Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nale’ba’mo nipa’jari sikontu apa-apaya.
2 Ri allo makatujua nale’ba’mo Napa’jari Allata’ala anjo jama-jamanNa, nampa ammari-marimo.
3 Nampa Nabarakkakimo anjo allo makatujua siagang Nasa’la’mi a’jari allo pammari-mariang, lanri iaminjo alloa Nammari-mari Allata’ala ri wattu le’ba’namo Napa’jari jama-jamanNa.
4 Kammaminjo riwaya’ nipa’jarina sikontu apa-apaya. wattu Napa’jarina Karaeng Allata’ala sikontu apa-apaya,
5 tenapa bine attimbo siagang tenapa lamung-lamungang ri buttaya, lanri tenapa Napaturungi Batara bosia siagang tenapa tau lanjamai anjo buttaya.
6 Mingka appakaramulami je’neka assulu’ battu ri buttaya nanabasai tompo’na buttaya.
7 Nampa angngalle Karaeng Allata’ala sike’de’ butta, naNapare’ a’jari se’re tau, nampa natui’ so’bolo’ ka’murunna siagang nappasa’ assarea katallassang; nattallasa’mo anjo taua.
8 Le’baki anjo appare’mi Allata’ala koko ri Eden, irayanganna anjo tampaka, nampa Napamantang anjoreng anjo tau le’baka Napare’.
9 Napatimbomi Karaeng Allata’ala sangka’ rupa poko’-poko’ ga’ga, bajika rapponna. Ri tangnga-tangngana anjo kokoa nia’mo attimbo poko’ assarea katallassang, siagang poko’ assarea pangngassengang ri passala’na bajika siagang kodia.
10 Nia’ se’re binanga a’lo’loro’ battu ri Eden, ambasai anjo kokoa; na pantaranganna anjo koko Eden ta’bage appaki anjo binangaya.
11 Makase’rea niarengi Pison; iaminne binangaya a’lo’loro’ ri tammulilina butta Hawila.
12 Anjoreng nia’ bulaeng ti’no’ kammayatompa bau’-baukang susaya nigappa, siagang batu-batu paramata.
13 Binanga makaruaya niarengi Gihon; a’lo’loroki je’ne’na ri tammulilina butta Kus.
14 Binanga makatallua niarengi Tigris, a’lo’loroka irayanganna pa’rasangang Asyur. Binanga makaappaka niarengi Efrat.
15 Nampa Napamantang Karaeng Allata’ala anjo taua lalang ri koko Eden, sollanna najama siagang naparakai anjo kokoa.
16 Nakanamo Batara mae ri anjo taua, "Akkullei nukanre sikontu rapponna anjo poko’-poko’ niaka ri anne kokoa,
17 pantaranganna anjo poko’ assarea pangngassengang ri passala’na bajika siagang kodia. Takkulleai nukanre rapponna anjo poko’ kayua; napunna nukanrei tena tamatenu ia memang anjo allo nukanrena."
18 Nampa Nakana Karaeng Allata’ala, "Tabajikai taua attallasa’ kale-kalenna. LappareKa’ se’re parekang aganna ia cocoka ri ia untu’ ambantui."
19 Angngalle tommi sike’de’ butta nampa Napare’ sangka’ rupa olo’-olo’ niaka ri bontoa siagang niaka ri alla’. Na Naerang ngasemmo Allata’ala anjo sikammaya mae ri anjo taua sollanna nacini’ angkanaya areng apa lanasareangi anjo sikamma olo’-oloka. Iaminjo assala’na olo’-olo’ niaka ri tompo’na buttaya siagang olo’-olo’ niaka ri alla’, namassing nisare areng.
20 Kammaminjo nanasaremo areng taua anjo sikontu olo’-olo’ niaka ri tompo’na buttaya siagang ri allaka. Mingka tena manna se’re kalase’renna yangasenna anjo akkulle a’jari agang cocoka mae ri ia siagang akkullea ambantui.
21 Nampa Napa’jari attinromo Karaeng Allata’ala anjo taua. Nalalang attinrona, Napasulu’mi Karaeng Allata’ala kalase’renna buku rusu’na battu ri kalenna anjo taua, nampa natongko’ ammotere’ siagang dageng anjo bate pammantanganna buku rusu’na.
22 Battu ri iaminjo buku rusuka naNapare’ Batara sitau baine, nampa Naerang mae ri anjo taua.
23 Nakanamo anjo taua, "Iaminne tau sangkammangku, buku battu ri bukungku, siagang dageng battu ri dagengku. Kuarengi baine, lanri battu ri bura’nei nialle."
24 Iaminjo saba’na nanabokoi bura’nea anrong manggena, nampa a’jari se’re siagang bainenna, na’jari se’remo anjo ruaya tau.
25 Assolaraki anjo bura’nea siagang bainea, mingka tena nasiri’-siri’ nakasia’.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA