungung le’baka nakeke surona Abraham ri wattu attallasa’na ija.
16 Nampa nakanamo Abimelekh ri Ishak, "A’lampako anrinni ri pa’rasanganna ikambe. La’bi koasangngang mako na ikambe."
17 Jari a’lampami Ishak nampa mange akkema ri Ka’bung Lappara’na Gerar. Anjoreng ammantammi siapa are sallona.
18 Nakekemi ammotere’ sikamma bungung-bungung le’baka nikeke ri jammanna Abraham, ia le’baka nitambungi ri tu Filistin ri wattu matenamo Abraham. Sikamma anjo bungunga nisarei areng situru’ areng le’baka napassareang manggena.
19 Nakekemi surona Ishak anjo bungung niaka ri Lappara’ Gerar, sa’genna anggappamo je’ne’ ke’nanga alla’bi-la’bi.
20 Mingka a’besere’mi sikamma pakalawaki niaka ri Gerar siagang sikamma pakalawakina Ishak. Nakana ke’nanga, "Anne je’neka ikambe pata." Iaminjo saba’na nanaaremmo Ishak anjo bungunga "Pa’beserang".
21 Angngekemi pole surona Ishak bungung maraeng, mingka a’jarimi pole pa’beserang anjo bungunga. Lanri kammana nasaremi areng Ishak anjo bungunga "Passimusuang".
22 Nampa a’lette’ battu anjoreng, siagang angngekemi pole bungung makatallua. Anjo wattua tena na’jari pa’beserang. Lanri kammana, naaremmi Ishak anjo bungunga "Kabebasang". Nakanamo, "Kamma-kamma anne Nasare maki’ Batara kabebasang untu’ ammantang ri anne pa’rasanganga, siagang akkulle maki’ a’jari baji’ tallasatta anrinni."
23 Nampa a’lampamo Ishak nabattu mange ri Bersyeba.
24 Anjo bangngia Napappicinikammi KalenNa Batara ri ia, na nakana, "INakkemi Allata’alana manggenu Abraham. Teako mallakki; laKujagaiko. LaKubarakkakiko siagang laKusareko turungang sannaka jaina lanri janjingKu mae ri atangKu Abraham."
25 Nampa ambangummo Ishak se’re tampa’ pakkoro’bangngang untu’ anynyomba ri Batara ri anjo tampaka. Akkemami anjoreng siagang sikamma surona, siagang angngekemi pole bungung maraeng.
26 Ri se’reang allo nia’mi Abimelekh battu ri Gerar, siagang Ahuzat tumailalanna, kammayatompa Pikhol panglima tantarana untu’ angngagangi sibuntulu’ Ishak.
27 Akkuta’nammi Ishak angkana, "Angngapa kibattu ngaseng untu’ angngaganga’ sibuntulu’ kamma-kamma anne, nariolo numusua’ siagang nubongka’ assulu’ ri pa’rasangannu ngaseng?"
28 Appialimi ke’nanga angkana, "Kamma-kamma anne naassemmi ikambe angkanaya Najagaiko Batara, siagang napikkiriki ikambe angkanaya bajiki punna apparekki’ parjanjiang. Assumpa mako
29 angkanaya tena nula’gau’ ja’dala’ mae ri kambe, sangkamma todong ikambe tena kila’gau’ ja’dala’ mae ri kau. Le’ba’mi a’gau’ baji’ ikambe ri kau na nilappassangko a’lampa taniapa-apa. Baji’mi naassenna ikambe angkanaya Nabarakkakiko Batara."
30 Nampa natoanamo Ishak anjo ke’nanga, siagang angnganremi nangnginung ke’nanga.
31 Ammukona bari’basa’ massing napaumi janjinna ke’nanga na niassai siagang sumpa. Nampa napasalama’ Ishak ke’nanga ri lampana, siagang assisa’la’mi ke’nanga sangkamma bela singaia.
32 Ia todong anjo alloa battumi surona Ishak ampaui ri ia passala’na bungung le’baka nakeke ke’nanga. Nakana ke’nanga, "Anggappami ikambe je’ne’."
33 Nampa nasaremo areng Ishak anjo bungunga "Sumpa". Iaminjo assala’ pakaramulanna naniareng anjo kotaya Bersyeba.
34 Ri wattunna patampulo taung umuru’na Esau, a’nikkami siagang rua tulolo battu ri suku bansa Het, iamintu Yudit ana’na Beeri siagang Basmat ana’na Elon.
35 Anjo ruaya baine napakasusai katallassanna Ishak siagang Ribka.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA