Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sanna’ sikalimi toana Abraham, siagang nibarakkakimi ri Batara ilalang ri sikontu-kontua passala’.

² Ri se’reang allo nakanamo Abraham ri surona kaminang toaya, ia angngurusukai sikontu pa’barang-baranganna, "Padongkoki limannu ri alla’na bonggangku.

³ Assumpamako lanri Batara, Allata’ala makoasaya ri langika siagang ri buttaya, angkanaya tena nalanupa’boyang baine anakku Ishak battu ri alla’na anne sikamma tu Kanaan.

⁴ Musti ammoterekko mange ri pa’rasangang kalassukangku untu’ ampa’boyangi baine, iamintu battu ri alla’na bija pammanakangku."

⁵ Jari akkuta’nammi anjo surona mae ri ia angkana, "Antekamma ebara’ angkana taerokai anjo tuloloa ambokoi balla’na siagang taerokai ampinawanga’ mae anrinni ri pa’rasanganga? Apaka musti kuerangi anjo anatta mange ri pa’rasangang kabattuanta?"

⁶ Mingka appialimi Abraham angkana, "Tutuko! Tea sikaliko erangngi anakku mange anjoreng!

⁷ Batara, Allata’ala makoasaya ri langika, le’ba’ angngeranga’ assulu’ battu ri balla’na manggeku siagang battu ri pa’rasanganna bija pammanakangku, siagang le’ba’mi assumpa ri nakke angkanaya laNapassareangi anne pa’rasanganga mae ri turungangku. Iatommi lassuroi battu malaeka’Na untu’ antulungko, sollanna akkulle nupanggappang sitau baine anakku battu anjoreng.

⁸ Mingka punna taeroka anjo tuloloa amminawang ri kau, ta’lappasa’mako battu ri anne sumpaya. Manna antekamma, tea’ laloko erangngi anakku mange anjoreng."

⁹ Le’baki anjo napadongko’mi limanna anjo surona ri alla’ bongganna Abraham karaenna, nampa assumpa untu’ langgaukangi anjo pappala’na Abraham.

¹⁰ Angngallemi anjo suroa sampulo kayunna unta siagang sangka’ rupa barang-baranna karaenna ia tinggia anggaranna, nampa a’lampa mange ri kota napammantangia Nahor ri wattu tallasa’na. Pammantanganna anjo kotaya iamintu warakkanna Mesopotamia.

¹¹ Battunamo mange anjoreng, napamantammi anjo sikamma ontaya sollanna ammari-mari ri ampi’na se’reang bungung ri pantaranganna kotaya. Anjo wattua karuemmi, siagang iaminjo wattunna nabattu sikamma tubainea anjoreng ri bungunga untu’ angngalle je’ne’.

¹² Appala’ doammi anjo suroa angkana, "O, Batara, Allata’alana karaengku Abraham, Kitulunga’ sollanna akkulle kupa’jari baji’ tugasakku anne alloa; baji’ pa’mai’ laloKi’ mae ri karaengku Abraham.

¹³ Kicinikia’, niakka’ ammenteng ri ampi’na anne bungunga. Sinampe’ mami nania’ tuloloa battu ri kotaya untu’ angngalle je’ne’.

¹⁴ Lakukana sinampe’ ri kalase’renna ke’nanga, ‘Tulunga’ nanupanaung bongkinu, siagang saresa’ je’ne’ inung.’ Punna appiali sinampe’ angkana, ‘Angnginung maki’, siagang untata pole lakusare ngaseng tongi je’ne’ inung!’ iaminjo Napile Batara untu’ atanTa Ishak. Punna kajariang anjo kammaya, lakuassemmi angkanaya baji’ pa’mai’mi Batara mae ri karaengku Abraham."

¹⁵ Ilalang appala’ doanna anjo, nia’mi battu Ribka, iamintu sitau tulolo sannaka ga’gana, angngerang bongki irate ri salangganna mange anjoreng ri bungunga. Iami ana’na Betuel. Na ia tau toana anjo Betuel iamintu Nahor siagang Milka. Na anjo Nahor, iami daenna Abraham. Mangemi Ribka anjoreng ri bungunga nampa nabonei bongkina, nampa a’jappa ammotere’.

¹⁶ (24:15)

¹⁷ Larimi anjo surona Abraham anreppesi nanakana, "Tulunga’, na’, saresa’ je’ne’ inung battu ri anjo bongkinu."

¹⁸ Appialimi anjo tuloloa angkana, "Angnginung maki’ bapa’," nampa napanaung linta’ bongkina battu ri salangganna. Nata’gala’mi anjo bongkia nampa nasare angnginung anjo suroa.

¹⁹ Le’baki angnginung anjo suroa, nakanamo anjo tuloloa, "Erokka’ anynye’ro’ je’ne’ nampa kusare todong je’ne’ inung sikamma untata, sollanna akkulle angnginung ngaseng anjo olo’-oloka sa’genna bassoro’."

²⁰ Nampa natumpa linta’ anjo je’ne’ niaka lalang ri bongkia antama’ ri tampa’ pangnginunganna untaya, nampa lari ammotere’ mange ri bungunga untu’ anynye’ro’ jai-jai je’ne’ sa’genna bassoro’ ngaseng angnginung anjo olo’-oloka.

²¹ Na ilalang kammana anjo naparhatikammi surona Abraham anjo tuloloa, tamakkana-kanaya manna sibuku kana. Eroki naasseng angkanaya maka lanitulungi ri Batara untu’ ampa’le’baki anjo tugasa’na yareka tena.

²² Le’baki angnginung ngaseng anjo untaya sa’genna bassoro’, angngallemi anting-anting bulaeng tinggia anggaranna anjo surona Abraham, nampa napataba ri ka’murunna anjo tuloloa. Nampa napatabai limanna sipasang ponto bulaeng.

²³ Nampa nakana anjo suroa, "Pau sai bedeng inai manggenu. Maka nia’ pa’bangngiang ri balla’na untu’ inakke siagang sikamma taungku?"

²⁴ Appialimi anjo tuloloa angkana, "Manggeku niarengi Betuel, ana’na Nahor siagang Milka.

²⁵ Ri balla’na ikambe nia’ja tampa’ pa’bangngiang untu’ ikatte, kammayatompa jai ruku’ untu’ kanre olo’-olo’."

²⁶ Su’ju’mi anjo suroa anynyomba ri Batara.

²⁷ Nakana, "Nipujimi Batara, Allata’alana karaengku Abraham. Ma’nassa akkana sitappa’ tojengi Batara siagang baji’ pa’maiki mae ri karaengku Abraham. KalenNa ampimpinga’ tulusu’ mae ri bija pammanakanna."

²⁸ Le’baki anjo, larimi anjo tuloloa mange ri balla’na amma’na nampa nacarita ngaseng sikontu anjo apa kajarianga.

²⁹ Anjo Ribka nia’ sitau daenna bura’ne niarenga Laban. Nalangngereki anjo caritana andi’na ri passala’na anjo apa napaua anjo suroa. Nacini’ tommi anjo anting-anting niaka ri ka’murunna siagang ponto niaka ri limanna anjo andi’na. Jari larimi Laban assulu’ battu ri balla’ untu’ anruppai anjo surona Abraham, ia niaka ija ammenteng siagang untana ngaseng ri ampi’na bungunga.

³⁰ (24:29)

³¹ Nampa nakanamo Laban, "Ikatte tunibarakkakiki’ ri Batara, bapa’! Teaki’ ammantangngi pantarang anrinni. Umba kimange ri balla’na ikambe. Nia’mo kamara’ napasadia ikambe untu’ ikatte, siagang nia’ tommo tampa’na sikamma untata."

³² Amminawammi anjo suroa siagang antama’mi ri balla’. Napanaummi Laban sikamma apa natekeka anjo untaya ngaseng, nampa nasare ruku’ anjo olo’-oloka. Le’baki anjo napangngerangngammi je’ne’ pa’bissa bangkeng anjo surona Abraham siagang sikamma tau naaganga.

³³ Ri wattunna nipatalamo kanrea, nakanamo anjo suroa, "Talangnganrea’ rolong punna tenapa nakupabattu pappasang kueranga." Nakanamo Laban, "Iye’, kipaumi."

³⁴ Appakkaramulami a’bicara anjo surona Abraham, angkana, "Inakke anne surona’ Abraham.

³⁵ Sanna’ nibarakkakinna karaengku ri Batara, siagang nipa’jarimi sanna’ kalumanynyanna. Nisaremi ri Batara sanna’ jaina gimbala’, bembe, sapi, unta, keledai, kammayatompa pera’, bulaeng, siagang pole suro-suro bura’ne siagang baine.

³⁶ Ri toanamo umuru’na, Sara, bainenna anjo karaengku allassukammi sitau ana’ bura’ne, nampa napassareang ngasemmo sikontu pa’barang-baranganna a’jari sossoranna anjo ana’na.

³⁷ Nasuroma’ a’janji siagang assumpa sollanna kuturuki parentana. Nakana, ‘Teako ammilei baine untu’ anakku battu ri alla’na sikamma tulolo niaka anrinni ri butta Kanaan,

³⁸ mingka battu ri alla’na bija pammanakanna manggeku. Jari a’lampamako mange anjoreng linta’.’

³⁹ Jari akkuta’namma’ ri ia angkana, ‘Mingka antekamma punna taeroka anjo tuloloa amminawang ri nakke?’

⁴⁰ Appialimi angkana, ‘Batara sangnging kuturukia, Iami lassuroi battu malaeka’Na untu’ antulungko sollanna akkulle a’jari tugasa’nu. Lanugappai sitau baine untu’ la’jari bainenna anakku, ia battua ri alla’na bija pammanakang kalengku, iamintu battua ri bijanna manggeku.

⁴¹ Iaji bawang punna natollakko, nampamako ta’lappasa’ battu ri sumpanu.’

⁴² Na ri wattungku battu sumpadeng ri bungunga, appala’ doamma’ lalang ri pa’maikku, angkana, ‘O, Batara, Allata’alana karaengku Abraham, Kitulunga’ sollanna akkulle kupa’jari baji’ tugasakku.

⁴³ Tuli lammentengku anrinni ri ampi’na anne bungunga. Punna nia’ se’re tulolo battu untu’ angngalle je’ne’, lakupalaki ri ia sollanna nasarea’ je’ne’ inung.

⁴⁴ Punna eroki assarea’, nampa nasare todong angnginung sikamma untaku, iaminjo poro Napilea Batara untu’ a’jari bainenna ana’na anjo karaengku.’

⁴⁵ Tenapa napuppusu’ kupau anjo pappalakku lalang ri pa’maikku, nania’mo Ribka battu angngerang bongki irate ri salangganna nampa angngalle je’ne’ ri bungunga. Nampa kukanamo ri ia, ‘Tulunga’ nanusarea’ je’ne’ inung.’

⁴⁶ Linta’mi napanaung bongkina battu ri salangganna na nakana, ‘Angnginung maki’, siagang unta-untata lakusare tongi je’ne’ inung.’ Nampa angnginumma’. Na le’ba’na anjo nasare tommi unta-untaku angnginung.

⁴⁷ Le’baki anjo akkuta’namma’ angkana, ‘Inai manggenu?’ Nappialimo angkana, ‘Manggeku iamintu Betuel, ana’na Nahor siagang Milka.’ Nampa kupipakeimo anting-anting bulaeng ka’murunna siagang sipasang ponto ri limanna.

⁴⁸ Su’ju’ma’ anynyomba siagang mammuji ri Batara, Allata’alana karaengku Abraham. Iami ampimpinga’ tulusu’ mae anrinni, ri bija pammanakanna sari’battanna karaengku, sa’genna akkulle kubuntulu’ anne tuloloa untu’ ana’na.

⁴⁹ Kamma-kamma anne, punna ero’ ngaseng jaki’ anggaukangi bajika mae ri karaengku siagang anggaukangi apa siratanga mae ri ia kamma sari’battang, tulunga’ nakipauanga’. Mingka punna tena, kipauang tomma’, sollanna kuasseng angkana apa musti kugaukang."

⁵⁰ Appialimi Laban siagang Betuel angkana, "Lanri anne apa kajarianga battui ri Batara, tena nasiratang ikambe antappuki.

⁵¹ Anne Ribka, boli’mi kamma namminawang ri katte siagang na’jari bainenna ana’na karaenta, sangkamma apa Napaua KalenNa Batara."

⁵² Nalangngere’na surona Abraham anjo kananna ke’nanga, su’ju’mi anynyomba ri Batara.

⁵³ Nampa appasulu’mo pakeang, belo-belo pera’ siagang bulaeng, nampa napassareang ngaseng anjo sikammaya mae ri Ribka. Kammayatompa daenna siagang amma’na nasare tommi hadia yangaseng ka’jalaka ballinna.

⁵⁴ Le’baki anjo angnganremi siagang angnginummi anjo surona Abraham siagang sikamma taunna, nampa a’bangngi anjoreng. Ambangunna ke’nanga ammukona bari’basa’, nakanamo anjo suroa, "Boli’ma’ appala’ kana nakummotere’ mange ri karaengku."

⁵⁵ Mingka nakanamo daenna siagang amma’na Ribka, "Boli’mi kamma nammantang rolong Ribka siagang ikambe, kira-kira sidaminggu yareka sampulo allo pole. Le’bappi anjo nampa akkulle a’lampa."

⁵⁶ Mingka nakanamo anjo suroa, "Teaki’ tahangia’. Batara antulunga’ nakkulle anjari baji’ anne pa’jappangku; boli’ma’ kamma nakuammotere’mo mae ri karaengku."

⁵⁷ Appialimi ke’nanga angkana, "Umba nanikioki Ribka nampa nikuta’nang antekamma panggappana."

⁵⁸ Nakio’mi ke’nanga Ribka nampa nakuta’nang angkana, "Ero’jako amminawang ri anne taua?" Appialimi anjo tuloloa angkana, "Iye’, ero’ja’."

⁵⁹ Jari napa’biammi ke’nanga Ribka siagang tutoa baine biasaya amparakai untu’ a’lampa siagang surona Abraham kammayatompa siagang ngaseng taunna anjo suroa. Nampa nabarakkakimo ke’nanga Ribka, siagang kana-kana kammaya anne, "Ikau Ribka, poro a’jariko anrong ri a’juta-jutaya tau! Poro turungannu akkullei nabeta kota-kotana musunna!"

⁶⁰ (24:59)

⁶¹ Nampa apparurumo Ribka siagang sikamma bai’-baine lolo a’jaria surona. Nai’mi ke’nanga ri untaya nampa a’lampa amminawang ri anjo surona Abraham.

⁶² Ilalanna anjo wattua nia’mi Ishak battu ri parang lompoa, allalo ri bungung niarenga "Iami Amparhatikanga’" nammantang ri bageang timboro’na Kanaan.

⁶³ Ri se’reang karueng assuluki battu ri kemana ero’ mange a’jappa-jappa ri kokoa. Nampa nacini’mo angkana nia’ siapa are jaina unta battu.

⁶⁴ Nacini’na Ribka anjo Ishak, naummi battu ri untana,

⁶⁵ nampa akkuta’nang ri surona Abraham angkana, "Inai anjo bura’ne niaka ri kokoa a’jappaya mae anrinni ri katte?" Appialimi anjo suroa angkana, "Ia anjo karaengku." Jari naallemi bongonna Ribka nampa nabongongi rupanna.

⁶⁶ Nampa nacaritamo anjo suroa mae ri Ishak sikamma apa le’baka nagaukang.

⁶⁷ Le’baki anjo naerammi Ishak anjo Ribka antama’ ri kemana tumate Sara amma’na, nampa nanikkai Ribka. Sanna’ nangaina Ishak anjo Ribka; sa’genna kasaleorammi pa’mai’na si’naya lanri tenanamo amma’na.

Kejadian

Video Kejadian 24

Ikuti Kami:

KONTAK | PARTISIPASI | DONASI